3
Obuvunaanizibwa eri abazaire
1Imwe abaana, mumpulirise nze lata waimwe era mukolenga bye mbakoba. Olwo mwidha kuwonanga okugwa mu bizibu, 2kuba Musengwa yagha balata b’abaana obukumu ku baana baibwe, era yaalagira abaana okuwuliranga bainhaibwe. 3Omuntu yeenayeena bw’ata mu ise ekitiisa, aba alikusasula olw’ebibi bye. 4N’ole yeenayeena bw’agha inhina ekitiisa, aba ali kweterekera bya bukombe. 5Omuntu yeenayeena bw’ata mu ise ekitiisa, abaana be balimuleetera okusangaala era Musengwa aliwulira okusaba kwe yaamwiramu. 6Omuntu yeenayeena bw’awulira Musengwa, n’agha ise ekitiisa era n’aleetera inhina okwesiima, alighangaala. 7Omuntu oyo aja kugheerezanga abazaire ng’oti bwa mwiru waibwe. 83:8: Kuv 20:12Lata wo mughenga ekitiisa mu by’oyogera ni mu by’okola byonabyona, olwo akusabirenga enkabi. 9Enkabi abazaire dhe basabira abaana baibwe, dhireetera amaka g’abaana okuba amagumu. Aye ebikolimo by’abazaire bikuukulagho omusingi gw’amaka ago.
10Otadhuuluusanga kitiisa kya lata wo olw’okwenda ekitiisa ekikyo kyeyongere, kuba ekyo tikikuleetera iwe bantu kukutaamu kitiisa. 11Ekitiisa kyo okifuna lwa kuba ogha lata wo ekitiisa. Era abaana bwe batata mu inhaibwe kitiisa, baswala beene. 12Mwana wange, labiriranga lata wo ng’akairiighe, otamuleeteranga kunakughala ekiseera kyonakyona ky’amala nga mulamu. 13Ni bw’aba nga takaategeera bukalamu, muguminkirizenga. Iwe okuba ng’oli n’amaani weenaweena kitakuleeteranga kumunhooma. 14Musengwa talyerabira bya kisa by’okolera lata wo, era ekisa ekyo kirikuleetera okusoniyibwa ebibi byo. 15Bw’oliba mu kudaazibwadaazibwa, Musengwa alibiidhukira yaakuyamba. Ebibi byo biriwaagho ng’omugozi bwe gusaanuuka mu kasana. 16Omuntu yeenayeena alekulira agho abazaire be oba n’abaleetera okunakughala, aba ng’oti n’avumye Musengwa. Era Musengwa aba yamaze ira okumukolimira.
Obuwombeefu
17Mwana wange, banga muwombeefu mu by’okola byonabyona, olwo abantu Katonda b’asiima baidha kukugonzanga. 18Y’okoma okuja nga weeyongera okuba omukologho, y’obe okomenga n’okuba omuwombeefu, memale Musengwa akusiime. 19[Ghaligho abantu kamaala ab’ebitiibwa era abamanhifu, aye abawombeefu Katonda b’ayoleka ebyama bye.3:19: Ebighandiiko ebindi mu Lugureki byongerezaaku akanhiriri kano 19: Aye mu Luheburayi mulimu nti: Katonda wa kisa inho, era ebyama bye abyoleka abo abawombeefu.] 20Waire Musengwa mukologho inho, aye era aganha ekitiisa abawombeefu kye bamugha. 21Otagezangaku kumanha bintu bikuswikiriire, oba okugezaaku okunoonereza ku ebyo by’otasobola kutegeera. 223:22: Ma 29:29Omwoyo gwo gutenga ku ebyo Katonda bye yakulagira, aye oteeraliikiriranga lwa kwenda kumanha ebyo by’ataakwoleka. 23Otengizanga mu bye bataakulagira, ate nga ebyo bye baakwoleka biswikiriire okutegeera kw’abantu. 24Abantu kamaala baaba n’endowooza dhaibwe dhaabaleetera okudaaliima. Era endowooza dhaibwe enkyamu dhaaleetera n’ebyo bye baba basazeegho byona okuba ebikyamu. 25[Bw’oba ozira maiso tosobola kubona. Bw’oba ozira bumanhi tosobola kuba na magezi.3:25: Ebighandiiko ebindi mu Lugureki byongerezaaku akanhiriri kano 25.]
26Empwitu erikuviiramu akabi ku nkomerero. Era bwe weebisa obubi nga tiweebalirira, ekyo n’ekirikwita. 27Ow’empwitu ebizibu birimwebungaku, n’omukozi w’ebibi yaayongera ekibi ku kibi. 28Eyeekuluntaza ezira kirimuwonia bizibu kumudaazadaaza, kuba ekibi kiba kyamala okumusimbamu emizi gyakyo. 29Omugezi ayegera bingi mu nfumo ni mu nsambo. Afaayo inho okuwulirisa, kuba ayenda okwega.
Okugabira abaavu
30Okugabira abaavu kusobola okuleetera omuntu okusoniyibwa ebibi, ng’amaadhi bwe gasobola okuzikiza omuliro oguli kubbeibbera. 31Omuntu yeenayeena akolera abandi eby’ekisa, aba ali kulowooza ku biseera ebiriidha, kuba baba balimuyamba ng’agwire ku kizibu.