32
1Bwe bakwetanga okuba omugeni omukulu ku kiiwulo oteekuluntazanga. Aye oba nga agho ng’oti n’abantu abandi boonaboona abaligho, waabalabiriranga bukalamu memale waatyama. 2Bw’omalanga okukola ebikwesiisa ku mukolo, otyamanga mu kifo kyo waasanhukiranga ghalala nabo. Agho balikusiima olw’okukola obukalamu omulimo gwo.
3Bw’obanga nga niiwe osingaku abaligho obukulu mu myaka, osobola okwogera kuba ogwaniire. Aye yogeranga ku by’oidhi obukalamu, ate nga totabulatabula bali kwemba ku mukolo. 4Oteekalanguliranga ku kwogera nga bali kusanhusaaku ku bageni, kuba ekyo ti n’ekiseera ekituufu okweraga nga bw’oli omugezi. 5Eibaale ery’omughendo lye batonietonie ku mpeta ya zaabu ligireetera okuboneka obulungi. N’okwemba kwona kutyo bwe kuleetera embaga eriku omwenge ogw’emizabbibu okunhuma. 6Era eibaale ery’omughendo eryetebwa emeraludo, lye batonietonie ku zaabu, liboneka bulungi. N’enhembo enungi dhoona dhityo bwe dhinhumira ku mwenge ogw’emizabbibu omulungi.
7Bw’oba ng’okaali muto mu myaka otayogeranga, okutoolaku nga kyetaagisa inho. Aye era ni bwe kiba nga kyetaagiisa otaswikanga mu mikuzi ebiri, koodhi nga ghaligho akubuuziiza ekintu memale waamwiramu. 8Oyogeranga bitono aye nga bimalayo byonabyona by’oli kukoba. Weeyolekanga okuba omuntu aidhi, aye era asobola okufuga omunwa gwe. 9Bw’obanga mu bantu abakulu oteebisanga ng’oti oyagayaga nabo, era otayogeranga nga ghaligho owundi ali kwogera. 10Ng’olukuba bwe lusooka okumyansa memale ni lutyabuka, n’ebirungi ebyogerwa ku muntu omuwombeefu byona bityo bwe bimwesookangayo okweyoleka.
11Ovanga ku mbaga mu kiseera ekituufu, otabanga asembyeyo kuvaayo. Oteerwisalwisanga agho, aye ojanga mangu eka 12waaba eyo era weesanhukiza eyo nga bw’oyenda. Aye weeghalanga okukola ekibi eky’okwesuutirizasuutiriza. 13Era oidhukiranga okwebaza Omutonzi wo eyakugha ebirungi bye ekyodoodo atyo.
Okuvuunula amateeka
14Omuntu atya Musengwa, aikiriza Musengwa oyo by’amugalagira. Era Musengwa oyo asiima abo abawuuna enkyo okumusaba. 15Ole agema einho Amateeka, Amateeka ago gamukuuma, aye omuguya ageekontolaku bwekontole. 16Abatya Musengwa bakola amazima, era ebikolwa byaibwe eby’obutuufu biidha kwakanga ng’oti ntaala. 17Aye aboonooni tibenda kubanenia, beegemya bwa busongasonga bwa kukola beene bye benda ebitajiira ku Mateeka.
18Omuntu omutegeevu tagayirira bidhuubo bya bandi. Aye ole omunhoomi eyeetwala okuba owa ghaigulu, azira ky’atya naire. 19Osookanga kulowooza memale waakola ekintu, era oteidhusanga ng’omaze okukikola. 20Otagemanga njira ekutwala mu kabi, era oteereeteranga kwekontola kugwa mikuzi ebiri. 21Weegenderezanga engira y’oli kubitamu, ni bw’ebanga nga ndhooyoote. 22Buli kiseera weetegerezanga y’oli kuja. 23Weekuumenga mu byonabyona by’okola, kuba okwo n’okugema ebiragiro bya Musengwa.
24Omuntu bw’aikiririza mu Mateeka, agema ebiragiro bya Musengwa. Era ole eyeesiga Musengwa azira ky’alifiirwa naire.