11
Amagezi gaabisa Abaisiraeli mu irungu
1Amagezi gaasobozesa Abaisiraeli okutuukiriza obukalamu emirimo gyaibwe, nga gabita mu mulanzi omutukuvu.11:1-5: Kuv 15:22—17:16 2Baatambula olugendo nga babitira mu irungu omutaali bantu, baasimbanga weema dhaibwe mu bifo omutabangaku muntu yeenayeena. 3Baalwananga n’abazigu baibwe, era baaghangulanga abazigu abo. 4Endiwo bwe yabagemanga baakuliriranga iwe Musengwa, waabagha amaadhi nga gava mu lubaale olubbalangufu, baawona endiwo. 5Ebintu byene ebyavangaku akabi akaabonerezanga abazigu b’abantu bo abo, era n’ebirala byene ebyo ebyawonianga abantu bo abo nga bali mu buzibu.
Okubonereza Abamisiri
6-8Olw’okuba abazigu abo baabisa ekiragiro okwitanga abaana abaghere ab’abantu bo, kyewava n’osiikuula omwiga gwaibwe ogutakaliira, amaadhi gaamu gaafuuka mabi nga ga musaayi.
Waaleka abantu bo endiwo yaabaluma nga bali mu irungu, basobole okulegaku ku nsambo ye wabonerezaamu abazigu baibwe. Ate waamala waabagha amaadhi mangi mu kiseera kye baali tibagasuubiriramu naire. 9Bwe wabaleba, ekyo kyabaleetera okutegeera obulumi bw’otuusa ku bakozi b’ebibi ng’oli kubasalira omusango n’obukambwe, waire nga beene wabakangaivula ng’olimu n’okusaasira. 10Waleba abantu bo abo, ng’omuzaire bw’aleba abaana be okubalabula. Aye abazigu baibwe waabalamula na bukambwe ng’oti ni kyabazinga omukambwe, waabasalira omusango gwabasinga. 11Abazigu abo, ka babe nga baali agho kumpi n’abantu bo oba nga baabali ghala, boonaboona baawulira obulumi n’ekirala. 12Enaku yaibwe yali ya mikuzi ebiri, era bwe baidhukira ebyaligho baasinda. 13Ate bwe baakimanha ng’okubonerezebwa kwaibwe kwaganhula abantu bo, olwo baakizuula nga niiwe Musengwa owabatuusaaku ebyo; 14kuba eira einho Abamisiri abo mu ngeri ey’okunhoomerera baali balobye okuba n’enkolagana yoonayoona n’omusaadha oyo eyasuulibwaku n’alekebwa kuliya ng’akaali mughere. Aye ku nkomerero ya byonabyona baamala baamwewuunhia bwewuunhie olw’ebyo ebyabaagho, bwe baamala ni bakizuula nti abantu abakola ebituufu endiwo tiyabaluma ng’oti ni bweyaluma beene.
15Obubi bwaibwe bwabaleetera okudaaliima, baafuna endowooza edh’ekisiru, baatoolera okusinza emisota egizira magezi n’ebitonde ebindi ebyenhinhalwa. Kyewava n’obabonereza ng’obasindikira olukunkumuli olw’ebitonde ebizira magezi ng’oti n’ebyo.11:15-16: Kuv 8:1-24; 10:12-15 16Olwo basobole okwega nti omuntu abonerezebwa n’ebyo byene bye yakozesa okwonoona. 17Ku iwe Musengwa Aghanga Ebintu Byonabyona, owatonda ensi ng’ogitoola agheereere, wali osobola okubonereza abantu abo ng’obasindikira olukunkumuli olw’ebisolo ebikambwe oba olw’empologoma edhizira kusaasira naire. 18Oba, wali osobola okutondayo ensolo edhindi empyaka edhitabangaghooku, enkambwe einho, edhigheera omuuka ogw’omuliro, oba edhiwologoma mu kanwa mwadho ni muvaamu ebire eby’omwosi, oba edhiri n’amaiso agavaamu obusambuka bw’omuliro obutiisa. 19Ensolo ng’oti n’edho tikyandidheetaagiisa na kulumba bantu abo kubaita, aye beene okudhiringaku obulinge n’okwandibatiisiisa baafa n’okufa. 20Ni bw’otandikoze ebyo, wali osobola okubayiiga ng’ojiira ku kukola amazima, oba okubakuba ni bafa ng’okozesa ku buyinza bwo butono buti ng’onagaku bunage. Aye ebintu byonabyona by’okola, walondagho okubipima obungi bwabyo, n’obuzito bwabyo, era n’okubibala obungi bwabyo.
Katonda ali n’obuyinza era asaasira
21Oli wa idembe okwoleka obuyinza bwo obungi woonawoona gh’oyendera, era ghazira asobola kukulwanisa, 22kuba ku iwe ensi yoonayoona eri ng’oti kapeke kalala ak’omusenho akatazitogha ku minzaani naire. Era eri ng’oti itondo lya musulo ku nkyo erigwa ku itaka. 23Iwe osobola okukola ekintu kyonakyona, aye ogemerwa buli muntu ekivunika. Waatuumya ebibi by’abantu amaiso, basobole okwenenia. 24Ogonza buli kintu ekiri ku nsi, ghazira ky’onhooma ku bye wakola. Ngoli ghaligho ky’otaayenda tiwandikikoze. 25Ekintu kyonakyona kyandisoboire kitya okubaagho, nga tokitonze? Era kyandisoboire kitya okusigala nga kikaaligho, nga tokyenze kibeegho? 26Wo Musengwa, iwe oganha ebintu byonabyona byabaagho ku nsi, olw’okuba bibyo era kuba ogonza ebintu byonabyona ebiramu.