EKITABO KYA
SIRAKI
(EKELEZIASITIKUSI)
Enhandhula
Kino n’Ekitabo eky’Amagezi ga Yesu Mutabane wa Siraki, era ekyetebwa Ekeleziasitikusi. Omusaadha ayetebwa Yoshua oba Yesu, n’eyakighandiika mu lulimi Oluheburayi, ate mwidhukulu we yaamala yaakivuunula yaakiiza mu Lugureki. Ekitabo kino kirimu ebintu kamaala eby’amagezi g’Ekiyudaaya, n’ebidhuubo ebisemba einho endhikiriza y’Ekiyudaaya, ebyoleka nga Katonda bwe yagha abantu be abo amagezi geene. Era kyogera ku kutya Katonda, ni ku mpisa enkalamu, ni ku bintu eby’omugaso mu bulamu obwabuliidho, nga kikozesa enfumo n’ensambo.
Ebirimu nga bwe biiraganwaku
Okusaaka amagezi (ekitundu ekisooka) 1:1—23:27
a. Ebigema ku mirimo, ni ku mpeera, ni ku kugalagirwa 1:1—16:23
b. Ebigema ku magezi ga Katonda ni ku ngeri abantu ye bagategeeramu 16:24—23:27
Okusaaka amagezi (Ekitundu ekyokubiri) 24:1—50:21
a. Ebigema ku magezi n’empisa enkalamu 24:1—32:13
b. Ebigema ku magezi ga Katonda, n’engeri omuntu y’agwaine okusinzaamu n’okukolamu emirimo 32:14—42:14
c. Ebigema ku kitiisa kya Katonda ekyeyolekera mu bitonde 42:15—43:33
d. Okusaaka badhaadha 44:1—50:21
Ebisembayo n’ebyongeirwaku 50:22—51:30
Ebibono ebikulemberamu
Bintu kamaala eby’omughendo bye twega mu Mateeka, mu Balanzi, ni mu baghandiisi abandi abaaghandiika ebyaligho mu biseera ebyairirira. Tugwaine tusaake Abaisiraeli olw’okugalaga n’amagezi bye tubifunamu. Era abo ababisoma tibagwaine kukoma ku kya kubifunamu magezi kyonka, aye mu bye boogera ni mu bye baghandiika bagwaine babimanhise n’abandi, boona bibaganhule.
Ekyo n’ekyaleetera dhaadha wange Yesu okwewaayo einho okusoma ebitabo eby’Amateeka, n’eby’Abalanzi, n’ebya badhaadha baife ebindi. Bwe yamala okubiinhongoka n’okubikugukamu, ekyo kyamuleetera yeena okughandiika ekitabo ekikye, agabaneku n’abandi amagezi n’ebindi bye yayega. Olwo abo boonaboona abenda okwega basobole okumanha ebintu ebyo, bibayambe okuba ab’empisa enkalamu nga bajiira ku Mateeka bye galagira.
Kale imwe ndi kubakubiriza, musome ekitabo kino bukalamu n’omwoyo ogwenda okwega. Era mbasaba munguminkirize bwe munaayagaana nga ghaligho bye ntaavuunula bukalamu, waire nga nafuba inho nga bwe nsobola okubivuunula obukalamu; kuba ebyaghandiikibwa mu Luheburayi bwe bivuunulwa okubiiza mu lulimi olundi,1:0 Ekitabo kya Siraki kyaghandiikibwa mu Luheburayi, aye ate omughandiisi w’ebibono bino ebikulembera yaakivuunula yaakiiza mu lulimi Olugureki. amakulu gaabyo agandi gasobola okubula. Ekyo ti kiriigho ku kitabo kino kyonka, aye ni ku ky’Amateeka kyene, ni ku by’Abalanzi, ni ku bitabo ebindi. Ebighandiiko bye bakyusiiza okubiiza mu lulimi olundi, byawukanamuuku katono ku ebyo ebyasooka okughandiikibwa mu lulimi abo abakyusiisa mwe babitoire.
Nze naidha e Misiri mu mwaka ogwamakumi asatu n’omunaana (38) ogw’obufuzi bwa kyabazinga Eweregete, naabaayo okumala entangama. Bwe nali nga ndi eyo, naafuna omukisa okusoma einho ekitabo kino, era naabona nga ghaligho obwetaavu okukivuunula obukalamu. Naakozesa amagezi n’obukugu bwe nali nabwo okukivuunula mu bwidhuvu bwakyo, nsobole okukituusa ku bali mu maghanga ag’endha abenda okwega, basobole okufuna amaani ag’okulongoosa empisa dhaibwe nga bajiira ku Mateeka Katonda ge yagha Musa.