7
Okulamba okw’engeri kamaala
1Bw’otaakolenga kibi, n’ekibi kyona tikiidhanga kukwidhira, 2era bw’onaakyesambanga tikiidha kuseetanga gh’oli. 3Mwana wange, otategekanga bulime n’osigamu nsigo ya butakola mazima, kuba osobala okweyagaana ng’okungwiremu ebibi waakubisaamu n’emikuzi egighera omusanvu. 4Otasabanga Musengwa kukugha bukulu businga kuba bwa ghaigulu ku bw’abantu abandi, oba okusabanga kyabazinga akughe ekifo eky’ekitiisa. 5Oteetwalanga kuba mutuufu mu maiso ga Musengwa, waire okweyoleka ng’omugezi mu maiso ga kyabazinga. 6Otakolereranga kuba mulamuzi, kuba osobola okulemwa okumalagho omuze ogw’obutakolera ku mazima oguli mu bantu. Ate era tomanha bwe weekubira ku luuyi lwa muntu ali mu buyinza, n’osiigibwa enziro ng’ofiirwa obwesige abantu bwe bakulimu. 7Otakolanga kibi ku bantu bo, era oteereeteranga kweswaza ye bali. 8Otakolanga kibi kirala ekyo mikuzi ebiri, kuba ni bw’olikikola obw’olulala luti lwonka era olibonerezebwa. 9Otakobanga oti: “Katonda Ali Ghaigulu Yeene aidha kwidhukira ebirabo byange olukunkumuli bye ngaba, asiime ekigheebwayo kyange.” 10Otakooghanga kumusaba, waire okulekeranga agho okugabira abaavu.
11Otasekereranga muntu enaku y’eri kuluma ku mwoyo, kuba Musengwa mwene n’aisa omuntu ghansi era n’amuniinisa. 12Otayiiyanga kwogera bya buguya ku muganda wo oba mukagwa wo. 13Weesambenga okwogera eby’obuguya, kuba omuze ogwo guzira kalungi kaguvaamu. 14Otayogerayogeranga eyo otyo bya kulabankana mu lwekobaano olw’abantu abakulu, era otairaganangamu kintu ng’oli kusaba. 15Otakyaghanga kulima oba emirimo egindi emikalangafu, kuba Katonda Ali Ghaigulu Yeene n’eyagitaagho.
16Oteeyimbanga mu bikuukuulu bya bakozi ba bibi. Idhukira nti obusungu bwa Musengwa tibulwagho kubaidhira kubabonereza.
17Weewombeekanga inho, kuba okuvunda okw’okufa kututeegereire twenatwena.7:17: Mu bighandiiko eby’Oluheburayi kityo bwekiri okuvunda okw’okufa … twenatwena aye mu bighandiiko eby’Olugureki kiri nti ekibonerezo eky’abatatya Katonda, muliro na nhengere.
Enkolagana n’abantu abandi
18Otalyanga mu mukagwa wo lukwe olw’okwenda okufuna empiiya, era otavanga mu muganda wo n’omughaayo ni bwe kiba ng’ekyo kikufunisa zaabu ali ku nsi yeenayeena.
19Oteesubyanga kufumbirwa mukazi mugezi era ow’empisa enkalamu, kuba obulungi bwe obusikiriza busingira ghala ni zaabu.
20Otabisanga bubi bagheereza bo abakukolera n’obwesigwa, oba abapakasi abeeghaayo bakukolere obukalamu.
217:21: Kuv 21:2; Ma 15:12-15Gonzanga omugheereza wo omugezi ng’oti niiwe mwene bwe weegonza, era otamuloberanga kuba na idembe.
22Labiriranga ensolo dh’oli nadho. Bwedhibanga dhikufunisa amagoba, dhikuumenga.
23Bw’obanga ng’oli n’abaana, basomesenga beege okuba abawulize okuviira irala mu buto bwaibwe.
24Bw’obanga ng’oli ni baghala bo, beegeresenga okwefuga era otabakuzanga na kisundhe. 25Bw’ofumbiza mughala wo, oba okoze omulimo omukologho. Aye mughengayo y’omusaadha omutegeevu.
26Mukazi wo bw’abanga ng’akwesiimisa, otamubinganga kukuviira mu maka go. Aye oteeghanga mukazi y’otagonza n’omumaliraku birowoozo byo.
277:27-28: Kuv 20:12Lata wo mughenga ekitiisa n’omwoyo gwo gwonagwona, era oteerabiranga inhoko ebisa bwe byamuluma ng’akuzaala. 28Idhukira nga lata wo n’inhoko n’abaakuzaala. Kiki ky’olibasasulamu olw’ekirabo ekyo kye baakugha?
29Otyanga Musengwa n’omwoyo gwo gwonagwona, era waaghanga bakabona be ekitiisa. 30Gonzanga Omutonzi wo n’amaani go goonagoona, era abagheereza be atabalekuliranga agho nga tobafaaku. 31Otyanga Musengwa, ni bakabona be waabaghanga ekitiisa. Era obaghanga emigabo gyaibwe gye walagirwa okubagha: ebirime ebisooka okukungulwa, ebigheebwayo ng’omutango, emikono ku nsolo edhigheebwayo ng’omusengo, n’ebindi byonabyona ebigema ku misengo n’ebigheebwayo. 32Oyambanga abaavu, memale Musengwa akughe enkabi dheene.
33Oba nga wa kisa eri abalamu, era waabanga musaasizi eri abafu. 34Osaasiranga abafiiriirwa, waabalirisangaku. 35Otagayaaliriranga kuja kubona balwaire ebibaluma, kuba abantu baidha kukugonzanga lwa bikolwa ng’oti n’ebyo. 36Mu byonabyona by’okola, idhukiranga oti luliba lulala waafa. Ekyo kiidha kukukugiranga olobe kukola bibi.