1
Okunoonia obutuufu
11:1: Mag 6:1-11 Imwe abafuzi abali mu nsi muno mugonzenga okukola ebituufu. Ebidhuubo byaimwe mubimalirenga ku Musengwa, mumunoonienga n’obwesimbu. 2Abo abatagezaaku kumuleba bulebe bamubona, era yeeyoleka eri abo abamwesiga. 3Endowooza enkyamu ereetera abantu okwawukana ku Katonda, era obuyinza bwa Katonda oyo buleetera abasiru abagezaaku okumuleba okuswala. 4Amagezi tigaja kuba mu muntu muguya, waire okuba mu oyo eyafuuka omwiru w’ekibi. 5Omuntu yeenayeena omutukuvu yeefuga era yeesamba abantu abaguya. Yeeghala abo abaleeta ebidhuubo eby’ekisiru, era tawulira miraala nga ghaligho ebikolwa ebitali bya butuufu.
Katonda amanha bye tuja okwogera
6Amagezi mwoyo era gabisa bukalamu abantu. Aye tigasonigha muntu yeenayeena avuma Katonda, kuba Katonda amanha buli muntu ekimuli mule mu mwoyo era yaawulira na buli kibono ky’ayogera. 7Nga bwekiri nti Omwoyo gwa Musengwa gubunie ensi yoonayoona era gwagemerera ebintu byonabyona, Musengwa oyo amanha buli kibono abantu kye boogera. 8Kale ghazira muntu yeenayeena ayogera kibi ni kitamanhibwa, ekiseera kija kutuuka afune ekibonerezo ekimujaamu. 9Abantu abatatya Katonda buli kye bategeka kirinoonerezebwaku. Musengwa aliwulira buli kibono kye boogera, olwo baafuna ekibonerezo ekigwanira ebibi byaibwe. 10Katonda awuliza buli kantu ng’oti n’omuntu ow’ensaalwa, kale ozira bw’omugisa kwemuluguunhia kwo. 11Kale weekuumenga olobe kwemuluguunhia, waire okwogera ebisongovu. Ebyo ghazira kye bikugasa, kuba kiisi ky’oyogera waire nga kya mu kyama inho tikiribulaku bikivaamu. Era okwogera eby’obuguya kuja kuzikiriza omwoyo gwo.
Katonda ti n’eyatonda okufa
12Oteereeteranga mwene kufa ng’okola ebibi. 13Katonda ti n’eyaleeta okufa, era ebintu ebiramu bwe bifa tasangaala naire.1:13: Ezek 18:32; 33:11; 2 Esid 3:7; 2 Pet 3:9 14Yatonda ebintu byonabyona nga bya kubangagho ekiseera kyonakyona nga biramu bukalamu, nga birungi era nga biziramu kiita. Bwenebwene okufa tikufuga nsi eno, 15kuba obutuufu bwa Katonda tibuja kuwaagho.
16Abantu abatatya Katonda n’abeereetera beene okufa olw’ebyo bye boogera ni bye bakola. Beesumba okubona okufa ng’oti n’ole bwe yeesumba okubona ku mugonzi we. Baamala baataagho n’enkolagana n’okufa okwo, era mu nsambo eyo baaba ng’eky’okufa n’ekibagwaniire.1:16: Nsa 8:36; Isa 28:15; Sir 14:12