31
Ebizibu ebiidha olw’okuba omukombe
1Okweraliikirira eby’obukombe kuleetera omuntu okugoogomba, n’endoolo dhaamubula. 2Okweraliikirira ebintu ebivaamu empiiya kubuza omuntu ekiwuumulo, era ng’oti n’obulwaire bwona bwe bumuleetera okubulwa endoolo. 3Abakombe bafaabiikana okufuna empiiya. Era bwebawuumula beedhalabya olw’empiiya edho. 4Abaavu boona bafaabiikana okufuna ak’okulya. Aye bwebawuumula basigala nga bakaali baavu.
5Omuntu agonza einho empiiya tabulaku kisobu ky’akola, era okululunkanira obukombe kw’aba nakwo kumuleetera okudaaliima. 6Abantu kamaala akabi kabaidhira kaabatuukaku maiso ku maiso, baazikirira olw’empiiya. 7Empiiya dhiri ng’oti kitimuguunha mu ngira, abo abadheemaliraku einho kwe beekontola ni bagwa. Era buli musiru okwo kwe yeekontola.
8Wa nkabi omukombe oyo azira kibi kye bamwogeraku, era atalulunkanira mpiiya. 9Omuntu ng’oti n’oyo naani, tumweisuuse olw’okukola ekyewuunhisa kityo yenka ati mu bantu boonaboona? 10Bwe ghaba nga ghaligho eyalebwa mu nsambo ng’oti n’eyo aye n’atagwa, agwaine yeesuute. Naani oyo eyali nga wa idembe okukola ekibi aye n’atakikola? 11Bwenebwene omuntu oyo ebintu biidha kumujiiranga bukalamu, era abantu nga beesoloiza baidha kulomboodhanga eby’ekisa by’akola.
Engeri ey’okwebisaamu ku biiwulo by’embaga
12Bw’otyamanga ku kiiwulo ky’omuntu omubbede, otayasaamiriranga n’otuuka na kukoba oti: “Ha, bona eby’okulya ebyo byonabyona.” 13Idhukiranga nti kya mpisa mbi okuba n’eriiso ery’omuwuudu. Mu bitonde byonabyona ezirayo kiwula liiso kuba na muwuudu. Ekyo n’ekirireeteranga okulira amaziga emikuzi kamaala. 14Otaghaanirizanga mukono kutoola buli kya kulya ky’oboine, oba okukingiriza mwino n’atatuuka ku mere. 15Baino bwe muli ku kiiwulo boona balowoozengaku, era obabisenga nga bwe wandyenze bakubise. 16Olyanga bye bakughaire ng’omuntu, olobenga kudhaiguladhaigula bw’osambusa, kwereetera kukyayibwa. 17Niiwe obe osookenga abandi okumala okulya ng’ow’empisa enungi bw’akola. Olobenga kubasina olw’okuboneka ng’oti toiguta. 18Bw’obanga mu bantu abangi, otagezangaku kusooka bandi boonaboona okufuna eby’okulya. 19Omuntu ow’empisa enungi, akatono akatono kamumala. Olwo bw’aja mu buliri alobe kugheera ng’oti n’aja okutulika. 20Omuntu alya emere engerwagerwa atenduka bulungi endoolo, yaazuuka ku nkyo ng’ali bukalamu. Aye ole eyeesokera emere, mu nda mumuluma ni ku mwoyo kwamwesuukuula, yaasesema n’endoolo dhaamubula. 21Bw’obanga ng’oliire okubitiriza, ositukanga waava ku kiiwulo waajanga weegoga, olwo waawulira bulungi. 22Mwana wange, wulirisa bye ndi kukukoba era otabinhoomerera. Ekiseera kirituuka waaneebaza. Banga mwegendereza mu byonabyona by’okola. Olwo obulwaire tibulikugema.
23Abantu basiima inho omuntu omugabi abagabula eby’okulya, era bwenebwene aba ng’agwaniire okusiimibwa. 24Aye ate abantu b’omu kiketezo boonaboona beemuluguunhiza omuntu abakyaza aye n’akodoghalira eby’okulya, era nga bwenebwene okwemuluguunhia kwaibwe kuba kutuufu.
25Lekanga kunhwa mwenge mungi n’obitiriza, mbu bakubone nga bw’oli omusaadha einho aziramu ntete. Omwenge ogwo guviiriiremu abantu kamaala okuzikirira. 26Ng’obugumu obw’ekyuma bwe bumanhika nga kiinhikiibwa mu maadhi oluvainhuma olw’okwengerera n’omuliro, n’empisa edh’omuntu eyeekuluntaza dhoona dhityo bwe dheeyolekera mu ntaka dh’aiza ng’atamiire. 27Omwenge gw’emizabbibu gusobola okuleetera omuntu obulamu ng’anhweire omugerwagerwa. Obulamu bwandibaire butya ghe guzira? Omwenge gwatondebwa kusanhusa bantu. 28Omuntu bw’agunhwa mu kiseera ekituufu era nga mugerwagerwa, gumuleetera okusagamba yaaba musangaavu. 29Aye bw’agunhwa einho n’abitiriza, gumuleetera bwa bulumi, kusoolasoola na kugwa bigwo. 30Okutamiira kuleetera omusiru okweyongera obusungu, era asobola n’okwerumiriza mwene. Kumumalamu amaani, kwamuleetera okukubwa ebinuubulenuubule. 31Otanenianga mwino nga muli kunhwa omwenge. Otamuleeteranga kusungughala ng’ali kwesanhusaamu. Ekyo tikiba kiseera kituufu kya kumunenezaamu oba okubaaku ni ky’omukoba akukolere.