43
1Ye ng’obulungi obw’oku igulu bweyoleka bukalamu nga bweruupye eyo ghaigulu
mu igulu!
Ye ng’eigulu liboneka nga lya kitiisa ekitaloodheka!
2Endhuba bw’evaayo n’eboneka, eja ng’eyolesa obulungi bwayo obwewuunhisa,
obwatondebwa oyo Ali Ghaigulu Yeene.
3Ekaza ensi mu kasana ghagati,
era ghazira asobola kugumira kwokya kwayo.
4Omuntu ali kulabirira ekyokero aba mu lwota olubabula,
aye endhuba eyokya ensozi n’olwota oluwula agho ng’okubiisaamu emikuzi esatu.
Bw’egheera obugheere, omuuka ogugivaamu muliro gwene, ate obutangaavu bwayo
bwitamu n’amaiso.
5Musengwa oyo eyagikola mukologho,
era alagira bulagire, nga yeene etaaku mbiro mu lugendo lwayo.
6Musengwa yakola n’omwezi gubonekenga mu biseera byagwo,
olwo gubenga akamanhiso ak’ebiseera eby’omwaka akatalivaagho ebyanda n’ebyanda.
7Ku mwezi abantu kwe bamanhira enaku edh’ebibinuko.
Obutangaavu bwagwo bweyongera nga gukuze, ate bwamala bwakendeera.
8Enaku edhiri mu kiseera kye tweta omwezi omulamba,
baadhituuma eriina eryo nga balitoola ku mwezi ogwo.
Gwewuunhisa okubona ensambo ye guja nga gweyongera obunene buli bwire.
Era guli ng’akamanhiso ak’eigye ery’oku igulu,
engeri ye guja nga gwaka ku igulu okwo.
9Okumesunkana kw’emuunienie kuleetera ku igulu okuboneka obulungi einho obwire,
ng’oti madholobera gali kumirimiinha ku igulu lya Musengwa.
10Emuunienie edho dhisigala mu bifo byadho, Katonda Omutukuvu bye yadhiragira.
Tidhirekeraku naire mulimo gwadho ogwo ogw’okukuuma.
11Linga ku musoke osaake oyo eyamutonda
mu langi enungi einho edhimesunkana.
12Yeetimba ku igulu ng’oti kalaso ak’ekitiisa,
akadhuumwirwa engalo dh’oyo Ali Ghaigulu Yeene.
13Musengwa alagira bulagire omugozi gwagwa,
yaasindika okumyansa kw’olukuba kwaja kwatuukiriza ky’aba asazeegho.
14Aigulagho amaterekero ge ag’oku igulu,
ebire byagulukamu ng’oti nhonhi.
15Akozesa obukumu bwe nga kyabazinga, yaata amaani amangi mu bire,
yaamenhamenha omugozi omugemu, gwafuukamu mabaale ga mugozi.
16Bw’abonekaku obuboneke ensozi dhitengeeta,
era buli lw’aba ng’ayenze, empewo ekunta ng’eva ku luuyi olw’omukono omusaadha
olw’e buvandhuba.
17Bw’ayogera, amamiro ge gatyabuka ng’oti lukuba, gaaleetera ensi okwegoniola n’obulumi.
Olwo kiwunga ava ku luuyi olw’omukono omugooda olw’e buvandhuba,
aidha ng’ali ghalala n’empewo eyeezungulula n’amaani.
Musengwa oyo yaasindika omugozi ku nsi gwaika ng’oti nhonhi,
era gwamwaguka ng’oti nzige ku itaka.
18Twewuunhia emboneka ey’omugozi ogwo enungi n’obweru bwagwo,
era twewuunhia nga tuli kugubona nga bwe gugwa.
19Musengwa akunkumusa omugozi ku itaka ng’oti muunhu,
era bwegwegema guba musongovu ng’oti mawa.
20Asindika empewo enhinhogovu okuva ku luuyi olw’omukono omugooda olw’e buvandhuba,
yaafuuwa ku maadhi ag’enhandha n’ag’ebidiba, geegema ng’oti ibaale.
Olwo amaadhi geeghembaku omugozi ng’oti gavaire kivaalo kya mu lutalo.
21Musengwa oyo asindika olwota lwababula ensozi, lwakaza n’eirungu,
era lwaniaza n’eisubi ng’oti muliro.
22Aye olufu bwe lwidha, lwizaagho ebintu byonabyona byawona,
era omusulo bwe gugwa, biiramu obulamu byaira buyaaka.
23Olw’amagezi ge yaleetera enhandha edh’amaadhi amangi amaleeyi okulaala,
yaadhisimbamu ebizinga.
24Abasaabala ku maadhi bwebatukobera akabi ke baagaana ku nhandha,
twewuunhia olw’ebyo bye tuwulira.
25Mu nhandha omwo mulimu ebintu Katonda bye yakola ebitategeerekeka
era ebyasaamiriza:
ebiramu ebya buli nsambo n’agasolo aganene.
26Buli kitonde Musengwa ky’atuma kituukiriza omulimo ogwakitonderwa,
era agemereire ebintu byonabyona n’ekibono kye.
27Ni bwetwogera ebyaga gha, titusobola kubimalayo,
aye nga mu byonabyona kiri nti: “Musengwa ni byonabyona.”
28Tunaatoola gha amaani ag’okumusaaka,
ate nga mwene n’omukologho okuwula ebintu byonabyona bye yatonda?
29Musengwa mukologho inho era atiibwa,
n’obuyinza bwe buswikiriire.
30Ni bw’omusaaka ebyaga gha,
mwene asigala nga mukologho inho okuwula okusaaka kwo.
Ni bw’omugha ekitiisa okwekutula,
era tosobola kumusaaka kimala.
31Naani eyaali amuboineku asobola okwinhonhola bw’afaanana?
Era naani asobola okumusaaka nga bw’agwaniire?
32Ebintu biri kamaala bye yakola ebiwula n’ebyo ebikaali kumanhika,
bye twakabonaku bitono inho.
33Musengwa yakola ebintu byonabyona,
era abo abamutya yabagha amagezi.