23
1Wo Musengwa, iwe Lata afuga obulamu bwange, otaleka munwa gwange na lulimi lwange kunfuga, era otabiganha kundeetera kugwa. 2Ha, kale ngoli bankuba enkoba olw’ebidhuubo byange, omwoyo gwange ni gwega amagezi! Ni batandeka buleke nga ngwire mu nsobi ni baloba okumbonereza olw’ebibi byange. 3Agho tyandyeyongeire kugwa mu nsobi, na kuleetera bibi byange kweyongera. Era tyandigwire mu ngalo dha bazigu bange, ni baneesanhukizaaku.
4Wo Musengwa, iwe Lata era Katonda ow’obulamu bwange, otandeka kwekuluntaza. 5Mponia okwegomba okubi, 6era otandeka kutwalirizibwa mulyakubi, na kwegomba kukola bibi, na kuba omuntu ataswala.
Okulayira
7Baana bange, muwulirise bye ndi kubagalagira ebigema ku kwogera. Ole alibituukiriza talyetegamu mu by’ayogera. 8Omunwa gw’omwonooni gwene n’ogumugemya. Era n’omuvumagani n’ole eyeekuluntaza, boona bagwa ku mutego n’omulala.
923:9: Mat 5:34; Yak 5:12 Oteenazangaku muze gwa kwelayizalayiza na kweyogezayogeza ku liina lya Katonda Eitukuvu. 10Omwiru ye bakuba emikuzi emingi tabulaku binuubulenuubule. Mu nsambo n’endala, n’omuntu buli kaakyeire eyeelayizalayiza era ni yeeyogezayogeza ku Liina eryo Eitukuvu talitoolebwaku kibi. 11Omuntu alayira emikuzi kamaala aidhula bwa bibi, era amaka ge tigabulamu bibonerezo. Bw’atatuukiriza ky’alayiire, asigala ng’aliku ekibi. Bw’atakifaaku naire, aba akoze ekibi emikuzi ebiri. Bw’aba nga yalayira bya buguya, tatoolebwaku musango. Era akabi kaliidhira amaka ge nga kamwidhirano.
Okwesamba endhogera eyenhinhalwa
12Ghaligho endhogera eri ng’oti kufa kwene. Endhogera eyo egwananga yaaloba kuba mu Baisiraeli, kuba abantu abatya Katonda bateekwa okugyesamba balobe kusaabaana mu kibi. 13Oteenazangaku kwogera bya buwemu, kuba bibi. 14Bw’obanga mu bantu abakologho, olowoozanga ku bazaire bo bwe bawulira mule ng’osobiiza. Waalobanga kwereetera kusirughala olw’emize gyo emibi, kuba tomanha bw’otuuka na ku kwefuugha lunaku lwe wazaalibwaku, na kweidhusa oti oba ng’oli wamala gafa bufe. 15Bwe weenazaaku endhogera evuma, toligivaaku enaku dhoonadhoona edh’obulamu bwo.
Okwesamba obwenzi
16Ghaligho engeri kamaala omuntu dh’akolamu ebibi n’aleetera Katonda okumusungughalira. Aye amairu g’obwenzi gookya ng’oti muliro oguli kubbeibbera, gwe batasobola kuzikiza okutuusa bwe guzikira obuzikire gwene. Omusaadha atadhuuba kindi okutoolaku obwenzi yeekalangulira ku bwenzi obwo, okutuusa omuliro ogwo bwegumuzikiriza. 17Omusaadha ng’oti n’oyo asikirizibwa kiisi mukazi yeenayeena, era talekera okutuusa okufa.
18Omusaadha atali mwesigwa eri mukazi we, akoba mule ati: “Naani ali kumbona nga ndi mu nzikiiza, era nga n’ebimante bineezungulwire? Ghazira ali kumbona naire. Kiki kye mbe ntye? Ni Katonda Ali Ghaigulu Yeene taidha kubona bibi byange.” 19Omusaadha oti n’oyo atya bantu kumubona kyonka, yaaloba kumanha ng’amaiso ga Katonda gaaka okuwula endhuba emikuzi omutwalo mulamba (10,000). Era ng’amaiso ago gabona byonabyona abantu bye bakola, ng’otwaliiremu n’ebyo bye bagezaaku okugisa. 20Ebintu byonabyona yabimanha ng’akaali kubitonda, era yaabimanha ng’amaze okubitonda. 21Omusaadha oyo balimugema nga takyetegekeire, baamubonereza ng’abantu boonaboona babona.
22Era kityo bwekiri ni ku mukazi ataba mwesigwa eri iba, amala n’amuleetera omwana ow’omusaadha owundi. 23Okusookera irala, aba adheemeire eiteeka lya Katonda Ali Ghaigulu Yeene. Ekyokubiri, aba akoze ensobi eri iba. N’ekyokusatu, aba akoze obwenzi ng’alaaya, yaazaala omwana n’omusaadha atali iba. 24Mwene balimuleeta mu maiso g’abantu nga beesoloiza. Era abaana be balibonerezebwa ku lulwe, 25baaba ng’oti miti egiziraku mizi era egiri n’ensaga edhitabalaku bibala. 26Alireka eriina eibi ku nsi baamwidhukiranga nga bamukolimira, era okuswala kwe tikuliwaagho. 27Abo abalisigalagho ng’amaze okufa balimanha bati ezirayo kintu kindi ekiwula okutya Musengwa, era bati ezirayo kiwooma ekiwula okugema ebiragiro bye.