51
Olwembo olw’okusiima Katonda
1Ndidha kukusiimanga iwe Musengwa era Kyabazinga;
ndidha kukusaakanga iwe Katonda wange era Omulokozi wange.
Ndidha kukusiimanga,
2olw’okuba wankuuma era wambeera.
Wamponia okuzikirizibwa,
wamponia emitego gy’abo abampaayiriza n’abo aboogera eby’obuguya.
3Waanhamba ng’abandi balingiriire bulingiriire.
Olw’eriina lyo eikologho n’olw’okusaasira kwo okungi einho,
wantoola ku bazigu bange abaali bali kuneeguguna ng’oti benda bwa kundya,
nga beetegeike kundhita.
Wantoola mu kudaazibwadaazibwa okungi,
4wamponia n’okufa ekiziyiro ky’omwosi
ogwava ku muliro ogwanzingiza ku ndhuyi dhoonadhoona, gwe ntaamanhaku
yagukunaania.
5Wantoola e magombe mu nda ya walumbe,
mu bantu aboonoonefu aboogera eby’obuguya,
6abaghaamiriza banaibwe era ni baseeghera kyabazinga.
Nabulaku katono kati okwitibwa.
7Abazigu banzingiza ku ndhuyi dhoonadhoona nga ghaziragho wa kuunhamba,
naayagala omuntu ow’okumbeera aye nga ghazira naire.
8Agho naidhukira okusaasira kwo iwe Musengwa,
naidhukira ni by’ojiire ng’okola okuva eira n’eira,
nga bw’owoniiza abo abakwesiga
n’obalokola okubatoola mu ngalo dh’abazigu baibwe.
9Agho nga ndi eno ku nsi naagheereza okusaba kwange,
era naakweghemba omponie okufa,
10nga nkoba nti: “Wo Musengwa, bwenebwene niiwe lata wange,
otandekulira agho nga ndi mu kiseera eky’okudaazibwadaazibwa,
nga nzira anhamba kulwanisa bazigu abeekuluntaza.
11Ndidha kusaakanga eriina lyo buliidho
era nkwemberenga enhembo edh’okukwebaza.”
Iwe wawulira okusaba kwange wandhiramu,
12wantoola mu kaseera akazibu einho wamponia okuzikirira.
Kale ndidha kukusiimanga era nkusaakenga.
Era ndidha kukwemberanga enhembo edhisaaka.
Okwagaaza okufuna amagezi
13Bwe nali nkaali muto, nga nkaali kutoolera ngendo dhange, nasaba n’obumalirivu nfune amagezi. 14Najanga mu isinzizo naasaba okugafuna, era ndidha kwagaazanga buli ghantu okugafuna, ekiseera kye nnaamala nga nkaaligho ku nsi. 15Okuva mu buto bwange okutuusa ye buli eno mu bukulu bwange, amagezi n’agabairenga eisanhu lyange. Era okuva mu buto mbairenga nganonereza buli ghe gaja. 16Bwe natega kutu nti naagawulira era naagafunamu eby’okwega kyodoodo. 17Okuva olwo naaja nga neeyongera okwega, era oyo ampa amagezi ndidha kumughanga ekitiisa. 18Nasalagho okujiiranga ku magezi, neeghaayo inho okukolerera obulungi. Era okukola ntyo tikingemya nsoni naire. 19Nafaabiikana inho okufuna amagezi, nga neegendereza inho obutasobya. Era naayandhululiza emikono gyange eri eigulu, nga ndi kulira olw’okuba omusiru azira magezi. 20Aye omwoyo gwange nagumalira ku kuganoonia, era namala kwetukuza memale naagafuna. Okuva lwe nagafuna njiirenga nga neeyongera okuba omugezi, era tija kugaganha kundekulira agho. 21Omwoyo gwange gwampikiriza okunoonia amagezi, era naagafuna mu bungi bwene. 22Musengwa yampa ekirabo eky’olulimi, era ndidha ku lukozesanga okumusaaka.
23Imwe mwenamwena abakaali kwega museete, mwidhe ye ndi mu isomero lyange mbeegerese. 24Lwaki mukoba muti muzira magezi, era ni mutabaaku kye mukolagho? 25Mpegaano ni ndi kubakoba nti mufune amagezi nga timusaswire mpiiya naire. 26Muvaale ekikoligo mu nkoto muganhe okugalagirwa, kuba amagezi tigabali ghala naire. 27Beene mukyebonereku n’amaiso gaimwe: nze tyafaabiikana inho kwega, aye mpegaano ndi mumativu ebitaloodheka. 28Ni bwe mugula obugule amagezi n’empiiya, mumanhe nga kye muligafunamu kiriba kya mughendo okusingagho.
29Musagambe olw’okusaasira kwa Musengwa, era mutagemwanga nsoni kumusaaka. 30Mukolenga emirimo gyaimwe ng’ekiseera kikaali, olwo Musengwa alibagha empeera mu kiseera kye ekituufu.