30
Okukuza abaana
1Omuntu bw’aba ng’agonza mutabane we, amuswanhulamuuku emikuzi egighera, olwo abe ng’asobola okumwesiimisa mu biseera eby’omu maiso. 2Ole akuza mutabane we n’empisa amufunamu omuganhulo, era yaamwesiimisa ng’ali kumwandhula ye bakagwa be. 3Omuntu agalagira mutabane we obukalamu, takoma ku kumwesiimiramu ng’ali ni bakagwa be kyonka, aye aleetera n’abazigu be okumusaalirirwa. 4Lata w’omwana oyo ni bw’afa aba ng’oti tafiire, olw’okuba aba aleseegho mutabane we ali ng’oti ni mwene; 5kuba bwe yali ng’akaali mulamu yasangaalanga inho okubona mutabane we oyo. Kale waire aba ng’afiire, ghazira naire kye yeidhusa. 6Aba aleseegho anaamwesasuulizaagho ku bazigu be, era anaasasula n’ebirungi bakagwa be bye baamukolera.
7Aye ole aginia obuginie mutabane we, aliba yeereeteire mwene obulumi. Era omwoyo guja kumwezindukanga buli lw’anaawuliranga okwasiikana. 8Embalaasi etali nfuge eba ya mpwitu. N’omwana atakuziibwa na mpisa yeena atyo. 9Bw’oyola obubi omwana akukikinalaku, era bw’ozaanha naye obuzaanhe okuleetera bwa nnaku. 10Bw’oira mu kuseka naye buti, ekiseera kija kutuuka akuleetere okulira amaziga olume n’emba olw’obulumi. 11Otamulekera inho idembe ng’akaali muto, waire okusirikira ensobi dhe. 12Omuswanhulangamu ng’akaali muto yaayega okukuwulira, alobe kukudheemera na kukuleetera nnaku. 13Kale yegeresa mutabane wo ayege okukola, olwo alobe kukuleetera kuswala.
Obulamu
14Omala gaba mwavu ng’oli mulamu era wa maani, otabaire mukombe aye ng’odaazibwadaazibwa endwaire. 15Okuba omulamu, ng’oli mu mbeera enkalamu era ng’oli musangaavu, bya mughendo inho okuwula zaabu yeenayeena n’obukombe obungi. 16Ghazira bukombe businga omuntu okuba nga mulamu, era ghazira isanhu lisinga okuba ng’omwoyo gw’omuntu oyo musangaavu. 17Omala gafa weenaliza ebyanda n’ebyanda, otabaire mu bulamu bwa kudaagadaaga na ndwaire etawona. 18Okugha omulwaire emere enungi aye nga tasobola kugirya, kuziramu makulu ng’oti n’okughaayo ebigheebwayo eby’okulya eri ekisinzibwa ekitali Katonda. 19Okughaayo eby’okulya kugasa ki ekisinzibwa ekyo, ekitasobola kulya waire okuwunhiza? Kale, n’omuntu Musengwa y’abonereiza atyo bw’aba. 20Emere agiringirira bulingirire, yaasinda ng’oti n’omulaawe bw’ata omughala omuguna mu kifuba kye n’agheera obw’ekikoowu.
Okusangaala n’okunakughala
2130:21-25: Mul 11:9-10 Oteereeteranga bulumi ng’oira agho okuba mu nnaku. 22Okuba n’omwoyo omusangaavu n’ekireetera omuntu okuba omulamu, kyamuleetera n’okughangaala. 23Sagambanga ng’oli musangaavu weebingeku enaku, kuba ereeteire bangi okuzikirira era eziramu muganhulo naire. 24Ensaalwa n’obusungu bireetera obulamu okukendeera amangu, n’okweraliikirira kwakairisa omuntu amangu. 25Omuntu ali n’omwoyo omukalamu era omusangaavu, alya emere yaamuwoomera era yaagifunamu omuganhulo.