42
Ebitagwaine kugemyanga muntu nsoni kubikola
1Aye ate baana bange, mutajiiranga inho ku bya bantu, kubaleetera kugwa mu kibi. Ka mbakobereku ebindi ku bitagwaine kubagemyanga nsoni:
2Otabangamu nsoni ku bigema ku Mateeka g’oyo Ali Ghaigulu Yeene, ni ku ndagaano ye,
ni ku kusalanga emisango aghazira kusaliriza, waire ng’oli kugisalira bantu
abatatya Katonda.
3Otabangamu nsoni kubalirira bintu bukalamu nga muli ghalala ni mwino
ye musuubula naye, oba ye mubita naye mu ngendo.
Era ogabananga bukalamu eby’obusika ni basika baino.
4Otabangamu nsoni kukozesa bipimo bituufu,
na kufunanga magoba mangi oba matono,
5na kulamuzanga na basuubuzi.
Era otabangamu nsoni kukangaivulanga baana bo mikuzi kamaala,
na kukubanga mwiru atali mwesigwa miigo mingi.
6Mukazi wo bw’aba nga ti mwesigwa oba nga ghaka oligho n’abantu kamaala, otabangamu nsoni kuta kuufulu ku bintu byo. 7Obalanga era waapimanga ebintu byonabyona by’oghaayo, era oghandiikanga buli kintu ky’ofulumya ni ky’ongiza. 8Otabangamu nsoni kugalagira muntu aziramu magezi oba omusiru, oba omuntu omukulu asoola n’abato. Bw’okola otyo oidha kwoleka nga bwenebwene wakuzibwa bukalamu, era oja kusiimyanga abantu boonaboona.
Abaghala ni baiseibwe
942:9-11: Sir 7:24-25; 26:10-12 Waire omughala mwene aba takiidhi, ise endoolo dhimubula mu buliri olw’okumweraliikirira. Bw’aba akaali kufumbirwa amweraliikirira ati oba talifumbirwa. Bw’aba yafumbirwa, amweraliikirira ati oba balimala baamukyagha. 10Bw’aba omwegha, amweraliikirira ati oba basobola okumwonoona, oba yaafunira ku luya lwa ise amabunda. Bw’aba yafumbirwa, amweraliikirira ati oba taliba mwesigwa, oba ati katyo aliba mugumba.
11Okuumanga butatemya mughala wo omukanukanu, kuba asobola okukuleetera okusekererwa abazigu bo. Waafuuka eky’okwogerwaku mu kibuga, era abantu boonaboona baakuyeeyerezanga. 12Otamuganhanga kwolesa bulungi bwe eri basaadha oba okumuganha okubanga aghalala n’abakazi abandi; 13kuba, ng’ensiiriri bwe dhoonoona engoye, n’abakazi boona batyo bwe boonoona bakazi banaibwe. 14Omusaadha ni bw’aba omubi mu mpisa asingira ghala omukazi omulungi mu mpisa, kuba omukazi n’aswaza era n’anhoomesa.
Ekitiisa kya Katonda kyeyoleka mu bitonde bye
15Buti ka ndidhukire Musengwa bye yakola,
ndhogere bye nabona.
Musengwa yayogera bwogere ebintu byatondebwagho.
Era byonabyona bigondera ky’alagira.
16Endhuba eba ghaigulu yaayakira ku bintu byonabyona,
buli kintu kyabuna ekitiisa kya Musengwa.
17Ni bwebaba bamalaika abatukuvu, Musengwa tiyabagha bukumu
kwinhonhola byewuunhio bye yakola,
waire nga yabaganha okubanga gh’ali mu kitiisa kye nga ghazira kabi kabatuuseeku naire.42:17: Kityo bwe kikoba mu Luheburayi yabaganha … mu kitiisa kye. Ate mu Lugureki kikoba kiti oyo Aghanga Ebintu Byonabyona bye yataagho mwene, olwo buli kintu kisobole okuba mu kitiisa kye nga kitereire bukalamu.
18Yeekebeedha ebiri ghansi eyo mu lwina olutakoma, yaalinga ni mu myoyo egy’abantu,
yaategeera entegeka dhaibwe dhe bagetageta.
Oyo Ali Ghaigulu Yeene aidhi byonabyona ebisobola okumanhibwa,
era ategeera obumanhiso obubaagho mu nse dhoonadhoona.
19Aidhi bukalamu ebyo ebyaligho n’ebyo byonabyona ebija okubaagho.
Era ayoleka n’eby’omunda einho ebikwekeibwa.
20Ghazira ky’odhuuba ky’ataidhi,
waire ky’oyogera n’atakiwulira.
21Ensambo ye yasengekamu ensi eyoleka ng’amagezi ge tigaloodheka,
era asigala ng’aligho ebyanda n’ebyanda.
Ghazira kintu kimwongerwaku waire kimutoolebwaku,
era tiyeetaaga muntu yeenayeena kumugha magezi.
22Ye nga bye yakola byonabyona byegombesa inho!
Ye nga bimesunkana ebitaloodheka!
23Ebintu ebyo byonabyona birigho era bija kubaagho ebyanda n’ebyanda.
Buli kintu kimugondera okutuukiriza ekyakiteesaagho.
24Yabigereka nga biri bibiri bibiri, ng’ekindi kyawukanaku ku kiinaakyo.
Aye ghazira Musengwa oyo kye yakola n’atakimaliriza bukalamu.
25Buli kintu kikakasa obulungi obwa kiinaakyo.
Naani bwenebwene asobola okusinwa okwerolera ebitiibwa ebyo?