20
Okumanha ekiseera ekituufu eky’okwogereramu
1Ghaligho omuntu lw’anenezebwa mu kiseera ekitali kituufu. Era olundi okusirika obusirike kiba kya magezi okuwula okwogera. 2Aye okunenia kusinga okusiba obusungu ku mwoyo. 3Bwe weetonda ng’osobiiza, kikuwonia okuswazibwa. 4Omuntu akozesa obukambwe okwikirizisa ensonga, aba ng’oti n’omulaawe agezaaku okugema omughala amukake abe naye mu buliri. 5Ghaligho omuntu asirika aye nga mugezi, era ghaabaagho n’ole ye bakyagha olw’okwogerayogera einho. 6Ghaligho asirika olw’okubulwa ky’anaayogera, era ghaabaagho asirika olw’okuba aidhi ekiseera ekituufu eky’okwogereramu. 7Omugezi asirika okutuusa ekiseera ekituufu eky’okwogereramu nga kituuse. Aye omusiru eyeesuutiriza tamanha kiseera ekyo. 8Omuntu ayogera einho obutamala asina abantu, n’ole ataganha bandi kwogera baamukyagha.
Ekiseera kyonakyona ebintu bisobola okulekera okukujiira obukalamu
9Omuntu asobola okufuna ebirungi mu bizibu ebimutuukaku. Ate n’okufuna ebirungi kusobola okumuviiramu okufiirizibwa. 10Ghaligho ekirabo ky’ogaba n’otafunamu muganhulo. Ate ghaabaagho ky’ogaba n’okifunamu omuganhulo gwa mikuzi ebiri. 11Ghaligho abanoonia ebitiibwa, aye byabaviiramu okufiirizibwa, ate ghaabaagho abakuzibwa nga babaire ba ghansi.
12Ghaligho omuntu lw’agula ebintu kamaala ku mughendo omutono, aye byamala byamuviiramu okubisasulira emikuzi musanvu.
13Omugezi aleetera abantu okumwenda olw’ebibono bye. Aye okwewooya eri abantu okw’omusiru kumufiira bwereere. 14Ekirabo omusiru ky’akugha tikiba na muganhulo, kuba ekiseera kyonakyona akutaaku amaiso omusasule. 15Akugha katono aye yaakulangira, yaaleekaana boonaboona bamanhe. Bw’akwazika ekintu olwaleero, enkyo akikusaba okimwirize. Omuntu ng’oti n’oyo ezira amwenda. 16Olwo omusiru oyo ng’akoba ati: “Nzira muntu ye ndheta mukagwa wange, n’ebirungi bye nkola ezira abisiima naire. Abo abalya ku mere yange, bamala bandhogeraku bubi.” 17Bwenebwene omuntu oyo asekererwa abantu kamaala buli kiseera.
Endhogera embi
18Omala gatyerera ku kigulumo ng’oli kutambula, otatyereire mu kwogera. Ng’omuntu bw’atyerera n’agwa amangu geene, n’abakozi b’ebibi batyo bwe balizikirira. 19Omuntu azira mpisa aba ng’oti n’olughayo abasiru lwe baghaya ekiseera kyonakyona, aye nga tirutuukaaniragho. 20Omusiru bw’asamba ensambo, abantu tibagifaaku naire, kuba tagireetera mu kiseera kyayo kituufu.
21Ghaligho omuntu alemesebwa okukola ebibi olw’okuba omwavu. Oyo bw’aja okuwuumula omwoyo gwe tigumulumiriza.
22Omuntu asobola okufiirwa ekitiibwa kye, olw’ensoni okumugema okwogera nga ghaligho omusiru. 23Era ole asobola okusuubiza mukagwa we ekintu olw’ensoni okumugema okuloba, aye ekyo kyamuviiramu okufuula mukagwa we oyo omuzigu.
24Okulimba kuleetera empisa y’omuntu okwidhaku ekimyamya. Aye abasiru balimba ekiseera kyonakyona. 25Omala gaba na mwibi, otabaire na muguya eyagufuula omuze. Aye era bombi ba kuzikirira. 26Omuguya taba na kitiibwa naire, buli kiseera aba yeebwalabwala.
Omuntu omugezi
27Omuntu ayogera eby’amagezi yeekulankulania, ate omwegendereza asanhusa abantu abakologho. 28Omuntu bw’alima eitaka, akungula by’asize. N’ole asanhusa abantu abakologho, yeena bamusonigha bw’aba ng’asobiiza.
29Ebirabo n’enguzi biziba amaiso ag’abagezi, era byabatunga eminwa baaloba kunenia bikyamu.
30Amagezi amasirikire gali ng’oti n’obukombe obugisiibwa. Byombi biba na mugaso ki? 31Aye omala gaba na muntu agisa obusiru bwe, otabaire n’ole asirikira amagezi ge.20:31: Ebighandiiko ebindi byongerezaaku akanhiriri 32, aye ghano tikongeirwaku olw’amagezi agagheereibwa okuva mu bakugu mu Byaghandiikibwa Ebitukuvu.