33
1Ghazira kibi kija kutuuka ku muntu atya Musengwa. Ni bw’alituuka ku buzibu emikuzi n’emikuzi, Musengwa oyo alibumutoolamu. 2Omuntu omugezi takyagha Mateeka. Aye ole aja ng’aguya abantu ati agema Amateeka ago, aba ng’oti n’eryato erisundibwasundibwa kiwunga ku nhandha. 333:3: Kuv 28:30; Sir 45:10 Omuntu ali n’okutegeera yeesiga Amateeka, ng’oti bwe yeesiga ebyo kabona bye yeebuuza ku Katonda ng’akozesa Urimu.33:3 Urimu ni Thummimu: Ebintu bino byombi byateebwanga mu kivaalo eky’omu kifuba kabona kye yavaalanga, era nga bikozesebwa kabona oyo mu kuzuula Katonda ky’ayenda.
4Otegekanga bukalamu by’oja okwogera, olwo abantu lwe banaakuwulirisanga. Okozesanga ebyo ebyakugalagirwa bw’obanga ng’oli kwiramu abantu bye bakubuuza. 5Ebirowoozo by’omusiru byekulungulira ghalala agho, ng’oti n’enkede ey’ekigaali ekighaluzibwa embalaasi bwe yeekulungulira ku musumaali oguba ghagati ghaayo. 6Ole akukiina ati mukagwa wo aba ng’oti n’embalaasi etali nfuge, egufula nga ghaligho omuntu yeenayeena agityaimeku.
Abantu tibafaanana
7Lwaki olunaku olundi luba lukulu okuwulaku olundi, ate nga ndhuba ndala eyo n’eyaka ku nnaku dhoonadhoona mu mwaka? 8Lwa kuba Musengwa yasalagho okudhaawulamu, yaataagho ebiseera eby’endhawulo mu mwaka era yaataagho n’ebibinuko. 9Enaku edhindi yaadhifuula nkulu era ntukuvu, ate edhindi yaadhireka nga dhabuliidho.
10Kiisi muntu yakolebwa mu itaka ng’oti ni Adamu. 11Aye Musengwa mu magezi ge amangi yabataagho nga buli muntu wa ndhawulo era ng’ali n’omulimo ogugwe ogw’endhawulo. 12Abandi yabagha enkabi yaabakuza, abandi yaabatukuza era yaabaseesa kumpi ni mwene. Ate abandi yaabakolimira, yaabatoola mu bifo byaibwe, yaabaisa ghansi. 13Ng’eitosi bwe liba mu ngalo dh’omuwumbi n’aliwumbamu kyonakyona ky’ayenda, n’abantu boona batyo bwe bali mu ngalo dha Katonda. Katonda oyo akolera buli muntu nga mwene bw’aba ng’asazeegho.
14Ng’obulungi bwe bukontana n’obubi, ate obulamu ni bukontana n’okufa, n’omwonooni yeena atyo bw’akontana n’ole atya Katonda. 15Lingirira ebyo byonabyona oyo Ali Ghaigulu Yeene bye yakola: biri bibiri bibiri, nga buli kirala kikontana ni kiinaakyo.
16Ninze nasembayo okwidha, naaba ng’oti n’omuntu ava einhuma mu isamba ly’emizabbibu mwe bamaze okunoga, n’aja nga bw’alonderera egyo egiba gisigaireyo. Aye Musengwa yampa enkabi naawula abandi boonaboona, naidhuza ekikunhiro kyange eky’omwenge gw’emizabbibu ng’oti n’omunozi w’emizabbibu. 17Aye mukimanhe nti tyafaabiikana lwa nze zenka, aye nafaabiikanira abo boonaboona abenda okwega. 18Kale mumpulirise imwe abakologho abakulembera abantu, muwulire kye nkoba imwe abakulira abantu nga beesoloiza.
Okwemalirira
19Ng’okaali mu bulamu buno, otaghanga muntu yeenayeena buyinza kukufuga, k’abe omwana wo, oba mukazi wo, oba muganda wo, oba mukagwa wo. N’ebintu byo otabighanga muntu wundi, kuba tomanha bw’okyusa kirowoozo ate ni kikwetaagisa kubimusaba abikwirize. 20Ng’okaaligho okaagheera, otaganhanga muntu wundi kufuga bulamu bwo. 21Kiba kirungi abaana bo baakusaba ebyetaago, okusinga iwe okubasaba. 22By’okola byonabyona bituukirizenga bukalamu, olobe kulekanga kitiibwa kyo kusiigibwa nziro. 23Oteeganga ekiseera eky’obulamu bwo ekisembayo kyatuuka agho ng’oli kumpi kufa, memale waagabaniamu ebintu byo mu basika.
Ensambo ey’okubisaamu abairu
24Endogoyi bagigha eisubi, bagikuba era baagitwika ebizito. Ate omwiru baamugha emere, baamukangaivula era baamugha emirimo. 25Bw’ogha omwiru wo emirimo takutaghaania. Bw’otamugha kya kukola aba aghansa kukuvaaku aje yeekolere ebibye by’ayenda. 26Ensolo bagita ekikoligo mu nkoto baagisiba n’enkoba yaagonda. N’omwiru omudheemu yeena bamala kumubonereza nga bamusiba mu ndhegere memale yaawulira. 27Omukozesanga emirimo yaaloba kuba agho ng’ali kulera bwa ngalo, kuba bw’aba obwagho ayega magezi ga kukufuukira kizibu. 28Omukozesanga emirimo nga bwe kigwaniire, era bw’adheemanga oyongerangaku ndhegere dha kumusiba. 29Aye otakambughaliranga muntu yeenayeena n’obitiriza, waire okumukola ekintu kyonakyona nga tobalirira. 30Bw’obanga n’omwiru, omubisanga nga iwe mwene bwe wandyenze bakubise, kuba wamugula empiiya dhewafaabiikana okufuna. 31Omubisanga ng’oti bwa muganda wo, kuba omwetaaga abeegho ng’oti niiwe mwene bw’oligho. Bw’omubisa obubi n’akulumukaku, olimwagalira gha?