41
Okufa
1Ha okufa! Omuntu eyeetyamiire mu miraala gye ng’ali mu bintu bye yeekolera, bw’akulowoozaaku obulowooze kumukaayirira. Kukaayirira n’oyo azira kiri kumutabula naire, nga buli kintu kimujiira bukalamu era ng’ali n’amaani ge bulungi, yaalya buli kya kulya kyamuwoomera.
2Ha okufa! Ghaligho omuntu aba omwavu yaawaamu n’amaani, oba omukaire einho atawukatawuka olw’ebidhuubo ebimweraliikiriza, nga n’ebintu tibimujiiriire bukalamu naire era ng’asiniirwa okuba omulamu. Omuntu ng’oti n’oyo, okufa okwo bwekumusalira ogw’okufa asanhukira inho ensala yaakwo eyo.
3Mwana wange, otatyanga kufa. Idhukira nga kwaligho ku abo abaakusooka okubaagho, era kulibaagho ni ku abo abaliiragho ng’oviiregho. Ekyo kya iteeka okuva ye Musengwa eri ebintu byonabyona ebiramu. 4Iwe osobola okulobera ekyo oyo Ali Ghaigulu Yeene ky’aba ng’ayenze? Oba obulamu bwa myaka ikumi oba kikumi oba lukumi, ezira aja kubinoonerezaaku ere e magombe.
Ebija okutuuka ku bakozi b’ebibi
5Abaana ab’aboonooni boona bafuuka byenhinhalwa, kuba buli kiseera baba ghalala n’abantu abatatya Katonda. 6Abaana abo baja kufiirwa eby’obusika bwaibwe, ni baidhukulu baibwe banhoomebwenga byanda na byanda. 7Baja kunenia bazaire baibwe abatatya Katonda, olw’okuba n’abaabaleetera okunhoomebwa.
8Mukagwireku imwe abatatya Katonda, abaava ku Mateeka ga Katonda oyo Ali Ghaigulu Yeene. 9Bwe muzaalibwa, muzaalirwa kikolimo. Era bwe mufa, mugabana kikolimo. 10Buli ekiva mu itaka, kiira mu itaka. N’abatatya Katonda batyo bwe bava mu kikolimo ni baira mu kuzikirira.
11Omubiri ogw’omuntu guzira inho mughendo,41:11: Kityo bwe kikoba mu Luheburayi Omubiri ogw’omuntu … mughendo. Ate mu Lugureki kikoba kiti Omubiri ogw’omuntu bwe gufa abantu bagulira inho. aye ebirungi omuntu by’akola bisigalagho byanda na byanda. 12Okuumanga eriina eirungi, lija kusigalagho okuwula iwe mwene, era lisigalegho okuwula eby’obukombe ebya zaabu olukumi. 13Obulamu obulungi buba bwa nnaku mbale bubale, aye eriina eirungi lisigalagho byanda na byanda.
Ebigwaine okugemyanga omuntu ensoni okubikola
14Baana bange mukolenga bye mbeegeresa, olwo mubenga nga muli mu miraala. Amagezi amasirikire gali ng’oti n’obukombe obugisiibwa. Byombi biba na mugaso ki? 15Omala gaba na muntu agisa obusiru bwe, otabaire n’ole asirikira amagezi ge.
16Baana bange muwulirise bino bye nja okubeegeresa, ebigema ku bigwaine okubagemyanga ensoni. Ebindi tibibeetaagisa kubagemya nsoni:
17Obangamu ensoni okukola obwenzi mu maiso ag’abazaire bo,
n’okulimba mu maiso ag’omufuzi oba omuntu owundi ow’ekitiibwa.
18Obangamu ensoni okwiza omusango mu maiso g’omulamuzi,
n’okwebisa obubi ng’abantu beesoloiza,
n’okuba omukupankupania eri mukagwa wo
oba eri omuntu ye mweyimba naye okukolera aghalala.
19Obangamu ensoni okwiba ku baliraanwa bo,
n’obutatuukirizanga ky’oba osuubiiza,41:19: Mu Luheburayi kityo bwe kikoba. Ate mu Lugureki kikoba kiti n’obutabanga wa mazima mu maiso ga Katonda.
n’obutabaliriranga bantu bandi ku kiiwulo,
era n’okukodoghaliranga ekintu ekiba kikugheereibwa oba ky’ogabye.
20Obangamu ensoni okusiriikirira nga bakulamwisa,
n’okulingirira einho malaaya.
21Obangamu ensoni okuloba okukolera omuntu akuliku oluganda ekintu ky’aba akusabye,
n’okweiriza omugabo oba ekirabo eby’omuntu owundi,
n’okulingirira einho muka beene,
22n’okuzaanhazaanha n’omugheereza we omukazi, oba okuseeta obuseete okumpi n’obuliri bwe.
Era obangamu ensoni okukozesa olulimi oluvuma bakagwa bo,
n’okugaba ekirabo kabiri n’omala n’olangira y’okighaire.
23Era obangamu ensoni okwogera eby’ekyama.
Ebyo n’ebigwaine okukugemyanga ensoni era oidha kusiimyanga abantu boonaboona olw’ekyo.