5
Oteekuluntazanga
1Otaganhanga mwoyo gwo kutwalirizibwa bya bukombe, oba okutuuka n’okukoba oti: “Bye ndi nabyo bimmala.” 2Amaani go gatakwesiguzanga, ni weemaliranga ku ebyo omwoyo gwo bye gwegomba. 3Otakobanga oti katyo ezirayo asobola kukufuga, kuba Musengwa bwenebwene alikubonereza olw’ekyo. 45:4: Mul 8:11Otakobanga oti: “Nkoze ebibi aye ghazira kintuukangaku naire,” kuba Musengwa tayanguyiragho kubonereza. 5Oteesigulanga oti Musengwa aidha kukusonigha, ekyo ni kikuleetera bwa kweyongera kukola bibi. 6Otakobanga oti: “Nga bw’ali n’ekisa ekitaloodheka, alinsonigha ebibi byange olukunkumuli”; kuba waire ali n’okusaasira aye era ali n’obusungu bw’ayolekeza abakozi b’ebibi. 7Otalwangagho kukyuka kwira ye Musengwa ng’oja bw’oyongezaayo ekiseera, kuba obusungu bwe bulikugwaku bugwe yaakubonereza waazikirira. 8Oteesiganga bukombe bwe wafuna mu kukupankupania, kuba ghazira kye bulikugasa ku lunaku akabi lwe kaliidhiraku.
Okuba ow’amazima n’okwefuga
9Otayuuzibwayuuzibwanga buli mpewo ekunta. Era otagemanga bugeme kiisi ngira y’obona, kuba aboonooni aboogera eby’obuguya n’abakola batyo. 10Gumiranga ku ky’oidhi nga n’ekituufu, era otakyusakyusanga ky’oba okobye. 11Oyangughanga okuwulira, aye osookanga kulowooza memale wairamu. 12Bw’obanga ng’oidhi eky’okwiramu, oirangamu. Aye bw’obanga nga tokiidhi, osirikanga busirike. 13Okwogera kusobola okukugheesa ekitiisa oba kwakuleetera okunhoomebwa. By’oyogera bisobola okukuleetera okugwa. 14Oteereeteranga bantu kukwegemerera ng’omuntu ayogera ku baine ebibono ebighaayire. Era otaghaamanga bantu n’obaleetera bulumi, kuba ng’omwibi bwe yeereetera okuswazibwa, n’omuntu ayogera eby’obuguya yeena atyo bwe yeereetera okusalirwa omusango aghazira kusaasirwa naire. 15Weekuumenga olobe kubaaku y’olumya, ka kibe mu bintu ebinene oba mu bitono.