47
Nathani
147:1: 2 Sam 7:2-3; 12:1 Samueli bwe yamala okufa, Nathani yafuuka omulanzi mu biseera bya kyabazinga Daudi.
Daudi
247:2-11: 1 Sam 17:34—18:7; 2 Sam 5:7; 8:1; 12:13 Nga ekitundu ekisavu bwe bakitoola ku nsolo egheebwayo ng’omusengo olw’okutabagana nga kya Musengwa, ni Daudi yeena atyo bwe yatoolebwa mu baana ba Isiraeli. 3Yazaanhisanga empologoma ng’oti bubuzi buto, era yaazaanhisanga ebisolo ebikambwe ng’oti butaama buto. 4Bwe yali akaali mwisuka yaita omusaadha omuwaigufu, yaawonia abantu be okunhoomebwa. Yaata eibaale mu nsuumulo ye, yaaliwolooberera lya kuba Goliathi, yaamukomya okwesuutiriza. 5Yasooka yaasaba Musengwa Ali Ghaigulu Yeene, Musengwa oyo yaamugha amaani mu mukono gwe omusaadha, ag’okwita omusaadha oyo eyali omulwani w’entalo aziramu ntete. Olwo Daudi oyo yaasobola okwiza mu bantu be amaani. 6Abantu baamugha ekitiisa olw’okwita emitwalo n’emitwalo egy’abazigu, era bwe baamuvaaza engule ey’obwakyabazinga baamusaaka olwa Musengwa okumugha enkabi n’amulonda. 7Yaasaaniagho abazigu be boonaboona, yaakuba Abafilisiti baanafughalira irala, baaloba kwiramu kuba ba maani kabiri ni ye buli eno.
8Daudi oyo yeebazanga Musengwa Omutukuvu Ali Ghaigulu Yeene mu buli kye yakolanga kyonakyona, era yaamughanga ekitiisa. Yagonzanga inho Omutonzi we oyo, yaamwemberanga enhembo edhimusaaka n’omwoyo gwe gwonagwona. 9Yatanga abembi mu maiso g’alutaari okwembanga enhembo edhinhuma. 10Yanhumisa ebibinuko era yaataagho ebiseera oby’okubikulizangamu, buli kibinuko mu kiseera kyakyo omwaka gwonagwona. Nga bemba enhembo edhisaaka eriina lya Katonda eitukuvu, eisinzizo lyawaala olunaku lwonalwona. 11Musengwa yasonigha Daudi ebibi bye, yaaleetera obwakyabazinga bwe okusigalagho nga bugumu begulugulu ebyanda n’ebyanda. Era yaakola naye endagaano ati mwene n’abaana be n’abaidhukulu, n’abanaafuganga Isiraeli mu kitiibwa.
Solomoni
12Daudi bwe yamala okufa, mutabane we Solomoni eyali omugezi yaafuuka kyabazinga. Era yaafuga ng’ali bukalamu mu miraala, kuba lata we oyo Daudi yamutegekera. 1347:13-17: 1 Bakyab 4:21-32 Tighaalighooku lutalo nga Solomoni n’afuga. Katonda yamugha emiraala ku nsalosalo dhoonadhoona edh’obwakyabazinga bwe, asobole okuzimbira Musengwa eisinzizo nga lya kubaagho byanda na byanda. 14Solomoni, nga wali mugezi mu bwisuka bwo! Amagezi go nga mangi ng’oti n’omwiga ogukuuluula ni gubanda n’okubanda! 15Amagezi go gaabuna ensi yoonayoona, enfumo dho n’ensambo dho dhaamanhika woonawoona. 16Wamanhika okutuukira irala ni mu bizinga ebiri eghala einho, era abantu baakugonza inho olw’okuleeta emiraala. 17Waleetera amaghanga mu nsi yoonayoona okukwewuunhia olw’enhembo dho, n’ensambo dho, n’enfumo dho, n’olw’ebyo eby’amagezi by’oinhonhola. 1847:18: 1 Bakyab 10:21, 27 Kulwa Musengwa Katonda wa Isiraeli, wasoloza zaabu ng’oti n’asoloza amabaati obubaati era waasoloza feeza ng’oti n’asoloza ekyuma obuuma.
1947:19: 1 Bakyab 11:1 Aye okwefuluguta n’abakazi einho n’okwakuleetera okugwa. 20Ekitiibwa kyo wakisiiga enziro, n’eky’abaana bo n’abaidhukulu waakyonoona. 21Waabaleetera enaku n’okubonerezebwa olw’eky’obusiru kye wakola. 2247:22: 2 Sam 7:15 Aye Musengwa talekerangaku kuba na kivunika, oba okulekulira agho ekintu kye yakola ni kizikirira. Talizikiriza izaire lya Daudi ye yalonda era eyamugonza. Kale ku lwa Isiraeli kyeyava n’alekagho abaawonagho ku izaire lya Daudi oyo.
Rehoboamu ni Yeroboamu
2347:23-25: 1 Bakyab 11:43; 12:10-30; 2 Bakyab 17:6, 18 Agho Solomoni yaafa yeeyimba ku badhaadha be abaafa. Owundi ku batabane be nga ni Rehoboamu, yaamusikira ku bwakyabazinga. Aye yali musiru ng’aziramu kategeera, era enkola ye n’eyaleetera abantu okudheema.
Ghaaligho ni Yeroboamu mutabane wa Nebati, eyaleetera Abaefuraimu mu Isiraeli ey’oku luuyi olw’omukono omugooda olw’e buvandhuba okugwa mu kibi. 24Ebibi byaibwe byaba kamaala inho, byatuuka n’okubabingisa mu nsi yaibwe, baasindikibwa mu bunhage 25kuba baakola ebibi ebya buli nsambo okutuusa Musengwa bwe yatuuka okubeesasuulizaaku.