11
Olugendo olw’okwirayo eka
1Bwe baatuuka okumpi n’ekibuga Kaserini okwolekera Nineve, 2Rafaeli yaakoba Tobia ati: “Oidhi embeera lata wo ye yalimu lwe twavaayo. 3Kale ife ka tulumukeku twesookengayo nga mukazi wo akaaliku einhuma, tusobole okutegeka endhu mw’anaatuukira ghalala n’abantu abandi.” 4Bwe baali bali kuja, Rafaeli yaakoba Tobia ati: “Akaka ak’ekyenhandha idha nako.” Embwa ya Tobia yaaja ng’ebavaaku einhuma.
5Mu kiseera ekyo, Anna yali atyaime ng’alingiriire obutatemya, engira omwana we ye yali ow’okwidhiramu ng’aira. 6Olwamulengera ati ng’ali kwidha, yaakoba Tobiti lata we ati: “Bona ere, mutabane wo wuule ali kwidha ghalala n’omusaadha ye yaja naye!”
7Tobia bwe yali ng’akaali kutuuka aghali lata we, Rafaeli yaamukoba ati: “Ndidhi nga lata wo aja kwiramu okubona. 8Iwe musiige busiige akaka ak’ekyenhandha ku maiso ge. Olubwibwi olweru ng’oti mata olugaliku lwidha kukala lukakampuke lugaveeku. Olwo airemu okubona.”
9Agho Anna yaalumuukirira mutabane we oyo, yaaja yaamugwa mu kifuba ng’akoba ati: “Mwana wange, mpegaano nga bwe mmaze okukubonaku, tifaayo ni bwe nfa.” Era yaalira amaziga olw’eisanhu.
Tobiti awonezebwa
10Agho Tobiti yaasituka, yaamaamanta ng’abitira mu mulyango ogufuluma mu luya, ng’ali oti aja kugwa. Tobia yaaja y’ali, 11ng’agemye akaka ak’ekyenhandha. Yaamugemaku alobe kugwa, era yaamufuuwa ku maiso ng’akoba ati: “Lata, guma!” Yaamusiiga akaka ku maiso, 1211:12: Bik 9:18 yaabisaaghooku akaseera. 13Memale yaagakakampulaku olubwibwi olwagaliku olweru ng’oti mata, ng’aviira ku nsonda dhaago. Agho Tobiti yaagwa mutabane we oyo mu kifuba, 14era yaalira amaziga nga bw’amukoba ati: “Mwana wange, ndi kukubona. Mu iwe amaiso gange mwe gabonera obutangaavu!” Era yaayongera okukoba ati:
“Katonda asaakibwenga,
n’eriina lye eikologho lisaakibwenga,
ni bamalaika be boonaboona abatukuvu basaakibwenga.
Eriina lye eitukuvu lisaakibwenga ebyanda n’ebyanda,
15kuba waire yali andeeteire okutulughala,
amaze yansaasira era mpegaano ndi kubona omwana wange.”
Agho Tobiti yaingira mu ndhu ng’ali kusagamba era ng’ali kuleekaanira ghaigulu ng’asaaka Katonda. Mutabane we Tobia yaamala yaamukobera ng’olugendo lwe bwe lwamujiira obukalamu einho, n’asobola okuleeta empiiya dhire, era n’afumbirwa ni Sara mughala wa Ragueli. Era yaamukobera nga Sara oyo bwe yali akaali mu ngira, ng’ali kumpi okutuuka ku mulyango ogwingira mu kibuga Nineve.
Sara atuuka
16Agho Tobiti yaaja okusangaaza mukaamwana we ku mulyango ogwingira mu kibuga Nineve, ng’ali kusagamba era bw’asaaka Katonda. Ab’omu Nineve bwe baamubona beewuunhia inho, kuba yali ali kwetambuza mwene nga ghazira naire amugemye ku mukono. 17Tobiti yaakakasa abantu boonaboona nga Katonda bwe yamugemerwa ekisa n’amuleetera okwiramu okubona.
Tobiti oyo bwe yatuuka aghali Sara, yaamusabira enkabi ng’akoba ati: “Mwana wange, tusangaire okukubona. Katonda akuleese ye tuli asaakibwenga. Katonda oyo aghe lata wo enkabi, adhighe ni mutabane wange Tobia, era adhighe ni mwene iwe mwana wange. Tusangaire okukubona mu maka go amayaaka. Ka tusabe ogabeemu ng’oidhwire enkabi n’okusagamba. Ingira mwana wange.”
Ku lunaku olwo ghaabaagho okusagamba mu Bayudaaya boonaboona ab’omu Nineve. 18Ni Ahikari era ni Nadabu abaana ba baganda ba Tobiti oyo, boona baidha okusagambira ghalala naye. Baakola embaga ey’obugole obwo okumala enaku musanvu, era baagha abagole ebirabo kamaala.