6
1Era otabanga muzigu wa muntu mu kifo ky’okuba mukagwa we, kuba ng’eriina eibi bwe lireetera mwene lyo okuswala n’okuvumibwa, n’abakozi b’ebibi abaguya boona batyo bwe baba. 2Otaganhanga kutwalirizibwa ebyo omwoyo gwo bye gukutuma, kuba tomanha bwe bikuyuzayuzaamu n’oba ng’oti nte nume ye basazesaze ebikwalo. 3Olisigala agho otyo ng’oti n’omuti ogukaze oluvainhuma olw’okwereetera gwene okuliibwaku amakoola gaagwo, n’ebibala byagwo okuzikirizibwa. 4Omwoyo omubi gwita mwene gwo, gwamuleetera okusekererwa abazigu be.
Omukwano omutuufu
5Endhogera ey’eiwooyo eziramu ikabyo, eyoleka empisa enkalamu era yaayaza emikwano. 6Banga n’emikwano kamaala, aye weesigengaku mulala mu bantu olukumi n’abe akughenga ku magezi. 7Otayanguyirizanga kwesiga muntu ye waakakwana, sookanga kumuleba omwetegereze memale; 8kuba eriyo aba mukagwa wo nga ghaligho ky’akwendaku, aye yaaloba kukwiruukirira ng’oli mu buzibu. 9Era ghaligho akukyagha n’afuuka omuzigu y’oli, n’aja ng’akobera abantu nga bwemwasoire, olw’okwenda okukuswaza. 10Era ghaabaagho akugonza nga muli kulya ku kiiwulo ekirala, aye yaaloba kukwiruukirira ng’oli mu buzibu. 11Ebintu bwebiba biri kukujiira bukalamu akwesibaku yaaba ng’oti mwino inho, yaatuuka n’okulagira abagheereza bo. 12Aye bwe bikujiira obubi n’ogwa, ng’akwegisaaku.
13Weesambenga abazigu bo, era weegenderezenga bakagwa bo. 14Ow’omukwano omwesigwa aba ng’oti n’ekifo ekigumu omuntu mw’asobola okulumukira okwewonia. Bw’ofuna omuntu ali ng’oti n’oyo, oba ozwire kya bukombe. 15Ghazira kintu kya muwendo ng’oti n’ow’omukwano omwesigwa, era ezirayo minzaani y’osobola kupimiraku bungi bwa bulungi bwe. 16Ow’omukwano omwesigwa ali ng’oti n’obulezi obwiza obulamu. Era abo abatya Musengwa ni bonka abafuna omuntu ng’oti n’oyo. 17Omuntu yeenayeena atya Musengwa, aba n’emikwano emituufu kuba mwene nga bw’ali, ni mikwano gye bwe baba.
Amagezi geegeresa
18Mwana wange, viira irala mu buto bwo ng’oyenda inho okwegeresebwa, bw’oliba ng’okuze olifunanga amagezi. 196:19: Yak 5:7-8Weekalangulenga okuganoonia ng’omulimi bwe yeekalangula okulima n’okusiga. Memale olwo oteegererenga okufuna amakungula amalungi. Waire nga olitwalaku entangama okugakolerera, aye era olirya mangu ku bibala byago. 20Abo abakaali kwegeresebwa magezi gabakaluubiriza inho, n’abatali bamalirivu tibaba nago; 21kuba gabazitoogherera ng’oti ibaale izito eribaleetera okulebwa, era kaseera buseera nga bagasuula ere. 22Amagezi, ng’eriina lyago bwe liri, gasigala nga magezi era tigeeyolekera bantu kamaala.
23Mwana wange, wulirisa amagezi ge ndi kukugha, oikirize bye ndi kukulamba. 24Weesibe endhegere dh’amagezi ku bigere, era weete ekikoligo kyago mu nkoto. 25Taagho eibega lyo obbeede amagezi, loba kwekyagha olw’okusibwa endhegere dhaago. 26Idha eri amagezi n’omwoyo gwo gwonagwona, era ojiire ku bye gakoba n’amaani go goonagoona. 27Ja ng’oyagaaza woonawoona oganoonie, gaidha kukweyolekera. Memale ogageme era olobe kugaleka kuja. 28Olwo olifuna emiraala amagezi ago gye galeeta, era amagezi ago galikufuukira isanhu. 29Endhegere dhaago dhirikufuukira obukuumi obw’amaani, era galikuba mu nkoto ng’ekivaalo eky’ekitiisa. 30Ekikoligo kyago kirikufuukira bya madholobera ebya zaabu, n’emigugha gyago gyakufuukira nsibiro dha langi ya bululu abantu ab’ebitiibwa dhe beesibisa. 31Olivaala amagezi ng’oti kivaalo kya kitiisa, waagata ku mutwe gwo ng’oti ngule enungi einho esanhusa. 32Mwana wange, bw’oba oyenda oidha kwega, era bw’oba omumalirivu oidha kuba mugezi. 33Bw’owulirisa obukalamu, n’ota einho omwoyo ku byogerwa, oidha kwega ofuuke wa magezi. 34Ojanga mu kifo eky’olwekobaano olw’abantu abakulu, waabonayo omuntu omugezi, waabanga ghalala naye obutamuvaaku. 35Wulirisanga bye boogera ebigema ku Katonda, era otagayaalanga ensambo edh’amagezi ni dhikubitaku. 36Bw’ozuulanga omuntu omugezi, omuwuunanga buwuune. Era omuluutanianga, ebigere byo byaseenenia n’omwango ogw’omulyango gwe. 376:37: Yosh 1:8; Zab 1:2Lowoozanga ku biragiro bya Musengwa, obyefumintirizengaku ekiseera kyonakyona. Oyo alikuleetera okutegeera mu mwoyo gwo, yaakugha n’amagezi g’onoonia.