2
Embaga nga ndhizeeyo eka
12:1: Kuv 23:16 Bwe naira e Nineve, nairamu kabiri okubanga aghalala ni mukazi wange Anna, ni mutabane wange Tobia. Agho Ekibinuko eky’Amakungula, era ekyetebwa ekya wiiki omusanvu, kyatuuka. Agho naatyama okulya ekiiwulo ekinhuvu kye banfumbira. 2Bwe nabona ng’emere nhingi inho, naakoba mutabane wange nti: “Mwana wange, ja onoonieyo Muyudaaya munaife yeenayeena omwavu ali ghano e Nineve mu bunhage era agumiire ku Katonda we n’omwoyo gwe gwonagwona, omuleete ghano aidhe alye ku kiiwulo kino eky’ekibinuko ghalala n’ife. Ndidha kuteega oire memale tulye.”
Omuisiraeli atemulwa mu Nineve
3Agho Tobia yaaja okunoonia omwavu y’anaaleeta ku kiiwulo. Aye yaira mangu inho ng’ali kwasiikana ati: “Bbaaba, bbaaba.”
Nze naamubuuza nti: “Kiki mwana wange.”
Yankoba ati: “Omuntu ku b’eighanga lyaife bava kumutemula buti, bamutuze baamusuula mu katale.”
4Agho naasitukiramu, emere naagireka agho nga tigiriireeku naire. Naaja naatoolayo omulambo ogwo, naagutwala naaguta mu ntindi okutuusa ng’endhuba emaze okugwa, olwo nsobole okuguziika. 52:5: Kub 19:11-13 Bwe naira eka naanaaba okwetukuza, memale naalya emere yange ng’enaku engemye. 62:6: Amo 8:10 Naidhukira omulanzi Amosi kye yakoba ab’e Betheli ati:
“Ndifuula ebibinuko byaimwe byaba mikolo gya kulira,
n’enhembo dhaimwe dhaaba kugegenga.”
Agho naalira amaziga.
7Endhuba bwe yamala okugwa, naaja naasima amagombe naaziika omulambo ogwo. 8Ab’oku muliiraano bansekerera nga bakoba bati: “Era toyeganga naire? Olundi baakuyiiga nga benda kukwita lwa kuziika bafu era waalumuka bulumuke okwewonia. Aye era oizeemu kabiri okuziika abafu!”
Tobiti afuuka mutulu
9Obwire obwo nga mmaze okwira y’okuziika omulambo ogwo, naaja naalambaala mu luya gha kimante nga tyebwise mu maiso olw’okuba nali nfuuse atali mulongoofu. 10Nali tiidhi nti enkazaluya dhaali ghaigulu ku kimante ekyo. Kale saabira waadho akaali omusu yangwa ku maiso, gaidhaku olubwibwi olweru ng’oti mata. Agho naadaagiranga mu bayigha kamaala aye yaabulayo amponia. Ahikari yandabiriranga okutuusa lwe yaja mu Elimai.
Okusoola ghagati gha Tobiti ni Anna
11Ahikari bwe yaja, olwo mukazi wange Anna yaaba ng’ali n’okukola okusobola okufuna empiiya. Kale yaakolanga ogw’okuluka engoye ng’oti n’abakazi abandi kamaala bwe baakolanga. 12Abantu baamusasulanga ng’abaghaire engoye dh’amaze okubalukira. Olundi, abo be yalukira engoye baamusasula era baamala baamughaayo n’embuzi entototo.
13Ana bwe yagituusa ghaka yaameera. Nze naamweta naamubuuza nti: “Embuzi eyo eviire gha? Otaba ng’ogiibye! Giizeeyo ye beene yo, kuba ti kituufu kulya biibe.”
14Yandhiramu ati: “Be nalukiire engoye n’abagimpaire ng’ekirabo nga bongereza ku mpiiya dhe bansaswire.” Aye nze naaloba kwikiriza naire, naamunenia era naamukoba agiizeeyo ye beene yo. Agho mwene yandhiramu ati: “Ebintu byo bye watoolanga okuyamba abandi byakufiira ki? N’ebirungi bye wakoleranga abandi byakugasa ki? Anti weeyeta okuba omumanhi einho!”