35
1Omuntu bw’akuuma Amateeka aba ng’oti n’aghaireyo ebigheebwayo ebingi. Era ole bw’agema ebiragiro aba ng’oti n’aghaireyo ekigheebwayo olw’okutabagana ng’omusengo. 2Omuntu bw’asasula mwine amukoleire ebirungi ng’amukoleramu ebirungi, aba ng’oti n’aghaireyo ekigheebwayo eky’obuwunga obw’engaano obuseereibwa obukalamu. Era ole bw’agabira abaavu aba ng’oti n’aghaireyo ekigheebwayo olw’okwebaza ng’omusengo. 3Omuntu bw’ava kukukola ebibi n’abyesambira irala, asangaaza Musengwa n’ebibi bye byasoniyibwa.
4Aye otaidhanga mu isinzizo lya Musengwa ng’ozira kigheebwayo, 5kuba mu Mateeka olagirwa okuleetaku ekintu. 6Omuntu akola ebituufu bw’aghaayo omusengo gwe, gutukuza alutaari n’akawoowo kaagwo katuuka eri oyo Ali Ghaigulu Yeene, kaamusangaaza. 7Musengwa oyo asiima omusengo gw’omuntu akola ebituufu era tagwerabira naire. 8Kale omughanga ekitiisa ng’omugheereza ebigheebwayo n’omwoyo mulala. Otabanga mukodo ng’oli kughaayo ku birime byo by’osooka okukungula. 935:9: 2 Kor 9:7 Kiisi kirabo okighangayo ng’oli musangaavu. Era otoolanga ekintu kirala kirala ku buli bintu eikumi by’ofuna waakighangayo ng’omoga masanhu meereere. 10Oirizangaku oyo Ali Ghaigulu Yeene ku bibyo, nga mwene yeena bwe yakugha. Waabimughanga n’omwoyo mulala nga bw’osobola, 11kuba Musengwa oyo buliidho asasula era alikusasulamu emikuzi musanvu. 12Aye otagezangaku kumugha nguzi, waire okwesigulira ku kutoola ekintu kye wafuna mu kukupankupania mbu okigheeyo ng’ekigheebwayo. Ebyo byonabyona talibiikiriza naire, kuba mwene n’omulamuzi era aziramu kwekubira.
Katonda asala mu butuufu
13Katonda tasaliriza mwavu era awulirisa okusaba kw’oyo ye babisiisa obubi. 14Tasobola butafaayo nga bamulekwa ni banamwandu bamusabye. 15Olowooza oti amaziga agakuuluulira ku matama ga namwandu, gaba tigali kughaghabira oyo ali kumuliza?
16Omuntu agheereza Musengwa mu nsambo emuleetera okusangaala, alisiimibwa n’okusaba kwe kwatuuka ni ku bire. 17Okusaba kw’omuntu omuwombeefu kubita mu bire, kwajiira irala kwatuuka ku Musengwa. Era kwabeera irala eyo, okutuusa oyo Ali Ghaigulu Yeene lw’airamu n’asalira abo abakola ebituufu ensonga ng’ajiira ku mazima.
18Musengwa talirwagho era taliguminkiriza bakozi ba bibi. Alitentenatentena abantu abo abazira kisa naire, yeesasuuliza ku maghanga ago. Alisaaniagho olukunkumuli lw’abo abeetwala okuba aba ghaigulu, yaazikiriza obuyinza bw’ababi abo. 19Alisasula kiisi muntu ng’ajiira ku ndowooza ni ku bikolwa by’omuntu oyo. Musengwa oyo aligemerwa abantu be ekivunika, baasangaala ng’asaze omusango gwaibwe. 20Abantu nga bali mu kiseera eky’okudaazibwadaazibwa basangaalira ekisa kye, ng’oti bwe basangaalira ekire ky’amaadhi mu kiseera eky’endoboozi.