10
Amagezi gaakuuma Adamu
1Amagezi gaakuuma lata w’ensi, omuntu eyasooka okuwumbibwa, bwe yali agho nga ni yenka eyali yaakatondebwa. Gaamulokola mu kibi kye,10:1-2: Mainh 1:26-28 2gaamugha amaani okufuga ebintu byonabyona eby’oku nsi.
Kaini yakyuka yaava ku Magezi
3Ghaaligho omuntu eyakola ekibi yaakyuka yaava ku Magezi. Yeereetera mwene okuzikirira, bwe yaita muganda we mu busungu obutaloodheka.10:3: Mainh 4:8-13
Amagezi gaakuuma Noa
4Olw’ekibi ekyo, ensi yaidhaku omwidhuzo ogw’amaadhi aye era kabiri Amagezi gaagiwonia. Gaagalagira omuntu akola ebituufu ng’ali mu lyato lye ery’ekiti eritaali igumu naire, gaamulokola.10:4: Mainh 7:1—8:22
Amagezi n’agaayamba Aburahamu
5N’olundi, amaghanga bwe gaalemesebwa okutuukiriza entegeka dhaago edh’okukola ebikyamu, Amagezi gaabonayo omuntu akola ebituufu gaamukuuma ng’aziraku musango mu maiso ga Katonda. Gaamugha n’amaani yaatuukiriza Katonda kye yamulagira, waire nga yali agonza inho mutabane we.10:5: Mainh 11:1-9; 12:1-3; 22:1-19
Amagezi gaatoola Loti mu kabi
6Amagezi gaatoola mu kabi omuntu akola ebituufu, ere ng’abantu abatatya Katonda bali kufa. Omuntu oyo yaawona omuliro ogwazikiriza Ebibuga Ebitaanu.10:6-9: Mainh 19:1-29 7Ni ye buli eno, obumanhiso tibuvangagho obukakasa ebibi byaibwe bye baakola: Eitaka lyayo ikalu lya lubbalangu era linioka bunioke. Ebisimbe byamu bitaaku ebibala aye tibyenga. Era empango ey’omuunhu eyeesimbye eri eyo, ng’ekiidhukizo eky’omuntu oyo eyaloba okwikiriza. 8Abantu ab’omu bibuga ebyo tibaafaayo ku Magezi naire, waire okugezaaku okwawulagho ekirungi n’ekibi. Ate ti n’ekyo kyonka, aye baalekagho n’akamanhiso abantu kwe banaidhuukiriranga obusiru bwaibwe, olwo ensobi dhaibwe dhe baakola dhirobe kwerabirwanga. 9Aye Amagezi gaawoniagho abagheereza baago, baaloba kugwa mu kabi.
Amagezi gaakuuma Yakobo
10Ghaaligho omuntu eyakolanga ebituufu eyalumuka okwewonia obusungu bwa muganda we. Omuntu oyo Amagezi gaamugalagira ekituufu eky’okukola, gaamwoleka obwakyabazinga bwa Katonda, era gaamuleetera okumanha ebintu ebitukuvu.10:10 ebintu ebitukuvu oba bamalaika. Gaamuleetera ebintu okumujiira obukalamu, era yaatuukiriza bukalamu emirimo gye.10:10-12: Mainh 27:43; 28:10-22; 32:24-30 11Abantu ni bwe baagezaaku okumutuntuza nga benda okumunhagaku ebintu bye, Amagezi gaaba ghalala naye nga gamugumya era gaamufuula omukombe. 12Gaamukuuma gaamuwonia abazigu be, abaali bamweteeze nga benda okumulumba. Gaamuleetera obughanguzi mu kulwana okwali nga kwa kwegera maani, olwo amanhe nti ezirayo kintu kindi kisobola kufuula muntu kuba wa maani okutoolaku okutya Katonda.
Amagezi gaatoola Yosefu mu kabi
13Ghaaligho omuntu akola ebituufu lwe yatundibwa abe omwiru, aye Amagezi tigaamulekulira agho. Gaamukuuma gaamuwonia okugwa mu kibi, gaaja naye mu ikomera.10:13-14: Mainh 37:12-36; 39:1-23; 41:37-44 14Era tigaamuvaaku, okutuusa bwe gaamutuusa ku buyinza obw’okufuga obwakyabazinga. Yaafuga abantu abaalinga nga bamutuntuza. Olwo Amagezi ago gaakyoleka bukalamu nti baamughaayiriza by’ataakola, era gaamugha ekitiisa ekitakoma.
Amagezi gaakulembera Abaisiraeli baava mu Misiri
15Amagezi gaatoola abantu abaziraku musango era abatukuvu, gaabawonia eighanga ery’abantu abaali babatuntuza.10:15-21: Kuv 1:1—15:21 16Gaingira mu mugheereza wa Katonda, yaakana yaaja mu maiso ga bakyabazinga abatiisa, yaakola ebyewuunhio n’obumanhiso. 17Amagezi ago gaagha abantu ba Katonda empeera olw’ebizibu bye baagumira. Gaababisa mu lugendo olw’ebyewuunhio. Gaabaghanga ekinsense omusana, ate obwire gaabaghanga obutangaavu obw’emuunienie obw’amaani einho. 18Gaababisa mu maadhi amaleeyi ag’Enhandha Emyufu, 19aye abazigu baibwe gaabadimiza mu maadhi ago, era gaamala gaasuula emirambo gyaibwe ku mbali okw’enhandha. 20Ku olwo abantu abakola ebituufu baanhagulula ebintu eby’abatatya Katonda. Baakwembera enhembo iwe Musengwa Omutukuvu, era baakusaaka n’omwoyo mulala olw’okubalwanirira n’obawonia. 21Amagezi gaasibulula enimi dh’abo abaali tibasobola kwogera, baayogera, gaaleetera n’abaana abaghere okwogera obulungi bwene.