26
1Wa nkabi omusaadha oyo ali ni mukazi we ow’empisa enkalamu, enaku edh’obulamu bwe dhiryeyongeraku emikuzi ebiri. 2Omukazi omwesigwa aleetera iba okuba omusangaavu, era omusaadha oyo alimalaku emyaka egy’obulamu bwe mu miraala. 3Omukazi ow’empisa enkalamu aba ng’oti mugabo omulungi ogw’omughendo, ogundi ku migabo omusaadha atya Musengwa gy’afuna. 4Omusaadha iba w’omukazi oyo k’abe mukombe oba mwavu, buli kiseera aba musangaavu ng’amoga masanhu meereere.
5Ghaligho ebintu bisatu ebindeetera okutya: ekisooka, n’olubono abantu lwe basalagania mu kibuga; ekyokubiri n’ebikuukuulu by’abantu ebija nga byesolozasoloza; n’ekyokusatu kyaba, abantu okughaamiriza banaibwe. Ebyo byonabyona bibi inho okusinga n’okufa. Aye ghaligho ekindi ekyokuna ekiinumya omwoyo: 6nga n’eky’omukazi okugemerwa mughalikwa we eighali, ekivaaku enaku n’okweraliikirira kuba omunwa gwe guja nga gukisansa woonawoona buli muntu yaakimanha.
7Omukazi ow’empisa embi ali ng’oti kikoligo kya nte kye bagisibye obubi mu nkoto. Ole bw’agezaaku okumufuga, aba ng’oti n’agemye siga mu ngalo. 8Omukazi omutamiivu aleetera abantu obusungu, kuba aba takaagisa bimuswaza. 9Omukazi omwenzi omumanhira ku ngeri y’amodolamu amaiso. 10Okuumanga butatemya mughala wo omukanukanu, kuba tomanha bw’afuna kaghagaanhia ka kwekolera by’ayenda, ate n’amala n’akwonoonekaku. 11Weekengeerenga emmoga ye ey’obukanukanu, era otamwewuunhianga ng’akuleeteire okuswala. 12Aja kwegha buli musaadha yeenayeena amwenda, abe ng’oti n’omutambuze ali endiwo bw’anhwa kiisi maadhi g’ayagaine.
13Omukazi omulungi aleetera iba okuba omusangaavu, era ensambo y’amulabiriramu emuleetera okugeedha yaaba wa maani. 14Omukazi omusirifu kirabo ekiva ye Musengwa. Era ezirayo minzaani esobola kupima mughendo gwagayaga na muntu wa mpisa nkalamu. 15Omukazi ow’empisa enkalamu asanhusa ebitaloodheka. Era ezirayo minzaani esobola kupima mughendo gwa mpisa nkalamu. 16Obulungi obw’omukazi ow’empisa enkalamu ng’ali mu maka ge amasengeke obukalamu, buba ng’oti n’obw’endhuba eri kwakira ku igulu lya Musengwa mu kasana ghagati. 17Emboneka ye enungi n’obulangaadhu bwe, biba ng’oti n’entaala eyakira ku kikondo ekitukuvu mu isinzizo eitukuvu. 18Amagulu ge amalungi geesimba ku bukongoivule bwe obugumu, ng’oti n’empango edha zaabu dhe basimbye mu bikolo bya feeza.
19[Mwana wange, weekuume ng’oli mulamu mu buvubuka bwo. Amaani go otagamalira mu bantu b’otaidhi. 20Ja oyagaaze mu nsi yoonayoona, ofunemu ekibandha ekigimu. Okisimbemu ensigo yo iwe mwene ye weekakasa nga ya mbala. 21Olwo abaana bo balibaagho nga balamu, era baakula bukalamu nga bali n’obwesige olw’okuba bava ghalungi. 22Omukazi malaaya ali ng’oti matanta omuntu g’afuudhie ere. Abo abenda ku mukazi omufumbo, banoonia bwa lumbe. 23Omuntu omukozi w’ebibi aligheebwa omukazi atatya Katonda. Aye oyo atya Musengwa alifuna omukazi ow’empisa enkalamu. 24Omukazi omugwenhufu anhumirwa inho okukola ebimuleetera okuswala. Aye omuwombeefu, yeewombeeka ni bw’aba ng’ali yenka n’iba. 25Omukazi omukanu aba ng’oti bwa nsolo, aye ole alimu empisa atya Musengwa. 26Omukazi ata mu iba ekinhagansi, abantu boonaboona bamubona ng’omugezi. Aye bweyeekanaghaza n’atamutaamu kinhagansi, boonaboona bamanha nga tatya Katonda. Wa nkabi omusaadha oyo ali ni mukazi we ow’empisa enkalamu, enaku edh’obulamu bwe dhiryeyongeraku emikuzi ebiri. 27Omukazi awowoigana era ayogerayogera, aba ng’oti igwala lye bafuuwa okulaalika okulumba omuzigu. Era omusaadha yeenayeena aba aghalala n’omukazi ng’oti n’oyo, aba mu ntalo ekiseera kyonakyona eky’obulamu bwe.26:27: Mu bighandiiko ebindi obunhiriri obwo 19-27 bulimu, aye mu bindi buziramu.]
Ebireeta enaku
28Ghaligho ebintu bibiri ebindeeta enaku ku mwoyo, ate ekyokusatu kyandeetera okusungughala:
ekisooka, kya mwisirukale kuba mu bwetaavu olw’okwavughala;
ekyokubiri, kya muntu kuba nga mugezi aye baaloba kumutaamu kanhagansi;
n’ekyokusatu, kyaba kya muntu abaire n’empisa enkalamu okufuuka omwonooni.
Omuntu ng’oti n’oyo, Musengwa alimugha ekibonerezo kya kwitibwa bwitibwe.
Ebigema ku kutunda ni ku kugula
29Kiba kizibu inho omusuubuzi okweghala okukola ekibi, n’omutunzi w’ebintu obutasobyaku naire.