9
Okugha amagezi ku bigemagana n’abakazi
19:1: Kub 5:12-15Oteereeteranga ibuba kukugema lwa mukazi wo y’ogonza, kuba oliba omwegereisa engeri y’asobola okukuleetera okulumizibwa. 2Oteetanga mu ngalo dha mukazi n’omuleetera kukufuga. 3Weesambenga abakazi abenzi, olobe kugwanga ku mitego gyaibwe kukugemya. 4Otabitanga na bakazi bembi, kuba tomanha bwe bakusendasenda ni bakugemya. 5Otalingiriranga obutatemya mughala muguna, kuba tomanha bintu bwe bikwonoonekera ni kikuviiramu iwe okubonerezebwa ku lulwe. 6Oteeghanga bakazi bamalaaya, kuba tomanha bw’ofiirwa byonabyona by’oli nabyo. 7Kale otajanga ng’olingalinga mu nguudo dh’ekibuga, waire okutambulatambula eyo otyo mu bufo bwakyo obuziramu bantu. 8Bw’obonanga omukazi aboneka obulungi, olinganga bwa luuyi ere. Otalingiriranga obutatemya bulungi bwamukazi atali wuwo. Ghaligho abasaadha kamaala, obulungi bw’abakazi bebudaaliimya, ekyo kyaleetera okwegomba kwaibwe okukunaana ng’oti muliro. 9Otatyamanga kulya na muka musaadha waire okwesanhusanga naye nga munhwa omwenge, kuba tomanha bw’akutwaliriza mwoyo, olwo okwegomba kwo ni kukuleetera kuzikirira.
Ensambo ey’okwebisaamu n’abantu abandi
10Otalekuliranga agho mukagwa wo ow’eira, kuba ezirayo muyaaka y’oizaagho n’aba ng’oti n’oyo. Omukwano guli ng’oti mwenge gwa mizabbibu, ye gukoma okukula ye gukoma n’okuwooma. 11Oteegombanga bitiibwa bya mwonooni, kuba toidhi nkomerero ye bw’eriba. 12Otanhoonhebwanga bintu ebireetera abatatya Katonda okuba abasangaavu, kuba obulamu bwaibwe bwonabwona baidha kusigalanga nga baliku omusango. 13Weesambenga omuntu ali n’obuyinza obw’okukwita, olwo toidha kweraliikiriranga kukwita. Aye bw’obanga ng’oli n’okuseeta y’ali omwegenderezanga inho, yaaloba kusaaniagho bulamu bwo. Omanhanga bumanhe ng’oli kubita mu mitego, era ng’ekiseera kyonakyona bakugemya.
14Kolanga kyonakyona ky’osobola okumanha baliraanwa bo, era weebuuzenga ku bantu bagezi bonka. 15Oghayanga n’abantu abategeevu, era mukubaganianga ebidhuubo ku Mateeka g’oyo Ali Ghaigulu Yeene gonka. 16Abantu abakola ebituufu b’obe olyenga nabo ku kiiwulo kyo. Era okutya Katonda n’okugwaine kubenga ekintu eky’ekitiibwa y’oli.
Abafuzi
17Ng’ekintu kye bakoze bwekisiimibwa olw’obukugu bw’omugheesi akikoze, n’amagezi ag’omukulembeze goona gatyo bwegabonekera mu mukulembeze oyo by’ayogera. 18Omuntu ayogerayogera obw’eyo atyo abantu b’omu kibuga kye bamutya butye, n’ole alokompoka obw’agabono nga tiyegendereza bamukyagha.