4
1Mwana wange, otakupankupanianga bintu bya mwavu, waire okukaluubirizanga ali mu bwetaavu ng’olwisaagho okumugha bye yeetaaga. 2Otalumyanga muntu ali endhala, waire okuleeteranga ali mu bwetaavu okusungughala. 3Otayongeranga ku bizibu bya muntu ali na nnaku, oba okulwangagho okugha ali mu bwetaavu. 4Otalobanga kugabira muntu adaagadaaga ng’akusabye, oba okulobanga okuyamba omwavu. 5Otalinganga bw’ere n’oloba kuyamba ali mu bwetaavu, era otaleeteranga muntu kukukolimira; 6kuba bw’alikukolimira ng’ali n’enaku ku mwoyo, Omutonzi we aliwulira okusaba kwe. 7Kolanga omukwano eri abantu ba Katonda nga beesoloiza okumusinza, era okutamyanga inho omutwe gwo okugha abantu abakologho ekitiisa. 8Wulirisanga abaavu bye bakoba, era obairengamu bulungi n’eiwooyo. 9Ababisibwa obubi obawonianga abo abababisa obubi, era waasalanga emisango ng’oli mugumu aghazira kutya naire. 10Bamulekwa babisenga ng’oti n’abazaire baibwe beene bwebandibabisiisa, ni banamwandu ng’oti ni baibaibwe beene bwebandibabisiisa. Olwo oliba ng’oti oli mwana w’ole Ali Ghaigulu Yeene, era alikugonza okusinga n’inhoko bw’akugonza.
Amagezi musomesa mwene
11Amagezi galeetera ole aganoonia okuba n’ekitiisa, era gaamulabirira. 12Omuntu yeenayeena bw’agagonza, aba agonza kuba mulamu. Era ole bw’awuuna okugaagala, afuna eisanhu eritaloodheka. 13Omuntu yeenayeena ageekalangulaku aligheebwa ekitiisa. Musengwa alita enkabi mu buli kifo amagezi kye gajaamu. 14Buli akola bye galagira aba mugheereza w’ole Omutukuvu. Era Musengwa oyo, agonza ole yeenayeena agagonza. 15Ole agondera bye gakoba, aidha kusalanga ensonga bukalamu. N’ole agataaku omwoyo, aidha kubanga mu miraala. 16Oyo ageesiga aligafuna, ni baidhukulu be boona baasigala nga bali nago. 17Amagezi ago galisooka kumuleetera kutya nga gamubisa mu ngira edhiidhwire ebizibu, era gaamuleetera n’okudaazibwadaazibwa nga gamukangaivula. Okutuusa lwe galimwesiga nga gamuleba n’ebiragiro byago. 18Olwo gaira y’ali butereevu, gaamwoleka ebyama byago, era gaamuleetera okusangaala. 19Aye bw’alidaaliima galimulekulira bw’agho, gaamuleka yaazikirira.
Okwekakasa aghazira kutya
20Mwana wange, kolanga ebintu mu biseera ebituufu. Aye weekuumenga okukola ebibi era oteenhoomanga; 21kuba okwewombeeka kuba kwa kitiisa era kusiimibwa, aye okwenhooma kuleetera omuntu okugwa mu kibi. 22Olwaniriranga ekikyo, era otaganhanga muntu kukuleetera kufiirizibwa. 23Otasirikanga busirike ng’ate ekiseera ekituufu eky’okwogera kituuse, era otakwekanga magezi go; 24kuba amagezi go bagamanhira ku by’oyogera, n’obutegeevu bwo baabuwulirira mu bibono ebikuva mu kanwa. 25Aye otatakanianga mazima, era idhukiranga nga ghaligho by’otaidhi. 26Otagemebwanga nsoni kwatula bibi byo, era otamalanga biseera kulobera mwiga kukuuluula. 27Otaganhanga musiru kukufuga, waire okuboolanga mu bafuzi nga weekubira ku luuyi olw’owundi. 28Lwaniriranga ekituufu ni bwe kiba nga kisobola okukuviiramu okufa, olwo Musengwa Katonda weena aidha kukulwaniriranga.
29Bw’obanga ng’oli kwogera, otalokompokanga bwa gabono nga tiwegendereza, era otagayaaliriranga by’oli kukola n’otabitaaku mwoyo. 30Oteebisanga mu maka go ng’oti mpologoma, oba buli kiseera okunoonereza ebisobyo ku bagheereza bo. 314:31: Bik 20:35Otayandhuluzanga ngalo dho kufuna kintu, ate n’omalanga n’odhifunhamu bwa kifunsi ng’ekiseera eky’okusasula kituuse.