8
Amagezi ag’okwekuuma ebizibu
1Oteesonsanga ku muntu ali mu buyinza, kuba tomanha bw’omugwa mu ngalo. 2Otasoolanga na mukombe, kuba tomanha bw’akozesa bukombe bwe n’akusinga. Zaabu azikiriiza bangi era yaaleetera emyoyo gya bakyabazinga okwonooneka. 3Otatakananga na muntu alokompoka obw’agabono nga tiyeegendereza, kuba oba ng’oti oli kwongera bwa nku ku muliro gwe. 4Otadhondhanga na wa mpisa mbi, kuba asobola okwogera obubi ku badhaadha bo. 5Otavumiriranga muntu ali kwenenia bibi bye. Oidhukiranga nga twenatwena tuli boonooni. 6Otanhoomanga muntu akairiighe, kuba n’abandi ku ife tuli kuja nga tukairigha. 7Otasagambanga lwa kufa kwa muntu yeenayeena, aye oidhukiranga nga twenatwena tuli ba kufa.
8Otanhoomereranga ebyo ab’amagezi bye bakoba, aye weekebeedhenga ensambo dhaibwe dhe boogera, kuba olidhifunamu eby’okwega waasobola okugheereza abantu abakologho. 9Otanhoomereranga ebyo abantu abakaire bye bakoba, kuba ni beene boona baabyegera ku badhaadha baibwe. Era olibifunamu amagezi, waamanhanga eky’okwiramu mu kaseera gh’okyetaagira. 10Otaleeteranga mwonooni kweyongera kukola bibi, kuba tomanha bibi bye bwe bikuleetera bizibu, ng’oti n’omuliro bwe gwokya omuntu ali kugwongeramu enku. 11Otasitukanga n’oja, n’oleka bw’agho muntu yeetwala kuba wa ghaigulu, kuba tomanha bw’afuulaniafuulania by’okobye n’akukyayisa. 12Otayazikanga kintu kyo muntu akusinga. Aye bw’obanga oyaziike ekintu kyonakyona, kitwalenga ng’okifiiriirwa. 13Oteeyimiriranga muntu ku bintu nga bisinga obungi ebibyo by’oli nabyo. Aye bw’obanga weeyimiriire omuntu yeenayeena, banga mwetegefu okubisasula. 14Otawozanga na mulamuzi, kuba iwe ye balisingisa omusango olwa mwene okuba nga muntu mukulu. 15Otabitanga na muntu musirusiru, kuba tomanha bw’akufuukira kizibu n’akolakola eyo atyo ebintu nga bw’ayenda, olwo n’akuleetera weena okufiira aghalala naye mu busiru bwe.
16Otalwananga na wa busungu era otabitanga naye mu kifo kiziramu bantu, kuba nga bw’aziramu ntete naire okwita asobola okukulumba nga muli eyo ezira bantu ba kukuyamba. 17Oteebuuzanga magezi ku muntu musirusiru, kuba tasobola kukuuma kyama ky’omukobeire. 18Aghali omuntu y’otaidhi otakolerangagho kintu ekyandikuumiibwa nga kya kyama, kuba tomanha by’anaayogera. 19Ebikuli ku mwoyo otabimanhisanga buli muntu, okutoolaku ng’oyenda bwa kwemalaku mikisa gyonagyona.