21
Okwesamba ebibi
1Mwana wange, okoze ekibi? Kale otairangayo kukikola kabiri. Aye saba Katonda akusonighe ebibi byo bye wakola. 2Weesambenga ekibi ng’oti bwe weesamba omusota, kuba bw’okiseetaku kiidha kukumoodha. Amaino gaakyo gali ng’oti ga mpologoma, era gazikiriza abantu. 3Ebikolwa byonabyona eby’okudheemera amateeka biri ng’oti mpiima eri n’obwogi ku ndhuyi dhaayo dhombi, kuba ekibwa ky’ereka gh’efumiite tikiwona.
4Entaka n’obukambwe bireetera abantu okufiirwa ebyaibwe. Kale ni n’amaka g’abo abeekuluntaza, gatyo bwe galizikirizibwa. 5Omwavu bw’asaba, Katonda amuwulira mangu yaamugha by’amusabye.
6Omuntu yeenayeena atayenda kumunenia, aba ali kukola kibi ng’aboonooni. Aye ole atya Musengwa yeenenia mu mwoyo gwe. 7Omwogezi omulungi amanhikana inho ni bw’aba eghala, aye bw’atyerera mu ndhogera, ole omutegeevu akimanha. 8Era ole azimba endhu ku mpiiya edh’abandi, aba ng’oti n’ali kusoloza amabaale ag’okuta ku magombe ge. 21:8 ku magombe ge mu bighandiiko ebindi mulimuaba ng’oti n’ali kusoloza amabaale mu biseera eby’ekiinhogogo. 9Abakozi b’ebibi ghe beesololeiza babanga ng’oti mmungo ya isubi ikalu, enkomerero yaibwe eba kukunaana muliro. 10Engira aboonooni ye babitamu yayaliirwa amabaale bukalamu, aye ku nkomerero yaayo eriyo olwina olw’e magombe.
Ebigema ku magezi ni ku busiru
11Kiisi agema amateeka afuga ebidhuubo bye, era amagezi gali mu kutya Musengwa. 12Omuntu azira magezi tasomeseka. Aye ghaligho ole akozesa amagezi n’aleetera obw’abantu okweyongera okunakughala. 13Okumanha okw’omugezi kweyongera ng’oti maadhi ga mwiga ogubanze, n’amagezi g’agha gaaba ng’oti nsulo ya maadhi agakuuluula.
14Aye okutegeera kw’omusiru kuli ng’oti nsugha eriku olutanda, buli ky’ayega kibitamu bubite.
15Omuntu ategeera bw’awulira ekibono eky’amagezi, akitwala ng’ekikulu era yaakyongerezaaku n’ebibye. Aye ole atafaayo kwega bw’akiwulira, takyenda naire era akisuula bw’ere. 16Okuwulirisa omusiru ng’ali kughaya, kuba ng’oti kutambula lugendo nga weetwise ebizito. Aye gaba masanhu meereere okuwulirisa omugezi ng’ali kwogera. 17Abantu nga beesoloiza, benda inho okuwulira omuntu ayogera eby’amagezi, era by’ayogera babirowoozaaku inho mu myoyo gyaibwe. 18Eri omusiru, amagezi gaba ng’endhu eyagwa. Era okumanha kw’omuntu aziramu magezi kweyoleka ng’ayogera by’atamaze kwetegereza. 19Okwegeresa omuntu atategeera kuba ng’oti kumusiba ndhegere ku bigere, oba ng’oti kumusiba mpingu ku makono. 20Omusiru bw’aseka yeekyenkyemula, aye omugezi amwenha bumwenhe kawola. 21Okwegeresa omuntu ategeera kuba ng’oti kumuvaaza byamadholobera bya zaabu, era ng’oti kumuta bikomo bya zaabu ku makono. 22Omusiru aingira bwingire eyo atyo mu ndhu dh’abantu. Aye ole eyeegendereza ateegerera kuliya nga yeewombeese. 23Aziramu mpisa aba ku lwigi yaalengeza mu ndhu, aye omugundhufu ateegerera kuliya. 24Dhiba mpisa mbi omuntu okwemerera ku mulyango n’awulirisa ebiri mu nda, aye ole ali n’obuntubulamu ensoni dhimugema okukikola.
25Abasiru boogera ebitabagemaku, aye abeegendereza basooka kwetegereza bye boogera. 26Abasiru boogera buli ekibaidha ku munwa, aye abagezi basooka kulowooza memale baayogera. 27Omuntu atatya Katonda bw’akolimira omuzigu we, aba yeekolimiire mwene. 28Omuntu ow’olubono yeeyonoona mwene, era yeereetera okukyayibwa buli gh’aba.