34
Ebirooto muzira makulu
134:1-8: Ma 13:1-5; 18:9-14 Omuntu aziramu kutegeera yeerimba ng’asuubira ebiziramu, era yaaloota ng’ameze amaghagha ali kuguluka. 2Omuntu alowooleza mu birooto, aba ng’oti n’ole agezaaku okugema ekinsense oba okubinga empewo agigeme. 3By’obona mu kirooto biri ng’oti n’ekifaananie kyo kye weebona ng’olingiriire mu mbonerwamu. 4Ekintu ekitali kirongoofu kisobola okuvaamu ekirongoofu, waire obuguya okuvaamu amazima? 5Ebirooto, n’okweraguza, n’okuteebereza obumanhiso obw’ebinaabaagho, biziramu makulu naire. Biri ng’oti n’omukazi ali kulumwa okuzaala bwe yeefaanaaniriza obwefaanaanirize mu mwoyo gwe. 6Okutoolaku ng’oyo Ali Ghaigulu Yeene mwene n’akusindikiire ebirooto ebyo otabifangaku, 7kuba ebirooto bibuziizabuziiza kamaala, era abo ababyesiga baaba nga bibasaze. 8Aye okujiira ku Mateeka ga Musengwa kuziramu buguya ng’oti n’obwo, era n’amagezi amatuufu gali mu kwogera mazima.
Okutambula kubona
9Omuntu omugundhufu amanha bingi, n’omuntu ali n’obumanhirivu ayogera bya kitegeevu. 10Ole azira bumanhirivu amanha bitono, aye ole atambwire mu biketezo kamaala kimwongeraku amagezi. 11Mboine ebintu kamaala mu ngendo dhe ntambwire, bye ntasobola na kuloodha. 12Emikuzi kamaala nali mu kabi kata nfe, aye naawona olw’obumanhirivu bw’ebyo bye mbiseemu.
Okutya Musengwa
13Abo abatya Musengwa banaabanga balamu, kuba Musengwa oyo ye beesiga asobola okubalokola. 14Omuntu atya Musengwa aba mugumu ng’aziramu kutiitiira naire, kuba Musengwa oyo ni yenka ye yeesiga. 15Wa nkabi oyo atya Musengwa, kuba aba aidhi y’anaalumukira okufuna obuyambi. 16Musengwa akuuma butatemya abo abamutya, yaabaghanirira n’amaani ge. Yaabawonia empewo ebabula, era yaabakingiriza n’olwota olw’omu kasana ghagati. Yaabakuuma baaloba kwekontola na kugwa. 17Abaleetera okuba abasangaavu, baabaaku akamwenhumwenhu. Era yaabawonia endwaire, yaabagha obulamu n’enkabi.
Okughaayo emisengo
18Bw’otoola ekintu kye wafuna mu kukupankupania n’okighaayo ng’omusengo, oba oleeteire ekigheebwayo ekyo okuba nga kiriku obukyamu era ekitasoboka kusiimibwa. 19Katonda oyo Ali Ghaigulu Yeene tasiima bigheebwayo bya batamutya. Ni bwe baghaayo emisengo emingi einho, ekyo tikimuleetera kubasonigha bibi byaibwe. 20Ole aghaayo omusengo ng’agutoire ku bintu by’abaavu, aba ng’oti n’aise omwana omulenzi nga ni lata we mwene ali kubona ati. 21Emere eba bulamu bwenebwene obw’abaghafu, era ole agibatoolaku aba mutemo. 22Omuntu okutoola ku mwine ekibeesaagho obulamu bwe, buba butemo bwene. N’okwima omukozi empeera ye kuba kumwita kwene.
23Omuntu bw’azimbagho ekintu ate owundi n’akimenhagho, mugaso ki gwebafunanu okutoolaku okufaabiikanira obwereere? 24Ono bw’asaba enkabi ate ole n’akolima, olwo Musengwa awulirisaaku ani ku bombi? 25Omuntu bw’anaaba okwetukuza ng’agemye ku mulambo, aye ate kabiri n’agugemaku, olwo okunaaba okwo kuba kumugasiisa ki? 26Mu nsambo n’endala, omuntu bw’asiiba olw’ebibi bye aye ate kabiri n’akola ebibi byene ebyo, naani aliwulirisa okusaba kwe? Era okwewombeeka kwe okwo kuba kumugasiisa ki?