29
Okuwola n’okusasula
129:1-7: Kuv 22:25; Lev 25:35-38 Omuntu bw’aba n’ekisa n’awola baine, aba akuumye ebiragiro bya Katonda olw’okuyamba baine abo. 2Owolanga baino nga bali mu bwetaavu, era bw’obanga n’eibandha ery’omuntu olisasulanga mangu mu kiseera kyene. 3Otuukirizanga ky’osuubiiza era waabanga mwesigwa ye baino, olwo oidha kufunanga kiisi ky’oneetaaganga. 4Abantu kamaala bakitwala bati okwewola kuli ng’oti kulonda bulonde, olwo baasobera abo ababayamba. 5Abantu beegonza, baakuba amakiryaivu, era baayogera n’eiwooyo, okutuusa lwe babawola eibandha lye benda. Aye ekiseera bwe kituuka eky’okusasula baalwagho okusasula, beemuluguunhia era beegemya obusongasonga obuziramu. 6Omuntu eyawola eibandha bwe yeekalangula einho okubandha, aba wa nkabi bwe bamusasulaku ekitundu. Aye bw’ateekalangula, ole eyeewola aba amunhaze bunhage. Era mu kifo ky’okumwebaza amufuula bwa muzigu, yaamukolimira, yaamuvuma era yaamunhooma.
7Olw’ebibi ng’oti n’ebyo, abantu kamaala kyebava baloba okuwola, basobole okweghala okunhagibwaku ebyaibwe.
Okugabira abaavu
8Aye oguminkirizanga abaavu, era otabalindirizanga inho n’olwagho kubagabira buyambi. 9Oyambanga abaavu nga Musengwa bwe yatulagira, waabaghanga ebyetaago byaibwe, mu kifo ky’okubeebingaku nga tobaghaire kantu. 10Omala gafiirwa mpiiya dho ng’oli kuyamba owoluganda lwo oba mukagwa wo, aye otadhifiiriirwa lwa kudhireka ni dhitalaigira bw’eyo y’odhisimiire ghansi gh’eibaale. 11Okozesanga obukombe bw’oli nabwo ng’ojiira ku biragiro by’oyo Ali Ghaigulu Yeene, olwo lwe buliba obw’omugaso y’oli okusinga okutereka obutereke empiiya. 12Ekikolwa eky’okugabiranga abaavu kyona okibaliranga mu by’obukombe by’oli nabyo. Ekyo kiidha kukuwonianga ebizibu kamaala 13n’abazigu, okusinga n’engabo engumu einho, oba eifumo ery’amaani einho.
Okweyimirira abantu amabandha
14Omuntu omukalamu yeeyimiriragho muntu mwine, aye ole eyawaamu eira ensoni amulekulira bw’agho. 15Kale oteerabiranga kisa oyo akweyimiriragho ky’aba akugemeirwa, kuba aba nga yeeghaireyo ku lulwo. 16Omuntu atasiima aleetera eyamweyimiriragho okufiirizibwa ebibye, era olw’obutasiima bwe obwo yaalekulira agho ole eyamuwonia. 17Okweyimirira kuleeteire abantu kamaala abaali obulungi okwonoonekerwa ebyaibwe, kwabaviiraku okuyuuzibwayuuzibwa eyo batyo. 18Era kwaviiraku abantu abafuzi okusenguka, baaja nga batambulatambula eyo batyo mu maghanga agandi. 19Omwonooni eyeeyimiriragho omuntu olw’okwenda okufuna amagoba, alifunamu bwa kuwozesebwa mu mbuga dha mateeka. 20Kale yambanga mwino ng’ojiira ku busobozi bw’oli nabwo, aye nga weekuuma olobe kugwa mu bizibu.
Okwezimbira endhu
21Ebyetaago eby’omu bulamu ni bino: amaadhi, emere, ebivaalo, n’endhu ey’okubangamu olw’okwewonia okweyanikanga agheereere. 22Omala gaba mwavu ng’oli mu kayumba ko waire ka isubi, aye otabaire mu mbaga dha kwedhalabya ng’oli mu ndhu dh’abantu bandi. 23Banga mumativu n’ebyo by’oli nabyo, ka bibe nga bingi oba nga bitono. 24Kigemya enaku obutaba na maka n’oyengeetanga obuyengeete okubuna endhu dh’abantu, kuba buli y’oja tokana kubumbula munwa kwogera. 25Era niiwe osangaaza abageni, waabagheereza eby’okunhwa n’eby’okulya, aye tighabaagho akwebazaaku naire. Okutoolaku okuwulira abakuyeeyereza nga bakoba bati: 26“Munaife idha otegeke emeeza. Era n’ekyo ky’ogemye mu ngalo ky’obe ompe ndye.” 27Oba bati: “Munaife, viirayo omuntu ow’ekitiibwa. Muganda wange ali kwidha kuba ghano ninze, kale ekisenge ekyo mw’oli ndi kukyenda.”
28Kizibu omuntu alimu amagezi okuguminkiriza ebintu bino: okudhuukibwadhuukibwa omuntu akusuza, n’okuvumibwavumibwa omuntu akuwola empiiya.