13
Olwembo lwa Tobiti olw’okusaaka Katonda
1Agho Tobiti yaakoba ati:
“Katonda omulamu ebyanda n’ebyanda, asaakibwenga,
kuba n’afuga abantu boonaboona ense n’ense.
2Atubonereza era yaamala yaatusaasira.
Atusindika e magombe ere ghansi yeene mu itaka,
era yaamala yaatukukunulayo eyo mu lwina olutakoma.
Ghazira asobola kuwunuka ngalo dhe.
3Imwe abantu Abaisiraeli, mumusaakire eyo mu maghanga
ye yabasansaaniza.
413:4: Isa 63:16; Yer 3:4; Mag 14:3; Sir 23:1, 4; Mat 6:9 Era n’eyo yoona yeeyolekerayo nga bw’ali omukologho.
Mumusaakirenga mu bantu boonaboona abalamu,
kuba oyo ni Musengwa Katonda waife,
era oyo n’iseife ebyanda n’ebyanda.
5Waire ababonereza olw’ebibi byaimwe,
aye kabiri alibasaasira,
yaabasolozaayo eyo mu maghanga goonagoona ye yabasansaaniza.
6Bwe mwira y’ali n’omutima gwaimwe gwonagwona
era n’omwoyo gwaimwe gwonagwona,
ni mukola ebituufu mu maiso ge,
yeena aliira ye muli yaabayamba,
era yaaloba kwirayo kubeegisaaku.
Kale ni mwefumintirize ku ebyo bye yabakolera,
mumusiime nga muleekaanira ghaigulu.
Musaake Musengwa ow’obutuufu,
mugulumize Kyabazinga afuga ebyanda n’ebyanda.
[Nze mmusiima waire nga ndi eno mu bunhage mu nsi etali yange,
era naakobera eighanga lino ery’aboonooni nga bw’ali
ow’amaani era ow’ekitiisa:
Naabakoba nti, ‘Boonooni imwe, mukyuke mwire y’ali mukole ebituufu
mu maiso ge,
oba katyo anaabasiima yaabasaasira.’
7Aye nze nsaaka Katonda wange,
era zeenazeena naasagamba olwa Kyabazinga oyo ow’eigulu.
8Abantu boonaboona ka boogere ku bufuzi bwe obukologho,
era bamusaake mu Yerusalemu.
913:9: Isa 60:1-22; Kwol 21:9—22:5 Iwe Yerusalemu ekibuga ekitukuvu,
Katonda alikubonereza olw’ebibi by’abantu bo.
Aye aligemerwa ekivunika abo boonaboona abakola ebituufu.
10Kale ni siima Musengwa kuba mulungi.
Saaka Kyabazinga oyo afuga ebyanda n’ebyanda,]
kuba eisinzizo lye liriiramu okuzimbibwa mu iwe.
Olwo yaaleetera abantu bo abali mu bunhage okusangaala,
era yaatuusa okugonza kwe ku nse n’ense edh’abantu bo abadaazibwadaazibwa.
11Iwe Yerusalemu, obutangaavu bwo buja kwakira ensi yoonayoona.
Amaghanga kamaala ag’eghala galiidha mu iwe
abantu b’omu biketezo ebisembayo okuba eghala einho mu nsi baliidha okusinza
Katonda wo.
Baliidha nga basagaatiriire ebirabo mu ngalo eby’okugha Kyabazinga oyo ow’eigulu.
Abantu ab’ense n’ense baliidha okusaaka mu nguudo dho nga basagamba.
Iwe ekibuga Katonda kye yalondamu, eriina lyo lija kwidhukirwanga ebyanda n’ebyanda.
12Abo boonaboona abakwogeraku obubi bakolimirwe.
N’abo boonaboona abakughangula ni bamenhamenhagho ebimante byo n’ebituuti byo
ebirengererwaku,
era ni bakunaania omuliro ku ndhu dho, bakolimirwe.
Aye abo boonaboona abakugha ekitiisa banaabanga ba nkabi.
13Kale ni Yerusalemu sagamba olw’abantu bo abakola ebituufu,
kuba Musengwa alibasolokeza ghalala okuva mu bunhage,
baamusaaka oyo Musengwa ow’ebyanda n’ebyanda.
14Ba nkabi abo abakugonza,
ni basagamba olw’okubona ng’ebintu biri kukujiira bukalamu.
Era ba nkabi abo abakulirisaaku mu nnaku yo
olw’okudaazibwadaazibwa kwo;
kuba balisagambira ghalala n’iwe,
baabona ekitiisa kyo ebyanda n’ebyanda.
15Nsaaka Musengwa n’omwoyo gwange gwonagwona,
oyo Kyabazinga omukologho;
16kuba Yerusalemu baliiramu okukizimba buyaaka,
kibenga ekifo mw’aba ebyanda n’ebyanda.
Yerusalemu, bwenebwene ndisangaala,
baidhukulu bange abaliwonagho bwe balibona ku kitiisa kyo,
ni basiima Kyabazinga ow’eigulu.
Emiryango gyo baligizimbisa amabaale ag’omughendo ageetebwa saffiro, n’agandi
ageetebwa emeraludo.
N’ebisenge byo byonabyona balibizimbisa amabaale nga goona ga mughendo.
Ebituuti byo ebirengererwaku balibizimba mu zaabu.
17Enguudo dho balidhaaliriramu amabaale ag’omughendo einho.
18Mu miryango gyo muliidhulamu abemba enhembo edh’okusagamba,
ni mu ndhu dho abantu balireekaana bati,
‘Musaake Musengwa!
Musaake Katonda wa Isiraeli!’
Abo ab’enkabi banaasaakanga Katonda oyo ebyanda n’ebyanda.”
Agho Tobiti yaakanza agho olwembo lwe olw’okusaaka Katonda.