27
1Abantu kamaala bakola ebibi olw’okwenda okufuna amagoba. Era ole yeenayeena ayenda okuba omukombe, ali n’okuba ng’ebindi byonabyona tabibona okutoolaku amagoba gonka. 2Enkondo ye bakomereire ghagati gh’amabaale eba ngumu begulugulu. Mu nsambo n’endala, n’ekibi kityo bwe kizibughala okuva ghagati gh’okutunda n’okugula. 3Omuntu bw’atagumira ku kutya Musengwa na bumalirivu, endhu ye emugwaku mangu.
Omuntu bamumanhira ku by’ayogera
4Omuntu bw’ayogera, ebibi bye byeyoleka ng’oti n’akakunguuto bwe kasengeedha ebikaba ni bisigala ku ngulu. 5Ekiwumbe kija kibe nga kiri kwokerwa mu kyokero, memale waabona empumba embi ey’omuwumbi. Mu nsambo n’endala, n’omuntu by’ayogera byoleka ekikula kye. 627:6: Mat 7:17; 12:33; Luk 6:44 Ku bibala eby’omuti kw’omanhira ensambo ye bagulabiriramu. N’ebibono omuntu by’ayogera n’ebyoleka ekiri mu mwoyo gwe. 7Kale otasaakanga muntu ng’okaali kuwulira by’ayogera, kuba ekyo n’ekyoleka ky’ali kyene.
Okuba ow’amazima
8Bw’ogezaaku einho okuba omuntu akolera ku mazima, osobola okukituukaku, era amazima tigalikuvaaku nga gali ng’oti kivaalo kya kitiisa. 9Ng’enhonhi bwe dhiba aghalala ni dhiinaadho bwe dhifaanana, n’amazima goona gatyo bwe gaja y’abo abagakoleraku. 10Ng’empologoma bw’ebwama ni yeeteega ky’eri kuyiiga, n’ekibi kyona kityo bwe kyeteega aboonooni.
Endhogera ey’abasiru
11Abantu abatya Katonda buli kiseera boogera bya magezi, aye abasiru bye boogera bikyukakyuka ng’oti mwezi. 12Bw’obanga mu basiru, onoonianga mangu akaghagaanhia ak’okubavaamu. Aye bw’obanga mu bagezi, olwangaghooku ng’okaali ghalala nabo.
13Aboonooni bye baghaya bireetera omuntu okwesinwa, n’engeri ye beesesaamu eidhwire bwonooni bwereere. 14Abantu abo bwe baghaya bakolima, n’omuntu enviiri dhaamuwa bwa ku mutwe. Ate bwe batoolera okutakana beene na beene, omuntu asemba bwa matu alekere kuwulira. 15Abantu abo abeekuluntaze bwe basoola muvaamu n’okuyugha musaayi. Era bw’obawulira nga bali kuvumagana n’enaku ekugema.
Okwanika ebyama
1627:16-21: Nsa 20:19; 25:9 Omuntu yeenayeena ayanika ebyama mu bantu, aleetera abandi okulekera okumwesiga, era tairayo kuba na mukagwa we wa munda. 17Ogozanga mukagwa wo era waabanga mwesigwa y’ali. Aye bw’obanga ng’oyaniike ebyama bye mu bantu otadaaganga kumuleetaku mukwano kabiri, 18kuba omukwano ogwo oba ogwise ng’oti n’omuntu bw’aita omuzigu we. 19Era ng’omuntu alekwire akanhonhi ni kaguluka bw’atairayo kukagema, n’iwe weena mukagwa wo oyo aba akugoloireku nga tokaasobola kumwiza. 20Otamunonerezanga naire, omulekanga buleke yaaja, kuba aba atuuse ghala inho ng’ali kuziinhuuka ng’oti n’empuuli erekwike ku mutego. 21Amabwa gasoboka okuzingirirwaku ebighero, n’ebivumo byasoboka okusoniyibwa, aye omuntu yeenayeena ayanika ebyama aba takaali na isuubi naire.
Obuguya
22Ole bw’akunhiira eriiso aba ategeka kukola bikyamu, era ghazira asobola kumulobera kubikola. 23Bw’aba ng’ali ghalala n’iwe, ayogera bikalamu byereere. Era yaakusuutasuuta mu buli ky’oyogera. Aye oluvaagho oti, ng’afuulaniafuulania by’oyogeire, asobole okukusiiga enziro ni byene ebyo. 24Ku nsi ezirayo kye nkyagha ng’omuntu oyo, era ni Musengwa yeena amukyagha.
25Omuntu bw’asuula eibaale ghaigulu gh’omutwe gwe, liirira ku mutwe gwe gwene. N’ole afumita mwine ekyogi, yeena avaagho nga bamufumiite ekibwa. 26Ole asima ekiina akigwamu mwene. N’ole atega omutego, agugwaku mwene. 27Omuntu akola ekibi, kirimwirira yaaloba na kumanha ye kiviire.
28Ole eyeekuluntaza, avuma baine era yaabasekerera. Aye ghaligho amweteeze ng’oti mpologoma okumwesasuuza. 29Abo abasangaala olw’okugwa kw’omuntu atya Katonda, baligwa ku mutego baafiira mu bulumi.
Okusungughala
30Obusungu n’ekiruyi bintu bibi inho. Aye aboonooni baba nabyo byombi.