38
Obulwaire n’obulezi
1Abayigha mubaghenga ekitiisa ekibagwanira, kuba Musengwa n’eyabatondera okukolanga omulimo ogwo. 2Katonda oyo Ali Ghaigulu Yeene n’abagha okuwonia, era bakyabazinga baabasasula olw’ekyo. 3Obukugu bwaibwe bubagheesa ekifo ekya ghaigulu, era abantu abakologho babataamu ekitiisa inho.
4Musengwa yatonda obulezi mu nsi, era omuntu ategeera taloba kubukozesa. 538:5: Kuv 15:23-25 Olundi omuti obuti, tigwafuulaku maadhi agaali gakaagha ni gawooma, olwo ni gwoleka buyinza bwa Musengwa? 6Musengwa oyo yagha abantu okumanha obulezi, olwo tumusaakenga olw’ebyewuunhisa by’akola. 7Mwene abakozesa okuwonia n’okumalagho obulumi. 8Omukugu mu by’obulezi atabula ebiti eby’obulezi, mwavaamu obulezi obuwonia. Kale Katonda by’akola tibikoma, era oyo n’aleetera eby’oku nsi okuba ebiramu.
9Mwana wange, bw’olwalanga otakigayaaliriranga. Osabanga Musengwa, era alikuwonia. 10Olekeranga okukola ebibi waakolanga ebituufu, waatukuzanga omwoyo gwo gwawaamu okwonoona kwonakwona. 11Oghangayo ekigheebwayo eky’obubbaani n’obuwunga obuseereibwa obukalamu obukola ng’ekiidhukizo, waateerangaku n’omuzigo nga bw’osobola. 12Memale ni waayetanga omuyigha kuba Musengwa n’eyamutonda, era waaloba kumuganhanga kuva gh’oli kuba omwetaaga.
13Ghaligho ekiseera lwe kituuka obulamu bwo bwabaagho lwa bukugu bw’abayigha, 14kuba boona basaba Musengwa abasobozese okulekeza obulumi bw’abalwaire, babawoneze irala. 15Aye omuntu oyo akola ebibi mu maiso g’Omutonzi we, agwananga yaalwala era yaasigalanga mu buyinza bw’omuyigha.
Okulira abafu
1638:16-23: Sir 22:11-12 Mwana wange, omuntu bw’afanga ogwaine okumuliranga. Okubanga empungu waawowoola okwoleka ng’enaku ekugemye inho. Otegekanga omulambo ogwo mu nsambo egwaine, era waabangagho mu kuziika. 17Ogegenganga inho era waawowoolanga amaziga, okumala enaku edhigwaine okulira omuntu oyo. Omuliranga olunaku lulala oba ibiri, abantu balobe kukwogeraku. Aye bw’omalanga weegangamulanga waaguma. 18Enaku esobola okunafuya embeera ey’obulamu bwo, yaakuviiramu n’okufa. 19Omuntu wo bw’akufaaku osigala ng’oli mu nnaku okumala entangama, waasigala agho ng’oziramu maani era waalwa waayavughala n’okwavughala.
20Otaganhanga nnaku kukusigala ku mwoyo. Gyebingeeku ekuvengaku, era oidhukirenga oti obulamu bwo bwona bulituuka ku nkomerero. 21Omuntu amaze okufa aba takaira, era okunakughala kwo kwonakwona kuzira kalungi ke kumukolera naire, okutoolaku okwongera okulumya iwe mwene. Ekyo otakyerabiranga. 22Ekiseera kiidha kutuuka weena ofe ng’oti n’oyo bw’afiire. Olwaleero lubaire lulwe, olwaidho lulwo. 23Omuntu bw’amala okufa n’awuumuzibwa, olwo eby’okumwidhukira bigwaine bikomenga agho. Bw’amalanga okuja, ogumanga omwoyo weenaliza.
Okweyongera okukuguka mu kusoma ni mu kukola emirimo
24Omuntu ali ku misomo yeeyongera obugezi ng’afunie ebiseera ebisoma. Era okusobola okufuna amagezi geene, ali n’okukendeeza ku bintu ebindi by’akola. 25Omuntu akola ogw’okwaya n’ogw’okulima asobola atya okufuna amagezi, nga kye yeenhumiririzaamu kya kugema luti lusongovu na kusindiikiriza nte dhitambule nga dhikola emirimo, era nga n’olughayo lwe lwonalwona luli bwa ku nte? 26Omuntu oyo aja yaalimisa ente na mwoyo mulala, obulime yaabutegeka bukalamu. Era yaatwala ekiseera kinene ng’ali kuliikiriza ensolo edho emere.
27N’omukozi ow’ebifaananie yeena atyo. Akola na mwoyo mulala omusana n’obwire, yaatema era yaaseena amabaale ag’omughendo. Yaagakolamu ebintu ng’empeta edhikozesebwa, obumanhiso n’ebintu ebindi kamaala. Era yaata inho omwoyo ku kusiiga ebifaananie ebiri ng’oti bya bintu biramu byene. Ebyo abikola n’obwegendereza era yaalwiragho irala okutenduka okutuusa lw’amaliriza omulimo gwe eyo mu bwire einho.
28N’ekirala n’omugheesi ng’ali ku kyuma kye kw’akontera ebyuma ebyengereire. Amalira ebirowoozo bye ku kuyiiya ky’aja okukola mu kyuma ekimaze okwengerera. Omuliro gumubabula oluwutu ku mubiri, eno nga bw’agezimulira mu itumbi. Okukonta kw’enhundo kumuwaawaaza amatu, eno ng’amaiso agataire ku ky’ali kugheesa ekiri kuja nga kivaayo empolampola. Akola omulimo gwe na omwoyo mulala, yaalwiragho irala okutenduka nga yeegendereza, okutuusa lw’agumaliriza eyo mu bwire einho.
29N’omuwumbi yeena atyo. Atyama gha nkede ye y’awumbiraku, yaagikulungula n’ebigere bye. Afaayo inho ku mulimo gwe ng’ayenda okubona bintu bimeka by’asobola okuwumba n’abimaliriza. 30Atyanka eitosi n’ebigere bye, yaaliwumbamu ky’ayenda n’engalo dhe. Yaakisaania bukalamu n’omwoyo mulala, era yaalwiragho irala okutenduka nga yeegendereza, okutuusa lw’amaliriza okulongoosa ekyokero kye eyo mu bwire einho.
31Abantu abo boonaboona bakozesa emikono gyaibwe n’obumanhi bungi, era buli muntu ku abo mukugu mu mulimo gwe gw’akola. 32Abantu abo ngoli baziragho, n’ebibuga ngoli biziragho. Era tighaalibairegho bantu babibaamu, waire abaidha okubikyalamu. 33Abantu abo ti n’abeetebwa okuteesa mu neekobaano dh’abantu, waire okukuzibwa ni baba mu bifo ebya ghaigulu. Tibakola gwa bulamuzi era bazira bumanhi mu bya mateeka. Baziraku kibooleka nga baasoma oba nga bagezi, era tobawulira nga bakozesaaku ku nsambo naire. 34Aye ate ng’emirimo gye bakola n’egigemerera ensi eno yaaba ghalala. Era bwe basaba, okusaba kwaibwe kuba kugema ku nsambo ye bakolamu emirimo gyaibwe.