2
1Nze ndi kimuli kya mu nsiko eky’e Sharoni,
ndi kimera ekyetebwa eky’omu biiko.
Omusaadha
2Ng’ekimuli ekyetebwa liri bwe kiboneekerera nga kiri mu mawa,
n’omugonzi wange atyo bw’aboneekerera ng’ali mu bakazi baine.
Omukazi
3Ng’omuti ogw’ebibala bwe guba n’omuganhulo okusinga
emiti egindi egy’omu kibira,
n’omugonzi wange atyo bw’abasinga basaadha baine.
Nnhumirwa okutyama mu kinsense eky’omuti ogwo,
era ebibala byagwo bimpoomera inho.
4Yaanhingiza mu kisenge mwe baliira embaga,
okugonza kwe yandaga kwaba ng’oti ni bendera gye bawuubira
omuntu ow’ekitiibwa.
5Mumpe ku mizabbibu emikalu ndyeku ndhiremu amaani,
munkamulire ni ku bibala nhweku mpulire ku bulamu;
kuba okugonza kwenda bwa kundhita bwite!
6Omukono gwe omugooda aguziziike ghansi agh’omutwe gwange,
ate omukono gwe omusaadha gungemereire.
7Imwe abaghala ab’e Yerusalemu,
ndi kubakoba mulayire empuuli n’empongo edh’omu nsiko,
muti timwidha kutabulatabula, waire okusiikuula okugonza kwaife,
okutuusa nga ife beene twenze.
Olwembo olwokubiri
Omukazi
8Ndi kuwulira amamiro ag’omugonzi wange!
Bona ere, wuule.
Ali kwidha ng’atuumiratuumira ku nsozi enene,
era yaidha ng’adalandira ku busozi obutono.
9Omugonzi wange ali ng’oti mpuuli,
oba ng’oti mpongo nto.
Bona ere, wuule ayemereire kuliya kw’endhu yaife.
Ali kulengeza mu idinisa,
yaabisa amaiso mu katimba kaamu.
10Agho omugonzi wange yaayogera, yankoba ati:
Omusaadha
“Omugonzi wange, situka.
Omulungi wange, idha tuje.
11Bona, ebiseera eby’ekiinhogogo biwoireku,
amaadhi galekeire okugwa gaajiire,
12era buti ebimuli biri buli ghantu.
Ebiseera eby’okwemba bituuse,
enjiibwa odhiwulira nga dhembera mu nsi yaife.
13Emitiini gitooleire okubala,
n’emizabbibu gimuliisa ebimuli,
gyaleeta akawoowo.
Omugonzi wange, situka.
Omulungi wange, idha tuje.
14Oli ng’oti njiibwa eyeegisiisa mu ntanda edheeyatisa mu lubaale,
mu nkompe edhiri mu nsozi.
Leka nkulingirireku mu maiso,
kuba muboneka bulungi.
Era leka mpulire ku mamiro go ng’oyogera,
kuba gawooma okuwulirisa.
15Mutugemere ebibe, 2:15 Ebibe: Kino kisobola okuba nga kitegeeza abasaadha abandi abagezaaku okughangula omukazi oyo bamweirize.
ka bibe bito oba bikulu,
ebyo ebyonoona amasamba gaife ag’emizabbibu;
kuba emizabbibu gyaife gimuliisa ebimuli.”
Omukazi
16Omugonzi wange oyo, wange, zeena ndi wuwe.
Ayayira ebyayo bye mu bimuli ebyetebwa liri.
17Omugonzi wange, kyuka oire,
obe eno ng’oti n’empuuli oba empongo ento bw’eba mu nsozi edh’e Betheli,
okutuusa obwire bwe bunaakya
buli kazikiiza nga kaweereiregho irala.