40
Enaku eri mu bulamu obw’omuntu
1Buli muntu yatonderwa emirimo kamaala egy’okukola. Era buli muntu ali n’omugugu omuzito gwe yeetwika okuva ku lunaku lwazaalibwa okutuuka ku lunaku lwairayo ye maama wa boonaboona, eryo nga n’eitaka. 2Buli muntu aja yaatabulwa, era yaatya nga yeeraliikirira inho olunaku lw’alifiiraku. 3Okuviira irala ku w’ekitiibwa atyama ku kityamo eky’obwakyabazinga, okutuukira irala ku mughafu akwetukira mu nkungu ni mu ivu, 4n’okuviira irala ku muntu avaala engoye enungi edha nakasooma era avaala n’engule ku mutwe, okutuukira irala ku oyo avaala enziina, 5boonaboona batambulira mu busungu, mu nsaalwa, mu bizibu, na mu kutabukatabuka. Batya inho okufa era ni bwebaja ku buliri okutenduka, edhandibaire endoolo dhifuukamu birowoozo bya nnaku byereere. 6Okuwuumula kuba kutono inho, oba obutabeeragho irala. Bwe batenduka baba ng’oti bali kumoga. Ebifaananie bibaidhira byabatiisa era byabatabula, baaloota ng’abazigu bali kubabingirira. 7Aye abazigu abo ghe bajiira okubagemera bati, nga bano baira engulu olwo baawulira bulungi okuba nga kibaire bwa kirooto.
8Bino n’ebituuka ku bitonde byonabyona, ka babe bantu oba nsolo. Aye nga ku boonooni biri n’okusingagho emikuzi musanvu: 9okufa, ebikolwa eby’obukambwe, okusoola, okulwana, obutemo, ebibamba, endhala, obulwaire, ni kawumpuli. 10Ebyo byonabyona byatondebwa ku lwa bantu babi, era abo n’abaaleetereza okuzikirira. 11Ekintu kyonakyona ekiva mu itaka kiira mu itaka, ng’oti n’amaadhi goonagoona bwe gaira mu nhandha.
Ebiva mu kukola ebibi
12Okugulirira n’obutakola mazima byonabyona biriwaagho, aye obwesigwa bulibaagho byanda na byanda. 13Obukombe omuntu bw’afunira mu bukupankupania, buliwaagho ng’omwidhuzo gw’amaadhi bwe gakuuluula ni gakala, oba ng’olukuba bwe lutyabuka ni luwaagho mu kire eky’amaadhi. 14Omuntu omugabi aidha kusagambanga, aye abakozi b’ebibi balizikirira. 15Abaana ab’abantu abatatya Katonda tibalizaalagana kwala. Bali ng’oti n’ebimera ebigezaaku okusimba emizi ku lubaale, 16era ng’oti bitoogo ebiba ku mbali okw’omwiga ebisooka okwiyibwagho ng’ebisimbe ebindi byonabyona bikaali. 17Ebikolwa eby’ekisa n’okugabira abaavu bibaagho byanda na byanda.
Eisanhu eriri mu bulamu obw’omuntu
18Omuntu bw’aba n’ebintu ebibye ku bubwe oba ni yeekolera okwetuusaaku bye yeetaaga, obulamu bumubeera bulungi. Aye okuzuula obukombe n’ekiwula kuba kirungi. 19Eriina ly’omuntu aliku abaana lisobola okumanhikana, n’ery’ole agundhiegho ekibuga lyona lisobola okumanhikana. Aye okuzuula amagezi n’ekiwula okuleetera eriina ly’omuntu okumanhikana einho.
Okuba n’ebyayo n’amasamba ag’ebirime, bireetera omuntu okuba n’ekitiibwa.40:19: Mu bighandiiko by’Oluheburayi mulimu Aye okuzuula amagezi … okuba n’ekitiibwa. Aye mu bighandiiko by’Olugureki ebyo biziramu. Aye ekiwula bulungi n’okuba ng’oli ni mukazi wo y’ogonza.40:19: Mu bighandiiko by’Oluheburayi mulimu mukazi wo y’ogonza. Ate mu bighandiiko by’Olugureki mulimu mukazi aziraku kikyamu. 20Omwenge ogw’emizabbibu n’enhembo bisobola okuleetera omuntu okusangaala. Aye okuba n’eisanhu mu bufumbo40:20: Mu bighandiiko by’Oluheburayi mulimu eisanhu mu bufumbo. Ate mu bighandiiko by’Olugureki mulimu Aye okugonza amagezi. n’ekiwula.
21Endere n’entongooli binhumisa enhembo, aye amamiro amalungi gasinga byombi.
22Amaiso ganhumirwa okulingirira ebintu ebirungi n’eby’ekitiibwa. Aye ebyo byombi tibituuka ku isubi ito eriri kutoolereza okumera mu kuba eirungi okulingirira.
23Mukagwa wo ni muliraanwa wo y’obita naye, bombi baba balungi y’oli. Aye mukazi wo40:23: Mu bighandiiko by’Olugureki mulimu mukazi wo. Ate mu bighandiiko by’Oluheburayi mulimu mukazi wo omugezi. awula abo bombi.
24Aboluganda n’abantu abayamba banaibwe, ba mugaso y’oli mu biseera ebizibu. Aye bw’oba n’empisa ey’okugabiranga abaavu, ekyo kiba kya mugaso inho y’oli n’okusingagho.
25Omuntu okuba ni zaabu ni feeza kimuleetera okuwulira ng’ali ghagumu. Aye ole okugheebwa amagezi amalungi n’ekiwula bukalamu.
26Obukombe n’amaani bireetera omuntu okuba omugumu. Aye okutya Musengwa n’okusinga kwesigika. Omuntu bw’atya Musengwa aba amaze, nga takeetaaga buyambi bundi. 27Okutya Musengwa kuli ng’oti n’omusiri mwe bakungula enkabi, era kuvaaza omuntu ekitiibwa ekiwula ebitiibwa byonabyona eby’oku nsi.
Okusabiriza
28Mwama wange, obulamu otabutambulizanga ku kusabiriza. Omala gafa otasabiriiza. 29Omuntu ateegerera omuntu owundi n’abe amughenga okulya, okubaagho kwe ku nsi tikugwaniire kwetebwa bulamu naire. Omuntu oyo aba yeeyonoine olw’okulyanga emere ey’omuntu owundi. Era ole bw’aba ategeera nga baamugundhula bukalamu, yeesambira irala ekintu ekyo. 30Omuntu azira nsoni awoomerwa inho okusabiriza, aye munda mule aba ali kusiriira.