22
Ebigema ku bugayaavu ni ku busiru
1Omuntu omugayaavu ali ng’oti ibaale eririku ebintu ebyenhinhasa, kuba buli muntu amwesimooza bwesimooze ng’amunhooma. 2Omugayaavu ali ng’oti mmungo ya busa, buli abugemamu abwekunkumula mangu ku ngalo. 3Omwana aziramu mpisa aswaza ise, era bw’aba omughala ayongerezaaku eky’okumufiiriza. 4Omughala alimu empisa afuna iba. Aye ole eyeebisa mu nsambo eswaza, aleetera ise bwa nnaku. 5Omughala omunhoomi aswaza ise era yaaswaza n’iba. Era ku bombi abo ghazira amutaamu kanhagansi naire.
6Olwisi abantu balamba abaana aye okulamba okwo kwaloba kutuukaanira mu kiseera ekyo, kwaba ng’oti n’okwembera abali mu maziga ku magombe. Aye okubakangaivula n’omwigo bairemu empisa, kiba kya magezi ekiseera kyonakyona. 7Okwegeresa omusiru kuba ng’oti n’okulimbya engyo edh’ensugha emenheike okugiizaagho, oba okuzuusa omuntu ali mu ndoolo enhingi einho. 8Okukobera omusiru ekintu kuba ng’oti n’okukobera ali kuwongera. Olumala okumukobera, ng’abuuza ati: “Koodhi obaire oli kukoba ki?” 9[Abaana abakuziibwa obukalamu tibooleka ng’abazaire baibwe baaliku abaghafu. 10Abaana abakuziibwa obubi nga banhoomi era nga beekuluntaza, baleetera amaka g’abakungu mwe basimuka okunhoomebwa.22:10: Mu bighandiiko ebindi obunhiriri obwo 9-10 bulimu, aye mu bindi buziramu.]
11Tugwaine okulira abafu kuba tibakaabona butangaavu. Era tugwaine n’okulira abasiru kuba bazira magezi. Aye tugwaine okulira einho abasiru okuwula bwe tulira abafu, kuba obulamu bw’abasiru bubi inho okusinga n’okufa. 1222:12: Mainh 50:10; Yudt 16:24Omufu tumulira enaku musanvu, aye omusiru n’ole atatya Katonda tubalira obulamu bwaibwe bwonabwona.
13Otaghayanga inho na musiru, era otakyaliranga muntu aziramu magezi. Mwekuumenga alobe kukuleetera bizibu, na kukuleetera kwonooneka olw’okukolagana naye. Era mwesambenga, olwo ofunenga emiraala era alobe kukukooyanga na busiru bwe. 14Kintu ki ekindi ekiwula ekyuma ekizitogha einho okuba ekizito? Era ekintu ekyo bakyeta liina ki erindi okutoolaku okukyeta “Omusiru”? 15Kiba kyangu okwetwika omusenho, oba omuunhu, oba ekyuma ekigumu einho, okusinga okuguminkiriza omuntu aziramu magezi.
16Empango ey’omuti ye baghanze obukalamu mu kimante eky’endhu, musisi tasobola kugitengeesa n’eghangukayo. Mu nsambo n’endala, n’omuntu omumalirivu ye bamaze okulamba obukalamu, atyo bw’atatya waire mu biseera ebizibu. 17Omwoyo ogumaze okwinhongoka ebidhuubo eby’amagezi, guba ng’oti kimante kye bamaze okusiiga langi n’okutimba. 18Olukomera olusimbiibwa ku ngulu ku lusozi, tirugumira kiwunga. N’omusiru ali n’omwoyo omuti, yeena tasobola kugumira kiisi kimutiisa kyonakyona.
Omukwano
19Bw’osonka mu liiso, olireetera okuvaamu amaziga. Era bw’okola akabi ku muntu, obona obulumi akabi ako bwe kamuleetera. 20Bw’osuula eibaale mu nhonhi, odhireetera okutya dhaavaagho. Era bw’ovuma mukagwa wo, oleetera omukwano okufa. 21Ni bw’otoolerangayo mukagwa wo empiima n’oyenda okugimufumita, otawangamu maani, kuba kiba kikaasoboka okwizaagho omukwano obuyaaka. 22Era ni bw’obanga nga wayogera bubi ku mukagwa wo, ekyo kitakweraliikirizanga kuba kiba kikaasoboka okwiramu okwisania naye. Aye bw’olivuma mukagwa wo n’omwekuluntalizaaku era n’oghembula ebyama bye, oba n’omusalira enkwe, aja kukuvaaku akulekulire agho. 23Banga mwesigwa ye mukagwa wo ng’ali mu bwavu, osobole okusanhukanga ghalala naye ng’ebintu biri kumujiira bukalamu. Gumanga naye ng’ali mu kiseera eky’okudaazibwadaazibwa, osobole okusagambanga ghalala naye ng’afunie ebirungi.
24Ng’omwosi ogunioka bwe gusooka memale omuliro ni gwidha, n’okuvumagana kutyo bwe kukulemberamu memale okutemulagana kwaidha. 25Tiidha kutyanga kulwanirira mukagwa wange, era tiimwegisengaku ng’ali mu bwetaavu. 26Aye akabi bwe kalintuukaku ku lulwe, omuntu yeenayeena alikawuliraku alimwegenderezanga.
Okusaba okuwona ekibi
27Ha, kale ngoli banta omukuumi ku munwa gwange, baagusibaku akamanhiso ak’amagezi, ndobenga kukola nsobi mu bye ndhogera, n’olulimi lwange lulobe kundeetera kuzikirira!