7
Nga bali mu ndhu ya Ragueli
1Olwatuuka mu kibuga Ekubatana bati, Tobia yaakoba ati: “Mukagwa Azaria, ntwala butereevu ewa Ragueli.” Malaika oyo yaamutwala, yaamutuusa ku ndhu ya Ragueli, era baamwagaana ng’atyaime gha mulyango ogwingira mu luya lwe. Beene baasooka okumulamusa, yeena yaabairamu ati: “Bakagwa, nsangaire okubabona. Mwingire era mube bukalamu.”
Agho Ragueli oyo yaabaingiza mu ndhu ye, 2yaakoba mukazi we Edina ati: “Omwisuka ono ng’afaanana inho muganda wange Tobiti!”
3Edina yaababuuza ati: “Bakagwa, muva gha?”
Tobia ni Rafaeli baamwiramu bati: “Tuli Baisiraeli ab’omu kika kya Nafutali. Aye Mpegaano tuli mu bunhage mu kibuga Nineve ekya Assiria.”
4Edina yaabuuza ati: “Mwidhi ow’ekika kyaife ayetebwa Tobiti?”
Bairamu bati: “Yii, tumwidhi.”
Era yaabuuza ati: “Ali atya?”
5Bairamu bati: “Aliyo mulamu era ali bukalamu.”
Era Tobia yaayongeraku ati: “Oyo ni lata wange.” 67:6: Mainh 33:4; 45:14; Luk 15:20 Agho Ragueli yaasitukiramu nga bw’alira amaziga olw’eisanhu, yaagwa Tobia mu kifuba. 7Yaamukoba ati: “Mwana wange, Katonda akughe enkabi. Lata wo musaadha mukalamu era wa kitiisa.” Aye bwe baamukobera bati Tobiti yatulughala, yeevumba Tobia nga bw’alira amaziga olw’enaku, ati: “Kitalo inho omusaadha omwesimbu era omugabi atyo okutulughala.” 8Ni Edina muka Ragueli, ghalala ni mughala we Sara, boona baalira amaziga olwa Tobiti. 9Ragueli yaasangaalira inho Tobia ni Rafaeli, yaabaitira n’entaama enume okuva mu kisibo kye.
Abageni abo bwe baamala okunaaba, era nga bamaze n’okutyama okulya, Tobia yaakoba Rafaeli ati: “Mukagwa Azaria, saba Ragueli ampe owoluganda Sara mmufumbirwe.” 10Aye Ragueli yaawulira Tobia bye yakoba, era yaamukoba ati: “Mwana wange, sooka omale okulya, onhwe, era osangaale obwire buno. Ghazira muntu wundi agwaniire kufumbirwa Sara, era tisobola kumugha muntu wundi kuba niiwe onsikira ni mu kika. Aye ka nkukobere amazima nga bwe gali. 11Sara oyo namughaaku eira abasaadha abatuliku ekika musanvu, nga buli musaadha afiiranga mu bwire bwene obw’embaga, ng’ali kuja buje okuba naye mu buliri. Aye mpegaano mwana wange, iwe lya era onhwe. Musengwa aidha kubayamba mwembi.”
Aye Tobia yaakoba ati: “Tiidha kulya waire okunhwa okutoolaku ng’omaze okusalagho ku nsonga eyo.”
Ragueli yaakoba ati: “Ndidha kukola ntyo. Wuuyo mmukughaire ng’Amateeka ga Musa bwe galagira. Katonda ali mu igulu n’eyakitegeka atyo, Sara oyo asobole okukugheebwa. Kale iwe twala mukazi wo oyo. Okuva n’olwaleero, iwe oli wuwe, yeena yaaba wuwo. Akugheereibwa okuva n’olwaleero okutuusa ebyanda n’ebyanda. Katonda ali mu igulu abakuume mwembi obwire buno era abagemerwe ekivunika abaghe emiraala.”
Omukolo ogw’obugole
12Agho Ragueli yaayeta mughala we. Bwe yaidha, yaamugema ku mukono yaamugha Tobia nga bw’akoba ati: “Wuuno mutwale abenga mukazi wo ng’Amateeka ga Musa bwe galagira. Mutwale omutuuse mu ndhu ya lata wo mu miraala. Katonda ali mu igulu aleetere olugendo lwaimwe okubajiira obukalamu nga muli mu miraala.”
13Agho Ragueli yaayeta mukazi we, yaamukoba aleete olupapula Ragueli oyo aghandiikeku endagaano ey’obufumbo. Edina yaaluleeta, Ragueli yaaghandiika endagaano ekakasa nga Sara agheereibwa Tobia ng’Amateeka ga Musa bwe galagira. 14Omukolo ogwo bwe gwamala okuwa, baatoolera okulya.
15Ragueli yaayeta mukazi we, yaamukoba ati: “Muna, tegeka ekisenge kire ekindi, otwale eyo Sara.”
16Edina yaategeka ekisenge nga Ragueli bwe yamukoba, era yaamala yaatwala eyo Sara. Agho Edina oyo yaalira amaziga olwa mughala we oyo. Yaamala yeeyeya amaziga, yaakoba mughala we oyo ati: “Mwana wange, guma. Musengwa oyo ali mu igulu aidha kukuleetera eisanhu mu kifo ky’enaku. Mwana wange, guma.” Agho Edina oyo yaafuluma.