39
1Aye omuntu eyeeghaayo okwega Amateeka ga Katonda Ali Ghaigulu Yeene aba wa ndhawulo. Yeekebeedha amagezi g’abaghandiisi ab’eira, era yeemalira inho ku kumanha eby’obulanzi. 2Agema mu mutwe endhogera edh’abantu abamanhikaine einho, era yaakuguka mu kuvuunula enfumo. 3Anoonereza amakulu ag’omunda einho agali mu nsambo, era yaasobola okuzuula ebiri mu nfumo nga bizibu bya kutegeera. 4Agheereza mu bantu abakologho, era olwisi yaaba ghalala n’abafuzi. Yaakyala mu nsi edh’abamaghanga agandi, nga yeetegereza ebirungi n’ebibi ebiri mu bantu. 5Afaayo inho okuwuuna okusituka mu buliri, yaasaba Musengwa Omutonzi we oyo Ali Ghaigulu Yeene amusonighe ebibi bye. 6Kale ni Musengwa oyo omukologho bw’aba ng’aganhie, aidhuza omuntu oyo okutegeera. Olwo yaayogera eby’amagezi nga bya kulalakulala, era yeebaza Musengwa ng’amusinza. 7Era omuntu oyo aidha kugalagiranga abantu, abaghenga amagezi, era yeefumintirizenga ku byama bya Musengwa. 8Aidha kwolekanga nga bweyayega, olw’ebyo by’anaasomesanga, era yeesiimirenga mu Mateeka ga Musengwa ni mu ndagaano ye. 9Abantu kamaala baidha kumusaakanga olw’amagezi ge era tigaja kumuvaaku, kuba abantu ab’ense dhoonadhoona edhiriiririra baidha kumwidhukiranga. 10Abamaghanga agandi baidha kughayanga ku magezi ge, era abantu nga beesoloiza okusinza baidha kumusaakanga. 11Bw’aliba aghangaire n’atuuka ku bukaire, alija okufa ng’amanhikaine inho okusinga abantu abandi lukumi lulamba (1,000). Aye ni bw’alifa ng’abaire akaali kumanhikwa, era aliwulira mule nga n’agho.
Olwembo olusaaka Katonda
12Nkaali na bingi eby’okwogera bye ndowooziizaaku, kuba ndi na kamaala ebindidhwire. Ndi mwidhuvu ng’oti mwezi mukulu. 13Mumpulirise imwe abaana abatya Katonda. Mukule mube ng’oti kimuli kya roza ekikulira ku mbali okw’omwiga ni kireeta amakaba amalungi. 14Era muteeku ebimuli ebiri ng’oti n’ekimuli ekyetebwa liri, muveeku akawoowo ng’oti ka bubbaani. Musaakenga Musengwa olwa byonabyona by’akola. 15Mulangirire ekitiisa kye nga mumusaaka olw’okumusiima. Mwembe olwembo luno nga mukubiraku n’entongooli, muti:
16Byonabyona Musengwa bye yakola birungi inho,
era byonabyona by’alagira bituukirizibwa mu kiseera kyabyo.
17Ghatabangagho abuuza lwaki ebintu biri nga bwe biri.
Ebibuuzo ebyo bija kwiribwamu mu kiseera kyabyo ekituufu.
Musengwa yalagira bulagire, amaadhi geebunga emungo,
era yaayogera bwogere, geesimba ng’oti bimante byene.
18Kyonakyona ky’alagira bakikoleragho saawa yeene eyo.
Ghazira asobola kuziyiza maani ge agawonia kukola.
19Abona buli muntu by’akola,
ghazira kintu ky’osobola kumugisaaku n’atakibona.
20Byonabyona aba abibona okuva eira n’eira okutuusa ebyanda n’ebyanda,
ezira kigwagho bugwe ni kimuzindula.
21Ghatabangagho abuuza lwaki ebintu biri nga bwebiri,
kuba buli kintu kiriku omugaso ogwakitonza.
22Enkabi dhe dhiri ng’oti n’omwiga ogubanze
ni gukukuuluulira mu itaka ery’olubbalangu ni gulinoza obukalamu.
23Akyusa amaadhi agabaire amalungi gaafuuka ga luunhu,
era akyusa obusungu bwe yaabwolekeza amaghanga.
24Abo abatya Katonda, engira dha Katonda dhibabeera ntereevu,
aye eri ababi dhiba dhiidhwire mitego.
25Okuviira irala mu mainhama yakola ebirungi nga bya balungi,
era yaakola ebibi nga bya boonooni.
26Ebyetaago by’omuntu ebikulu biri:
amaadhi, omuliro, ekyuma, omuunhu,
emere, omudheenene gw’endhuki, amata,
omwenge ogw’emizabbibu, ebivaalo, n’omuzigo ogw’ebibala eby’emiti emyoliva.
27Ebintu ebyo byonabyona birungi eri abatya Katonda,
aye bifuuka bibi eri aboonooni.
28Ghaligho empewo edhaatondebwa nga dha kuleeta bibonerezo ku nsi,
era ghe dhibise dhireka nga dhitenteinegho olw’obukambwe bwadho
obungi einho.
Mu kiseera eky’okusaliramu omusango dhitoolayo amaani gaadho goonagoona
dhaagakozesa,
olwo dhaaleetera obusungu bw’oyo eyadhitonda okwika.
29Omuliro n’omugozi n’endhala ni kawumpuli,
byona byatonderwa kubonereza.
30Era n’ekirala n’ensolo enkambwe ni siga n’emisota egy’obusagwa,
era n’empiima ezikiriza abatatya Katonda.
31Ebintu ebyo biwulira eisanhu okukola Katonda by’abiragira,
era saawa yoonayoona biba byetegefu okumugheereza ku nsi.
Ekiseera kyabyo bwe kituuka, tibidheemera kiragiro kye.
32Ebyo nabikakasa ira, naabirowoozaaku inho, era naamala naabighandiika.
33Ebintu byonabyona Musengwa bye yakola birungi,
era agha buli muntu ebyetaago bye mu kiseera ekituufu.
34Ezira kukoba mbu kino kibi okusinga kire,
kuba buli kintu kirungi mu kifo kyakyo ekituufu.
35Kale ni mpegaano mwembe n’omwoyo gwaimwe gwonagwona, enhembo edhisaaka Musengwa,
musaake eriina lye.