14
Amagezi Tobiti ge yasembayo okugha Tobia
1-2Tobiti ghe yafuukira omutulu yali agheza emyaka nkaaga n’ebiri egy’obukulu (62). Aye bwe yairamu okubona, ebintu byairamu okumujiiranga obukalamu. Yairamu okugabiranga abaavu, era yeeyongeranga okusaakanga Katonda n’okukoberanga abantu nga Katonda oyo bw’ali ow’ekitiisa era omukologho. Agho Tobiti oyo yaafa bukalamu ng’agheziiza emyaka kikumi na ikumi n’ebiri (112) egy’obukulu, era baamuziika e Nineve mu kitiibwa ekibitirivu einho.
3Tobiti bwe yali ng’ali kumpi okufa yaayeta mutabane we Tobia, yaamukoba ati: 414:4: Neh 1:2—3:19 “Mwana wange, twala abaana bo oje mangu e Media, kuba ndidhi ng’ekibonerezo Katonda kye yalangirira ku Nineve ng’abita mu mulanzi Nahumu kiri kumpi okutuukirira. Ebintu byonabyona abalanzi ab’omu Isiraeli, Katonda be yatuma, bye baayogera ku Nineve ni ku Assiria bija kutuukirira. Ezira kibono waire ekirala kiti kye baayogera ekitalituukirira ekiseera kyakyo nga kituuse. Nkakasa nga nziramu na kubuusabuusa, nga byonabyona Katonda bye yayogera biri n’okutuukirira. Kale kiriba kyangu okuwonera mu Media, okusinga bwemuliba mu Assiria oba mu Babiloni.
“Abazigu balisansaania Bayudaaya banaife boonaboona abaliba mu Isiraeli. Balibatoola mu nsi eyo engimu, baabatwala mu bunhage. Ensi eyo Isiraeli yoonayoona erisigala agho etyo ng’eri bwa bifulukwa byereere, n’ebibuga Samaria ni Yerusalemu byona byasigala bw’agho bityo nga biziramu bantu. Eisinzizo lya Katonda balirikunaaniaku omuliro lyaya lyonalyona, era lyasigala nga liri byanhe byereere okumala entangama. 5Aye Katonda aliiramu okugemerwa abantu be ekivunika yaabaiza mu nsi Isiraeli, baazimba eisinzizo baaliizaagho. Aye tiririba lya kitiisa inho ng’oti ni lire eryasooka, okutuusa ekiseera ekituufu nga kituuse. Memale olwo Abaisiraeli boonaboona baava mu bunhage era baazimba ekibuga Yerusalemu, baakiizaagho mu kitiisa kyakyo nga bwe kyalinga eira. Era balizimba mu Yerusalemu omwo eisinzizo lya Katonda, baaliizaagho ng’abalanzi ba Isiraeli bwe baalanga.
6“Olwo amaghanga goonagoona ag’oku nsi galiira ye Katonda gaamusinza n’omwoyo omulala, gaava ku bifaananie ebyagatwaliriza ni bigaleetera okusinza ebitali Katonda. 7Amaghanga ago galisaaka Katonda oyo abaagho ebyanda n’ebyanda, era gaakola ebyo by’agalagira okukola.
“Mu kiseera ekyo, Katonda alirokola abantu ba Isiraeli boonaboona abaali abeesigwa y’ali, yaabasolokeza ghalala baaba e Yerusalemu. Olwo yaabagha ensi ya Aburahamu eyo, baagibangamu mu miraala ebyanda n’ebyanda. Abo boonaboona abagonza Katonda n’omwoyo omulala balisagamba. Aye aboonooni abatakola mazima balimalibwagho ku nsi.
8“Kale ni baana bange, mujiirenga ku bye ndi kubagalagira. Musinzenga Katonda n’obwesigwa era mukolenga ebyo ebimusiimya. 9Mukubirizenga abaana baimwe okukolanga ebituufu, nga bagabira abaavu era nga beemalira ku kusaakanga Katonda n’omwoyo omulala. 10“Mwana wange Tobia, va ghano mu Nineve. Otageza kusigala ghano. Olulimala okuziika inhoko okumpi ninze oti, ng’oja. Tosulanga bwire bundi mu kiketezo kyonakyona eky’ekibuga kino, kuba abantu baamu baawaamu ira ensoni, baasigalira kukola bibi, na kuguyaguya. Idhukira Nadabu kye yakola Ahikari eyamukuza era eyali muganda wa lata we mwene. Yagezaaku okumwita, ekyo kyaleetera Ahikari oyo okuja okwekweka mu magombe. Aye Katonda yaamusasulamu Nadabu ekikolwa kye ekyo ekibi. Yaamusindika mu nzikiiza ey’olubeerera. Ahikari yaawona omutego Nadabu gwe yamutega okumwita, kuba Ahikari oyo yagabiranga inho abaavu. Aye Nadabu yaagwa ku mutego ogwo ogw’akabi, gwamuzikiriza.
11“Kale ni baana bange, mumaze okubona ebirungi ebiva mu kugabira abaavu era mwabona ng’okufa n’okuteegereire abo abatakola mazima. Aye mpegaano, nze obulamu bwange buli kuwaagho.”
Agho baalambaaza Tobiti oyo ku buliri bwe, yaafa, baamuziika mu kitiibwa ekibitirivu einho.
12Nga ghabiseeghooku akaseera, ni muka Tobiti oyo yeena yaafa era baamuziika kumpi n’iba oyo. Agho Tobia ni mukazi we n’abaana baibwe, baaja mu Ekubatana eky’e Media baaba eyo ghalala ni Ragueli lata wa muka Tobia oyo. 13Tobia yaalabirira Ragueli oyo ni Edina mu myaka gyaibwe egy’obukaire, ng’abataamu inho ekinhagansi. Bwe baafa yaabaziika mu Ekubatana. Era Tobia yaasikira ebintu bya Ragueli oyo, ng’oti ni bwe yasikira ebya Lata we Tobiti.
14Tobia yaaghangaala nga wa kitiibwa, era yaafa ng’agheziiza emyaka kikumi na ikumi na musanvu (117) egy’obukulu. 15Yaja okufa ng’amaze okubonaku ku kuzikirizibwa kwa Nineve, era ng’aboine ni ku bantu kyabazinga Kyasare ow’e Media be yatwala nga banhage. Tobia oyo yaasaaka Katonda olw’ensambo Katonda oyo ye yabonerezaamu ab’e Nineve n’ab’e Assiria. Era ekiseera kyonakyona kye yamala nga mulamu, yaasagamba olw’ebyo ebyatuuka ku Nineve era yaasiima Musengwa oyo.