25
Abantu abagwaine okusaakibwa
1Ghaligho ebintu bisatu ebindeetera okusangaala einho, era ebirungi ye Katonda n’abantu:
eky’aboluganda okuba nga baisania,
ab’omuliinaano okuba nga bagonzania,
n’abafumbo okuba nga bali mu miraala.
2Aye ate ghaligho abantu ba mikuzi esatu be ntayenderaku irala, abali n’empisa dhe ntasobola kuguminkiriza:
omwavu eyeekuluntaza,
omukombe omuguya,
n’omusaadha omukulu omusiru omwenzi.
3Ekintu ky’otayeze mu buto, olisobola otya okukyega mu bukaire? 4Nga kiba kikalamu ab’envu okusala ensonga obukalamu n’okugha abantu amagezi amalungi. 5Nga kiba kikalamu abakaire n’ab’ebitiibwa okuba n’amagezi, n’okutegeera, era n’okugha abantu amagezi amalungi. 6Engule ey’abakaire eri mu kuba na bumanhirivu bungi, n’okwenhumiriza kwaibwe kwaba mu kutya Musengwa. 7Ebintu biri mwenda ebindeetera okusangaala. Aye eriyo ekyeikumi ekibisingira irala era kye ndhogera nga tiruma namu. Ebintu ebyo biibino:
omuntu asagamba olw’abaana be,
omuntu aghangaala n’abona n’amaiso ge okugwa okw’abazigu be,
8omusaadha ow’enkabi afuna omukazi omutegeevu n’akolagana naye obukalamu,
omuntu atatyerera mu ndhogera kukola bibi,
omuntu atagheerezangaku muntu ali ku idaala liri ghansi gha lirye,
9omuntu ow’enkabi abantu ye boogeraku obukalamu,
omuntu abantu ye bawulirisa nga basangaavu,
10era omuntu mukologho mwene ali n’amagezi.
Aye ole atya Musengwa n’awula abo boonaboona.
11Era omuntu ng’oti n’oyo ghazira amutuukaku kuba okutya Musengwa n’ekisinga bukulu mu byonabyona. 12[Okugonza Musengwa kusookera mu kumutya, n’okugumira ku Musengwa oyo kusookera mu kwikiriza.25:12: Mu bighandiiko ebindi akanhiriri ako 12 kalimu, aye mu bindi kaziramu.]
Okugalaga okugema ku bakazi
13Omala gaba na ibwa lindi lyonalyona, aye otabaire na ibwa lireetebwa mukazi akukyaye. Omala gagumira buzibu bundi bwonabwona obubi, aye otagumiire buzibu bubi buleetebwa mukazi. 14Omuntu owundi yeenayeena amala galwana n’iwe, aye ole akukyaye atalwaine n’iwe. Era omuntu owundi yeenayeena amala gakwesasuulizaaku, aye abazigu batakwesasuliizaaku. 15Ezirayo butwa businga busagwa bwa musota, waire okubaayo obusungu obusinga obw’omukazi.25:15: Mu bighandiiko ebindi eby’eira mulimu mukazi aye mu Lugureki mulimu muzigu.
16Omala gaba mu ndhu n’empologoma oba ogusota, aye otabaire na mukazi wa mpisa mbi. 17Empisa edh’omukazi embi dhifuusafuusa emboneka ye, yaafaanana mu maiso ng’oti kisolo kikambwe. 18Iba avaagho buve, yaaja bwa ku lulaalo yaaliira eyo emere mu balinaanwa be, yaasiidhira eyo enaku ye.
19Ezirayo kizibu kyonakyona kiba kinene, okusinga ebyo ebireetebwa omukazi. Omukazi ng’oti n’oyo agwananga yaatuukibwaku akabi akatuuka ku boonooni.
20Ng’okuniinaniina akasozi mu ngira ey’oluvuutu bwe kukalubya omuntu omukaire, n’omukazi asoolasoola atyo bw’akalubya iba omusirise.
21Otatwalirizibwanga bulungi bwa mboneka ya mukazi, waire okumwegombanga olw’obukombe bwe. 25:21: Mu bighandiiko eby’Oluheburayi mulimu olw’obukombe bwe aye mu by’Olugureki muziramu. 22Kigemya obusungu n’ensoni era kiswaza, omukazi okuba nga n’abeesaagho omusaadha. 23Omukazi ow’empisa embi aleetera iba omwoyo okumweghanika, ni mu maiso okumwenhiinkaala, n’okweraliikirira. Era omukazi oyo atasanhusa iba, amuleetera okuba omuti einho, adhugumira obudhugumire esaawa yoonayoona. 24Ekibi kyainhamira ku mukazi, era twenatwena tufa lwa mukazi. 25Nga bw’otaleka maadhi kuja buje gatyo nga gabita mu lutanda lw’ensugha, era otyo bw’otagwaine kuleka mukazi wo ow’empisa embi kukola ky’ayenze. 26Bw’aba nga tajiira ku by’omukoba, mwetooleeku.