12
Malaika Rafaeli
1Embaga ey’obugole bwe yagha, Tobiti yaayeta mutabane we Tobia yaamukoba ati: “Mwana wange, bona nti osasula omusaadha ye waja naye, era oteerabira na kumwongereraku kasiimo.”
2Tobia yaabuuza ise ati: “Bbaaba, olowooza mmusasule bungi bwaga gha? Nze mbona nga tyandifiireyo naire okugabaniamu aghabiri ebintu bye twaleeta, ni mmughaaku ekitundu. 3Omusaadha oyo yandhiza eka bukalamu nga ndi mulamu. Era n’eyaja ewa Gabaeli yaatoolayo empiiya, yaamala yaabinga omuzimu omubi ku mukazi wange. Era wuuyo n’akuwoniiza obutulu. Kale mmwongerereku kasiimo kaaga gha?”
4Tobiti yairamu ati: “Gabaniamu ghabiri ebintu bye yakuyambaku okuleeta, omugheeku ekitundu kuba ekyo kimugwaniire.”
5Kale Tobia yaayeta Rafaeli yaamukoba ati: “Ka tugabaniemu ghagati otwale ekitundu ku bintu byonabyona bye wanhambaku okuleeta, kibe ng’empeera yo y’okoleire. Ka nkusiibule, tuuka bulungi eka.”
6Agho Rafaeli yaabeeta bombi baire gha mbali, yaamala yaabakoba ati: “Musaake Katonda era mukobere abantu boonaboona bw’abakoleire imwe ebirungi, olwo boona bamusaake. Mutalekera kumusaaka naire.
7“Kiba kirungi okukuuma ekyama kya kyabazinga. Aye Katonda by’akola bigwaniire okukoberwa abantu boonaboona, bamusaake era bamuteemu ekitiisa.
“Bwe mukola ebirungi, ezira kabi kalibatuukaku.
812:8: Sir 29:8-13 “Okusaba Katonda kuba kulungi nga kujiiriireku okusiiba, okugabira abaavu, n’okukola ebituufu. Okuba n’akatono aye ng’okola ebituufu kusinga okuba omukombe aye ng’oli mukupankupania. Okugabira abaavu kusinga okweterekera zaabu. 912:9: Nsa 11:4; Dan 4:27; Sir 3:30 Okugabira abaavu kulokola omuntu yaawona okufa, era kwamunaazaaku ebibi bye byonabyona. Abo abagabira abaavu era nga bakola ebituufu, baliba n’obulamu obukalamu. 10Aye abo abakola ebibi n’ebikyamu, baba bazigu eri obulamu bwaibwe beene.
11“Namaze ira okubakobera nti kiba kirungi okukuuma ekyama kya kyabazinga, aye Katonda by’akola bigwaniire okukoberwa abantu boonaboona. Mpegaano ni nja kubakobera amazima goonagoona aghazira kubagisaamu naire. 1212:12: Yob 33:23-24; Bik 10:4; Kwol 8:3-4 Mukagwa Tobiti, iwe ni Sara bwe mwasaba Musengwa, nze mwene ninze nayandhula bye mwasaba eri Musengwa oyo ng’ali mu kitiisa kye. Mu nsambo n’endala eyo, ninze namwandhuliranga ebyaligho buli lwe waziikanga abafu. 13Ni ku lunaku lule lwe wasitukiramu n’ova ku kiiwulo ng’okaali na kulya n’oja okuziika omufu ole, Katonda ninze ye yatuma okukuleba. 14Aye era Katonda oyo yantuma okukuwonia iwe n’okubinga omuzimu omubi ku Sara mukaamwana wo. 1512:15: Zek 4:10; Luk 1:19; Kwol 8:2 Ninze Rafaeli, owundi ku bamalaika omusanvu ababa agho nga beetegefu ekiseera kyonakyona okugheereza Musengwa mu kitiisa kye.”
16Agho entiisa yaagema Tobiti ni Tobia, baakuba amakiryaivu era baakutama n’ebyeni byatuuka ku itaka nga bali kudhugumira. 17Aye Rafaeli yaabakoba ati: “Mutatya. Emiraala gibe n’imwe. Musaakenga Katonda ebyanda n’ebyanda. 18Nze bwe naidha okuba aghalala n’imwe, tyaidha lwa kubanga nze kye nayenda, aye lwa kuba Katonda n’eyayenda ndidhe mbayambe. Kale ni mumusaakenga buli kaakyeire, era mwembenga enhembo okumusiima. 19Imwe bwe mwambonanga mwalowoozanga muti ndya era naanhwa, aye nga busa naire. Tyalyanga waire okunhwa ekintu kyonakyona. Okwo kwabanga kwefaanaaniriza bwefaanaanirize. 20Kale ni nga mukaali ku nsi kuno musaakenga Musengwa Katonda era mumusiimenga. Mubone, buti ndi kwirayo eri oyo eyantuma. Mughandiike ebyo byonabyona ebibatuseeku.”
21Agho Rafaeli yaaniina ghaigulu yaabulirayo. Tobiti ni Tobia baasituka baayemerera, aye nga tibakaamubona. 22Baatoolera okusaaka Katonda n’okwemba enhembo edh’okumusiima, olw’ebyewuninkiriza ebyo byonabyona bye yabakolera nga malaika we Rafaeli ali ghalala nabo.