9
Olugendo okuja e Ragesi
1Agho Tobia yaayeta Rafaeli yaamukoba ati: 2“Mukagwa Azaria, funayo abagheereza bana n’engamiya ibiri, oje ewa Gabaeli mu kibuga Ragesi. Omughe endagaano ye baakola, asobole okukugha empiiya. Era omale oidhe naye abeegho ku mbaga ey’obugole. 3Oidhi bukalamu nga lata wange ali kubalirira enaku dhe ndi n’okwirirayo eka. Bwe nsobyamuuku obw’olunaku olulala luti, aja kweraliikirira inho. 4Era oidhi Ragueli bwe yalayira ati nze ndi n’okuba nga nkaaliku ghano. Ekyo kye yalayira tisobola kukitakania naire.”
5Agho Rafaeli yaaja e Ragesi mu Media n’abagheereza bana, n’engamiya ibiri. Baaba eyo mu maka ga Gabaeli, era Rafaeli yaagemya Gabaeli oyo endagaano ye baakola. Era yaamukobera ati Tobia omwana wa Tobiti yafumbirwa omukazi, kale nga baali bali kweta Gabaeli oyo abeegho ku mbaga ey’obugole. Agho Gabaeli oyo yaatoolayo obusawo obulimu empiiya, nga n’obumanhiso bwe baabusibaku tibugemwangaku naire. Yaabala obusawo obwo, era baamala baabutwika ku ngamiya.
6Enkyo ku lunaku olwairirira baawuuna, baaja ku mbaga ey’obugole. Bwe baatuuka ewa Ragueli, baayagaana nga Tobia atyaime okulya. Tobia oyo yaasituka, yaalamusa Gabaeli. Gabaeli yeena yaamulamusa ng’ali kulira amaziga, era yaamusabira enkabi ati: “Oli mwana mukalamu era wa mpisa, ng’oti ni lata wo bw’ali omukalamu era ow’empisa. Lata wo oyo musaadha mwesimbu era mugabi. Musengwa ali mu igulu abaghe enkabi, iwe, ni mukazi wo, ni lata wo, era ni mukoirume wo. Katonda agwaine asaakibwenga, kuba ampaire okubona ku mwana wa muganda wange Tobiti amufaananira irala.”