6
Abakazi
1Mukazi iwe asinga obulungi mu bakazi boonaboona,
omugonzi wo ajiire gha,
tukubeereku okumunoonia?
Omukazi
2Omugonzi wange ajiire mu nimiro ye
omuli obuwoowo obw’omu mere.
Ajiire kwayira eyo ebyayo bye
n’okusolozaayo ebimuli ebyetebwa liri.
3Omugonzi wange oyo, wange, zeena ndi wuwe.
Ayayira ebyayo bye mu bimuli ebyetebwa liri.
Olwembo olwokutaanu
Omusaadha
4Iwe omugonzi wange, oboneka bulungi ng’oti n’ekibuga Tiruza,
oboneka bulungi ng’oti n’ekibuga Yerusalemu.
Ate otiisa ng’oti n’eigye erisitwike okulwana.
5Lekera agho okuuningirira otyo,
kuba amaiso go gampangwire.
Enviiri dho dhiikirira ku mutwe gwo ng’oti n’ekighaso eky’embuzi,
bwe kiikirira ku lusozi Gileadi.
6Amaino go gatukula ng’oti kighaso kya ntaama
dhe baakamala okusalaku obuviiri ni badhinaaza,
ni dhitambula nga dhiri ibiri ibiri,
nga ghazira eziragho.
7Amatama go nga gali mu kitambaala kyo kye weeghembereire,
gaboneka bulungi ng’oti kibala kya ku mukomamawanga, kye basazeemu aghabiri.
8Waire nga kyabazinga ali ni bainhebantu nkaaga (60),
n’abakazi abandi ab’embali kinaana (80),
n’abaghala kamaala nga tibabalika,
9nze omugonzi wange ali mulala yenka omulungi ng’oti njiibwa,
era aziraku ghe yakyama naire.
Oyo n’omwana omughala yenka ku inhina,
era omugonzi einho ku inhina oyo.
Abaghala boonaboona abamubonaku bamwesiimisa,
ni bainhebantu n’abakazi ba kyabazinga abandi ab’embali
boona bamusaaka.
10Nga bakoba bati: “Naani ono ali n’amaiso ng’oti n’endhuba eri kuvaayo,
aboneka obulungi ng’oti mwezi, amesunkana ng’oti kwaka kwa ndhuba,
ate atiisa ng’oti n’eigye erisitwike okulwana.”
Omukazi
11Agho nze naikirira, naatuuka mu nimiro ey’amaido ag’oku muti,
okubona ebibala eby’omu kiiko nga bwe bimuliisa ekimuli,
n’okubona oba nga emizabbibu gitaireku ebituutwa,
era oba nga emikomamawanga gireese ekimuli.
12Naja okweidhuukiriza nga ndi kuloota,
nga ndi mu kigaali eky’omu lutalo ghalala n’omugonzi wange.
Abakazi
136:13 “Ira eno tukulingirireku?” Oba “Kinaku tubone!” Ira eno, iwe omughala Omushulamu,
ira eno tukulingirire ku.
Omukazi
Lwaki mwenda okuuningirira nze Omushulamu,
ng’oti n’abalingirira omukini akinira mu nhiriri edh’abantu
abali kubona bw’akina?