44
Okusaaka badhaadha baife
1Ka tusaake abasaadha abamanhifu einho,
badhaadha baife ab’omu nse edhaabita.
2Musengwa yabagha okugabana ku kitiisa kye ekitaloodheka,
era n’amaani ge gaababaamu nga gakola okuviira irala mu mainhama.
3Ghaaligho abo abaafuganga obwakyabazinga,
ghaabaagho abaamanhikana einho olw’amaani gaibwe.
Abandi baali bawi ba magezi balungi,
abandi baayogeranga eby’obulanzi.
4Abandi baali bakulembeze bakalamu ba bantu baibwe,
baabafuganga nga babagha amagezi amalungi,
era nga babagalagira n’ebibono eby’amagezi.
5Ghaaligho abaayiiyanga enhembo,
ghaabaagho n’abo abaayesanga endheso ni babighandiika,
6nga bali mu maka gaibwe mu miraala,
era nga bantu bakombe beene.
7Abo boonaboona baali bantu bamanhifu inho,
era ng’abantu ab’omu biseera byaibwe babagha ekitiibwa.
8Ghaaligho abaaleka eriina eirungi,
nga ni ye buli eno abantu bakaabasaaka.
9Abandi tibakaidhukirwa,
baazikirira ng’oti tibaalighooku naire.
Baafuuka ng’oti se ti baazaalibwa,
era n’abaana baibwe abaabairirira boona batyo.
10Aye ghaaligho bano abaali nga batya Katonda,
abaakola ebituufu ebitaja kwerabirwa.
11Ekitiibwa kyaibwe kirisigala mu izaire lyaibwe
ng’eky’obusika eri abaana n’abaidhukulu.
12Eizaire lyaibwe likaakuuma endagaano,
kuba badhaadha baibwe abo boona bwe baakola.
13Eizaire lyaibwe tirija kuwaagho byanda na byanda,
n’ekitiibwa kyaibwe tikirisangulwagho.
14Emibiri gyaibwe gyaziikibwa bukalamu mu miraala,
aye ebikolwa byaibwe ebirungi tibija kwerabirwa ebyanda n’ebyanda.
15Abantu abamaghanga agandi baidha kughayanga ku magezi gaibwe,
n’abantu nga beesoloiza okusinza Musengwa baidha kubasaakanga.
Enoka
1644:16: Mainh 5:24; Heb 11:5; Yud 14 Enoka yasiimya Musengwa, era Musengwa oyo yaamutwala mu igulu. Olw’okwenenia kwe, yaafuuka eky’okuboneraku okuta mu bantu ab’ense dhoonadhoona omwoyo ogwenda okwenenia.
Noa
1744:17-18: Mainh 6:9—9:17 Noa yali muntu mulungi eyakoleranga ku butuufu. Kale omwidhuzo gw’amaadhi bwe gwazikiriza ebyali ku nsi, yaasigalagho nga mulamu, olwo ku nsi kwasigala nga kukaaliku abantu abaawonagho. 18Musengwa yakola naye endagaano ey’ebyanda n’ebyanda, ati taja kabiri kusindika mwidhuzo gwa maadhi kusaaniagho biramu biri ku nsi.
Aburahamu
1944:19-21: Mainh 15:1—17:27; 22:1-18 Aburahamu ni dhaadha w’amaghanga kamaala, era ezirayo muntu wundi yeenayeena eyaali abaireku n’ekitiisa ng’oti ni mwene. 20Yakuuma Amateeka g’oyo Ali Ghaigulu Yeene, eyamala naakola naye endagaano ng’ekakasibwa n’akamanhiso ku mubiri gwe. Era Musengwa oyo bwe yamugezesa, yamukakasa nga mwesigwa. 21Kale Musengwa yaamusuubiza nga yeerayirira ati, baidhukulu be baidha kugheesanga amaghanga enkabi. Era ati balyala baaba bangi nga tibabalika ng’oti nkungu mu nsi. Era ati alibagulumiza ng’oti muunienie edh’oku igulu. Era ati ekiketezo kyaibwe kija kuva ku nhandha kituuke ku nhandha, n’okuva ku mwiga Eufurate okutuuka ensi y’ekanga.
Isaaka ni Yakobo
2244:22-23: Mainh 17:19; 26:3-5; 27:28; 28:14 Isaaka yeena, Musengwa yamusuubiza mu nsambo n’endala ku lwa ise Aburahamu. 23Ate ku Yakobo yaayongera okukakasa enkabi dhe yasuubiza okugha abantu boonaboona. Yaamugha ekiketezo ng’omugabo gwe, kye yagabaniamu mu bika eikumi n’ebibiri.