8
Tobia abinga omuzimu omubi
1Ghe baamalira okulya n’okunhwa, olwo nga n’ebiseera eby’okuja okulambaala bituuse. Kale baatwala Tobia mu kisenge kire. 2Tobia oyo yaidhukira Rafaeli bye yamukoba. Agho yaatoolayo omwoyo n’eini eby’ekyenhandha kire bye yatereka mu nsawo ye, yaabita ku bubbaani obuli kunioka. 38:3: Mat 12:43 Okuwunha kwabyo kwabingagho omuzimu omubi, gwalumukira e Misiri.8:3: Misiri: Ekifo ekyo kyalowoozebwanga okuba nga n’ekisingayo mu byonabyona okuba eghala, era nga kirowoozebwa okuba nga n’amaka ag’emizimu emibi. Rafaeli yaagubingirira yaagugema era yaagusiba emikono n’amagulu.
Tobia asaba Katonda
4Abazaire bwe baafuluma mu kisenge ni baigalagho olwigi, Tobia yaava ku buliri, yaakoba Sara ati: “Omugonzi wange, situka tweghembe Musengwa atugemerwe ekisa era atukuume.” 5Sara yaasituka, baatoolera okweghemba Katonda abakuume. Tobia yaasaba ati:
“Wo Katonda wa badhaadha baife, ogwaine osaakibwenga,
n’eriina lyo ligwaine ligheebwenga ekitiisa ebyanda n’ebyanda.
Ebitonde byonabyona mu igulu ni mu nsi
ka bikusaakenga ebyanda n’ebyanda.
6Watonda Adamu era waatonda ni mukazi we Eva,
waamumugha amubeerengaku era amugumyenga.
Mu abo bombi n’omwasimuka abantu boonaboona.
Wakoba oti, ‘Ti kirungi omuntu okubanga yenka.
Ndidha kumukolerayo omubeezi amugwanira.’
7Mpegaano nsazeegho okutwala owoluganda ono lwa kuba ng’ekyo n’ekituufu okukola,
se ti lwa kuba nga mmwegombye bwegombe mu mubiri.
Tukweghembye tugemerwe ekisa,
otughe okukairigha nga tuli ghalala.”
8Bombi baakoba bati: “Amiina.” 9Agho baatenduka obwire obwo.
Abazaire beeraliikirira
Aye obwire obwo, Ragueli yaayeta abagheereza be, yaaja nabo okusima amagombe, 10kuba yakoba mule ati: “Tobia yeena asobola okufa abantu baatuvumirira era baatusekerera.” 11Bwe baamala okusima amagombe, Ragueli yairayo mu ndhu ye, yaakoba mukazi we ati: 12“Tuma owundi ku bairu abakazi abone oba nga Tobia akaali mulamu. Aye bw’aba ng’afiire, tumuziike nga ghakaali na kubaagho amanha.” 13Kale baatuma omwiru omukazi, yaakunaania eitaala, yaaja yaigulagho olwigi, yaingira. Yaabona nga bombi bali kutenduka endoolo enhingi einho. 14Agho yairayo yaabakobera ati Tobia mulamu era ghazira kabi koonakoona kaamutuuseeku. 15Agho Ragueli yaasaaka Katonda ali mu igulu, ng’akoba ati:
Ragueli asaba Katonda
“Wo Katonda waife, tugwaine tukusaakenga n’omwoyo mulala.
Abantu bo ka bakusaakenga,
bakusaakenga ebyanda n’ebyanda.
16Nkusaaka, kuba ondeeteire okusangaala.
Ongemeirwa ekivunika,
ebyo bye mbaire ndi kutya okwidha byaloba kutuukirira.
17Wo Musengwa, ogwaine osaakibwenga,
kuba ogemeirwa ekivunika abaana bano bombi, abazaire baibwe
be bali nabo nga ni bonka bati.
Basaasire era obakuume,
obaleetere okuba n’eisanhu mu bulamu bwaibwe.”
18Agho Ragueli yaalagira abagheereza be okuziikira amagombe bagasaaniegho ng’obwire bukaali kukya.
Embaga ey’obugole
19Ebyo nga biwoire, Ragueli yaakoba mukazi we afumbe emere nhingi. Ate mwene yaaja mu lugo lwe, yaatoolayo ente enume ibiri n’entaama enume ina, yaalagira dhiitibwe. Kale baatoolera okutegeka embaga ey’obugole. 208:20: Mainh 24:55 Era yaayeta Tobia yaamukoba ati: “Ndayiire, toidha kuva ghano okumala enaku ikumi na ina. Oidha kusigala ghano tulye era tunhwe, osanhuseeku mughala wange abairenga mu nnaku einho atyo. 21Ebyo nga biwoire, twidha kugabaniamu ebintu bye ndi nabyo ghabiri otwaleku ekitundu, oireyo miraala ewa lata wo ng’oli mulamu. Ekitundu ekinaasigalagho olikitwala nga nze ni mukazi wange tumaze okufa. Mwana wange, kikakase okuva ni mpegaano nti iwe oli mutabane waife ng’oti ni Sara bw’ali mughala waife ebyanda n’ebyanda. Ekyo otakibuusabuusangamu naire.”