36
Okusabira Isiraeli
1Wo Musengwa Katonda wa byonabyona, tugemerwe ekivunika. 2Leeteranga amaghanga goonagoona okukutyanga. 3Kozesa omukono gwo obonereze abantu abamaghanga agandi, obooleke amaani go. 4Nga bwe wabita mu ife okubooleka nga bw’oli omutukuvu, otyo bw’obe obite ni mu beene otwoleke nga bw’oli omukologho. 5Wo Musengwa, ka bamanhe ng’oti niife bwe twidhi obukalamu, ng’ezirayo Katonda wundi okutoolaku iwe. 6Iramu buyaaka okukola obumanhiso, oyongere n’okukola ebyewuunhio, oyolese ekitiisa ky’amaani go. 7Siikuula obusungu bwo omalire ekiruyi kyo ku batukiriga, obasaanizeegho irala abazigu abo. 8Tuusa mangu olunaku n’ekiseera ekituufu kye wategeka, abantu balomboodhenga eby’amaani by’okola. 9Otaganha muntu waire omulala ati ku bazigu abo kusigalagho. Abo abatuusa akabi ku bantu bo, boonaboona bazikirize. 10Niantula emitwe gy’abafuzi abo abazigu, abakoba mbu: “Ezirayo muntu wundi alimu makulu okutoolaku ife.”
11Soloza ebika bya Isiraeli byonabyona, obiirize ebiketezo byabyo bye wabagha eira mu mainhama ng’obusika. 12Wo Musengwa, gemerwa ekivunika abantu Abaisiraeli abeetebwa ababo, be watuusa ni ku kubeeta omwana wo omuberi. 13Saasira ekibuga kyo Yerusalemu ekitukuvu, ekifo kyo ky’obaamu. 14Idhuza olusozi Sioni ebyewuunhisa by’okola, oidhuze n’eisinzizo lyo ekitiisa kyo. 15Ba mudhulizi w’abo be watonda mu mainhama, otuukirize abalanzi bye baayogera mu liina lyo. 16Abo abakwesiga baghe empeera, okakase abalanzi bo bye baayogera nga bya mazima. 17Wo Musengwa, wulira okusaba kw’abagheereza bo olw’enkabi Aaroni dhe yasabira abantu bo. Olwo abantu boonaboona ku nsi baja kumanha nga niiwe Musengwa, Katonda ow’ebyanda n’ebyanda.
Okulondagho omukazi ow’okufumbirwa
18Enda esobola okulya kiisi kika kya mere kyonakyona. Aye ebika by’emere ebindi biba birungi okusingaku ebindi. 19Ng’olulimi bwe lukomba ku bika by’emamba ni lwawulagho empooma yaayo, n’omuntu omugezi yeena atyo bw’abona amangu ebibono eby’obuguya. 20Omuntu ow’endowooza enkyamu aleetera abandi enaku, aye ole ali n’obumanhirivu amanha bw’amwesasuuza. 21Omukazi asobola okuganha omusaadha yeenayeena yaaba iba. Aye abaghala abandi baba balungi okusingaku abandi. 22Obulungi bw’emboneka y’omukazi busangaaza okubona, era ezirayo kibusinga mu bisanhusa abantu. 23Omukazi bw’ayogeza ekisa n’eiwooyo, olwo ghaba nga ghaziragho musaadha wundi ali na nkabi ng’oti ni iba w’omukazi oyo. 24Omusaadha bw’afuna omukazi aba afunie ekisinga bulungi mu byonabyona, ng’oyo n’omuyambi amugwaniire era empango kwe yeesiira.
25Ebintu by’omuntu bwe bitabaaku kikomera babinhagulula. N’omusaadha bw’atafuna mukazi, aja ng’atambulatambula eyo atyo bw’asinda. 26Naani eyeesiga omunhazi aluga obuluge okuva mu kibuga ekindi okwira mu kindi? N’omusaadha azira maka, aja ng’asula buli ghe bumuzibirira, naani asobola okumwesiga?