10
Tobiti ni Anna beeraliikirira
1Buli lunaku Tobiti yaajanga ng’abalirira enaku omuntu dh’atwala okuja e Ragesi n’okwira. Enaku edho bwe dhaabita nga mutabane we akaali kwira, yaakoba ati: 2“Kiki ekikaamusigaiza eyo? Oba katyo nga Gabaeli yafa, ghaaba nga ghaziragho muntu asobola kumugha mpiiya!” 3Tobiti yaatoolera okweraliikirira.
4Mukazi we Anna yaakoba ati: “Omwana wange yafa, takaabalirwa mu balamu.” Yaatoolera okukuba empungu, era yaalira amaziga ng’akoba ati: 5“Nkagwireku nze! Wo mwana wange, lwaki nakuganha okuva ghaka n’oja, ate nga mu iwe amaiso gange mwe gabonera obutangaavu?”
6Aye Tobiti yaagezaaku okumugumya ati: “Omugonzi wange, sirika era oteeraliikirira. Tobia aliyo mulamu. Oba katyo ghaligho ebyagwagho obugwe ebikaabalwisaayo. N’ekindi, omusaadha ye yaja naye mwesigwa era atuliku oluganda. Kale otamweraliikirira ali kumpi kwira.”
7Aye mukazi we yaamwiramu ati: “Sirika, lekera agho okumbuzaabuza. Omwana wange yafa.” Kale buli lunaku yaasitukanga, yaaja okulingirira engira omwana we ye yagema ng’aja, era yaaloba kuganha muntu yeenayeena kumusaasiraku nnaku. Obwire bwe bwazibanga yaira eka, yaaliranga amaziga era yaawowoolanga obwire bwonabwona aghazira kutenduka ku ndoolo.
Tobia ni Sara bava mu Ekubatana
Enaku eikumi n’eina Ragueli dhe yakoba okukoleramu embaga ey’obugole bwa mughala we bwe dhaawaaku, Tobia yaaja eri Ragueli oyo yaamusaba ati: “Isebo, nganha ndhireyo eka, kuba nkakasa nga mpegaano lata ni maama balowooza bati tibakairayo kumbona kabiri. Kale ni isebo, nkweghembye ndeka ndhireyo ye lata kuba era namala ira n’okukukobera embeera ye namulekamu.”
8Aye Ragueli yairamu ati: “Mwana wange, sigala ghano. Sigala ghano ninze. Ndidha kutuma abakwenda ye lata wo bamukobere bati oli bukalamu.” 9Aye Tobia yaakoba ati: “Busa. Nkweghembye nganha ndhireyo ye lata wange.”
10Agho Ragueli yaalekera agho okulwisa Tobia, yaamugha mukazi we Sara. Era Ragueli yaagabaniamu ghabiri ebintu bye byonabyona bye yali nabyo, yaatoolaku ekitundu yaakigha Tobia: nga n’omuli abairu abasaadha n’abakazi, ente, entaama, endogoyi, engamiya, ebivaalo, empiiya, n’ebintu eby’omu ndhu. 11Yaabaleka baje miraala. Yaagwa Tobia mu kifuba, yaakoba ati: “Mwana wange, ka nkusiibule. Mutambule bukalamu. Musengwa ali mu igulu aleetere ebintu okubajiiranga obukalamu iwe ni mukazi wo Sara. Zeena mpangaale mbone ku baana baimwe.” 12Era yaagwa ni mughala we Sara mu kifuba. Yaamukoba ati: “Mwana wange, otanga ekinhagansi mu bainhazaala bo bombi, omusaadha n’omukazi kuba okuva ni mpegaano boona bafuuse bazaire bo, nga nze n’inhoko bwe tuli. Ja miraala, era nhenda nkuwulirengaku birungi byereere mu kiseera kye nnaamala nga nkaaligho ku nsi.” Bwe yamala okubasiibula, yaabaleka baje.
Agho Edina yaakoba Tobia ati: “Mwana wange iwe omugonzi, Musengwa ali mu igulu akutuuse bukalamu eka. Zeena mpangaale mbone ku baana baimwe nga nkaali kufa. Nkugemya mughala wange nga ni Musengwa ali kubona. Otamuleeteranga kunakughala waire olunaku olulala luti mu bulamu bwo. Ja miraala, mwana wange. Okuva ni buti, Sara oyo ni mukazi wo omugonzi, nze ndi inhoko. Ka tusabe ebintu bitujiirenga bukalamu enaku dhoonadhoona edh’obulamu bwaife.” Agho Edina yaabanhwegera bombi, yaabaleka baje.
13Tobia yaava ewa Ragueli nga musangaavu era ng’ali kusagamba. Yaasaaka Musengwa ow’eigulu n’ensi era kyabazinga ow’ensi dhoonadhoona, kuba yaleetera olugendo lwe okumujiira obukalamu. Yaamaliriza ng’ayendeza Ragueli ni mukazi we Edina enkabi. Era yaakoba ati: “Musengwa andagiire okubatangamu ekinhagansi enaku dhoonadhoona edh’obulamu bwange.”