3
Tobiti asaba Katonda
1Agho naawulira bubi mule naaswala, era naatoolera okusaba Katonda nti:
2“Wo Musengwa, mu byonabyona by’okola oli mutuufu.
Osaasira inho era oli mwesigwa.
Niiwe omulamuzi w’ensi eno.
3Nkweghemba ongemerwe ekivunika,
olobe kumbonereza lwa bibi byange
n’olw’ensobi dhange n’edha badhaadha bange edhitaali mu bugenderevu.
4Olw’okuba baadheemera ebiragiro byo
kye wava n’otulekera abazigu batunhagululeku ebyaife, batutwale mu bunhage era batwite.
Olwo twafuuka eky’okwogerwaku era eky’okuyeeyereza
mu bamaghanga agandi mwe watusansaaniza.
5Oli mutuufu okusalira badhaadha bange omusango olw’ebibi byaibwe,
n’okumbonereza nze olw’ebibi ebyange;
kuba twaloba okugondera ebiragiro byo,
era twaloba okukola ebituufu.
6Kale ni, iwe mbisa nga bw’oyenda.
Twala obulamu bwange omponie ensi eno,
omubiri gwange gwireyo mu itaka;
kuba mpegaano okufa kunsingira okusigala nga nkaali mulamu.
Ndi n’enaku nnene inho
olw’abantu okunvumiranga obwereere.
Wo Musengwa, lagira ntoolebwe mu buzibu bwe ndimu,
ntwalibwe mu kiwuumulo eky’olubeerera.
Otaneegisaaku n’oloba kuwulira kye ndi kukusaba.”
Obuzibu Sara bwe yalimu
7Ku lunaku lwene olwo, mu kibuga Ekubatana eky’e Media mwalimu omukazi eyayetebwanga Sara, eyavumibwa owundi ku bairu abakazi abaalinga abagheereza ba lata we. Lata we oyo yayetebwanga Ragueli. 8Sara oyo yali yaakafumbirwaku emikuzi musanvu, aye nga ku buli mukuzi, omuzimu omubi Asimodeo gwitanga iba nga bakaali na kuba ghalala mu buliri. Kale omwiru omukazi yaakoba Sara oyo ati: “Bona ono omwisi w’abasaadha! Waakafuna baabalo musanvu mulamba, aye ku boonaboona abo kuziraku waire omulala ati eyasigalagho okukugasa. 9Lwaki omalira ku ife obusungu? Lwaki toja weena ni weeyimba ku baabalo abaafa. Tugwananga twaloba na kubona ku mwana iwe y’ozaire.”
10Sara enaku yaamugema inho, yaatuuka n’okwenda okwetuga. Aye yaakoba mule ati: “Ninze omwana zenka ku bbaaba. Kale bwe neetuga ndidha kumuleetera okunhoomebwa mu bukaire bwe obwo okutuusa lw’alingira mu magombe.”
Sara asaba Katonda
11Agho Sara yaayemerera gha dinisa yaasaba Katonda ati: “Wo Musengwa Katonda wange, ogwaine osaakibwenga eriina lyo eitukuvu ery’ekitiisa, ligwaine lisaakibwenga ebyanda n’ebyanda. 12Wo Musengwa, mpegaano amaiso gange galingiriire ku iwe onhambe. 13Lagira nve mu bulamu buno, ndobe kwongera kuwulira bivumo bino. 14Wo Musengwa, iwe okiidhi nga nze tibangaku na musaadha mu buliri. 15Era kasookanga tuba mu bunhage mu nsi eno, nze tyeyonoonangaku, waire okwonoona eriina lya lata wange. Lata wange aziraku mwana wundi wa kumusikira, era ghazira amuliku luganda3:15: amuliku luganda: Kyali mu mpisa edh’Abaisiraeli omuntu okufumbirwa ow’eighanga lye. ye nsobola kufumbirwa. Abasaadha musanvu mulamba abandibaire baabaze, baamala okufa. Olwo kiki ekinsigaza nga nkaali mulamu? Aye bwe kiba nga tikikusanhusa kutwala bulamu bwange, lagira abantu banteemu ekinhagansi era bangemerwe ekivunika, ndobe kwiramu kabiri kuwulira bivumo ebyo.”
Katonda awulira okusaba kwa Tobiti n’okwa Sara
16Tobiti ni Sara bwe baali nga bali kusaba, Katonda yaawulira okusaba kwaibwe ng’ali mu kitiisa kye ekitaloodheka. 173:17: Kub 36:6; Tob 6:10-12 Yaatuma malaika we Rafaeli ye bali abayambe. Yaamutuma okutoola ku maiso ga Tobiti olubwibwi olweru ng’oti mata, asobole okwiramu okubona. Era yaamutuma okubinga omuzimu omubi Asimodeo, guve ku Sara mughala wa Ragueli. Olwo amutegeke afumbiraganwe ni Tobia mutabane wa Tobiti. Tobia oyo n’eyali agwaniire okufumbirwa Sara, kuba yamuliku oluganda. Ekiseera Tobiti kye yaviiramu kuliya naingira mu ndhu ye, n’ekirala kyene ekyo Sara yeena kye yaikiramu amadaala ng’ava mu kisenge ekya ghaigulu eky’endhu ey’ewaibwe mu Ekubatana.