37
Bakagwa bo abaguya
1Omuntu yeenayeena asobola okukukoba ati: “Zeena ndi mukagwa wo.” Aye bakagwa bo abandi beeyeta bwete, aye nga ti bakagwa bo beene. 2Mukagwa wo y’obita naye bw’amala n’afuuka omuzigu y’oli, eyo teba nnaku yeene eita n’okwita? 3Bwenebwene omwoyo omubi ogwo lwaki gwakolebwa, ni gubunia mu nsi obuguya? 4Abantu abandi baba bakagwa bo ng’oli mu masanhu, aye mu biseera ebizibu bakwefuulaku baaba bazigu bo. 5Mukagwa wo omutuufu, n’oyo akuyambaku okulwanisa omuzigu era n’akulwanirira mu lutalo. 6Oteerabiranga mukagwa wo ng’oti n’oyo mu mwoyo gwo, era omwidhukiranga ni bw’obanga ng’ofuuse mukombe.
Weegenderezenga amagezi ge bakugha
7Kiisi muwi wa magezi asuuta gage. Aye abandi bagha amagezi nga bali kwenooneza byaibwe ku bwaibwe. 8Weegenderezenga omuntu aidha y’oli okukugha amagezi. Sookanga kuzuula ensonga ye muliku gh’emugemeraku, kuba tomanha bw’aba ng’ali na kirowoozo kya kwenooneza bibye mwene. Olwo n’akuleetera kugwa ghabi 9ng’akukoba ati: “Ekyo ky’oli kukola n’ekituufu”, aye ate yaamala yaira ere yaateegerera abone ebinaakutuukaku.
10Oteebuuzanga ku muntu aboneka ng’akubuusabuusa, era otaghanga muntu akugemerwa nsaalwa magezi. 11Oteebuuzanga ku mukazi bigema ku mughalikwa we,
oba okwebuuza ku muntu omuti ebigema ku ntalo,
oba omusuubuze ebigema ku mighendo gy’ebintu,
oba omuguzi ebigema ku kutunda,
oba omukodo ebigema ku kusiima,
oba omukambwe ebigema ku kusaasira,
oba omunafu ebigema ku kukola.
Abo boonaboona amagezi ge bakugha otagajiirangaku naire.
12Aye ekiseera kyonakyona weesigenga omuntu atya Katonda, era y’oidhi ng’agondera ebiragiro bye. Ng’afaayo okubona ng’oli bukalamu, era ng’akulumirwa ebintu nga bikulemye. 13Jiiranga ku mwoyo gwo nga bwe gukukoba, kuba ezirayo agusinga kuba mwesigwa y’oli. 14Olwisi omwoyo gwo gukukobera ebituufu, okusinga ebyo abakuumi omusanvu bye bakukobera nga bali ghaigulu ku kituuti ekireeyiriri ekirengererwaku. 15Aye ekikulu ekisinga byonabyona, sabanga oyo Ali Ghaigulu Yeene akwolekenga ekituufu eky’okukola.
Ebigema ku magezi n’okwekakasa
16Buli lw’obanga ng’oja okukola ekintu, omalanga kulowooza na kwebuuza. 17Ebintu ebyoleka omwoyo bwe guja nga gukyuka 18biri bina: ebirungi n’ebibi, obulamu oba okufa. Aye nga byonabyona lulimi n’olubifuga ekiseera kyonakyona.
19Omuntu asobola okuba omugezi yaasomesa n’abantu kamaala, aye nga mwene azira kalungi koonakoona ke yeegasa naire. 20Era asobola okuba omugezi mu bibono, aye abantu baamukyagha n’ak’okulya kaamubula. 21Ekyo kibaagho Musengwa bw’aba ng’akaali kumuleetera kusiimibwa, era ng’akaabulaku okuba omugezi. 22Ghaligho omuntu eyeemanha ng’omugezi, era yaalaga nga bwe yeekakasa einho mu ebyo by’aidhi. 23Aye nga mu butuufu omuntu omugezi n’aba omusomesa wa baine, era abantu abo bamwesiga nga by’ali kubeegeresa bituufu. 24Abantu boonaboona basaaka omuntu ng’oti n’oyo, era baamwogeraku ng’ow’enkabi. 25Obulamu obw’omuntu buba bwa nnaku mbale bubale, aye obulamu obw’eighanga Isiraeli tibubalika naire. 26Omuntu omugezi amatiza abantu baamwikiririzaamu, era eriina lye baidha kuliidhukiranga ebyanda n’ebyanda.
Okufuga omwoyo ogw’okwenda okulya
27Mwana wange, fuganga obulamu bwo olobenga kulya kintu kyonakyona ky’oidhi nga kibi y’oli, 28kuba tikiri nti buli mere eikirizagania na buli muntu. Era tikiri nti abantu boonaboona bawoomerwa mere ya bika birala. 29Otabanga muntu ataiguta, ayenda okulya kiisi kintu kiwooma. Oteemalangamu lwa bya kulya, 30kuba bw’olya einho olwala bulwale era bw’obitiriza amalyalya enda ekutogota. 31Amalyalya gaviiriiremu abantu kamaala okufa. Aye abo abageeghala baghangaala.