EMBALUWA PAULO YE YAGHANDIIKIRA
TITO
Enhandhula
Tito ataali Muyudaaya yaikiriza okufuuka Omukurisito, yaafuuka omukozi mwine wa Paulo era omubeezi we mu mulimo gwe ogw’okuja ng’akobera abantu Amawulire Amalungi. Embaluwa Paulo ye yaghandiikira Tito yagigheereza omubeezi we oyo omuto eyali ng’ali e Kurete, ye yali amulese okulabirira omulimo ogw’Ekikunsu eky’Abaikiriza mu Kurisito. Embaluwa eno eyogera ku bintu ebikulu bisatu ebyetaaga okulowoozaaku.
Ekisooka, eidhusa Tito eneebisa ey’abakulembera Ekikunsu eky’Abaikiriza mu Kurisito ye bateekwa okwebisaamu. Ekyasinga okumwidhukizisa bino n’eneebisa embi ab’e Kurete kamaala ye beebisangamu. Ekyokubiri, Tito agheebwa amagezi bw’abe ayegeresengamu ebikunsu eby’endhawulo eby’omu Kikunsu eky’Abaikiriza mu Kurisito. Mu bino nga n’omuli eky’abasaadha abakulu, eky’abakazi abakulu (bano nga n’abaali n’ogw’okwegeresa abakazi abaali abakaali abato), eky’abasaadha abakaali abato, n’eky’abairu.
Ekyokusatu, omughandiisi agha Tito amagezi agagema ku neebisa ey’Ekikurisito n’okusingira irala eky’okuba n’emiraala, okugonza, n’okwesamba okukyaghagana n’okutakanatakana n’okwekutulakutulamu mu Kikunsu eky’Abaikiriza mu Kurisito.
Ebirimu nga bwe biiraganwaku
Enhandhula 1:1-4
Abakulu b’Ekikunsu eky’Abaikiriza mu Kurisito 1:5-16
Emirimo gy’ebikunsu eby’endhawulo ebiri mu Kikunsu eky’Abaikiriza mu Kurisito 2:1-15
Okulamba n’okulabula 3:1-11
Okufundikira Embaluwa eno 3:12-15