19
1Omukozi omutamiivu talifuuka mukombe. Ate ole atafaayo ku buntu butono, ekyo kirimuviiramu okuzikirira empolampola. 2Omwenge n’abakazi bireetera abasaadha abagezi okudaaliima. Omusaadha eyeereeterezaaku bamalaaya aba tabalirira bulamu bwe. 3Era obutabalirira obwo bulizikiriza obulamu bwe, omubiri gwe gwavunda, yaafuuka mere ya nhengere.
4Omuntu ayanguyiriza okwesiga abantu, aba munafu mu birowoozo. Era ole akola ekibi yeerumya mwene. 5Era ole asanhukira okukola ebibi alisalirwa omusango gwamusinga.
Okuyengeesa olubono
6Omuntu bwe yeesamba okuyengeesa olubono yeewonia ebizibu kamaala. 7Otakoberangaku muntu ky’owuliire, kuba era ozira ky’olifiirwa naire. 8Otakikoberangaku bakagwa bo waire abazigu bo, okutoolaku nga bw’okisirikira oba okoze ekibi; 9kuba omuntu bw’alikiwulira alikwegemerera yaamala yaakukyagha. 10Ghalighooku olubono lw’owuliire? Ky’obe okole lumire, era ogume bugume. Tirwidha kukwabisa. 11Okugezaaku okusirikira olubono kuleetera omusiru obulumi ng’oti n’obw’omukazi ali kulumwa okuzaala. 12Era kwamuluma ng’oti akasaale kamufumiite mu kiteege kaamulaaliramu.
13Bw’owuliranga oti mukagwa wo yakoze ekibi ojangayo waamubuuza, kuba asobola okuba nga tiyakikoze. Aye bw’aba nga yakikoze, olwo abe nga takairayo kukikola kabiri. 14Bw’owuliranga oti mulinaanwa wo yakobye ky’atandikobye, ojangayo waamubuuza, kuba asobola okuba nga tiyakikobye. Aye bw’aba nga yakikobye, olwo abe nga takairayo kukikoba kabiri. 15Bw’owuliranga ekibi ku mukagwa wo, ojangayo waamubuuza, kuba kisoboka okuba eky’obuguya. Otamalanga gaganha kiisi ky’owuliire. 16Omuntu asobola okwogera ekintu ekibi mu butali bugenderevu. Naani atasobyangaku na munwa gwe? 17Mulinaanwa wo bw’akusungughazanga, omubuuzanga waamanha ekituufu ng’okaali kumwesoomera. Olekanga Amateeka g’oyo Ali Ghaigulu Yeene, gaakola ku nsonga ng’oti n’edho. 18[Osookanga kutya Musengwa, memale Musengwa oyo yaakufuula owuwe. Era Musengwa oyo alikugonza bw’oliba omugezi. 19Okwega ebiragiro bya Musengwa kukuleetera obulamu. Era abo abakola Musengwa by’asiima, balya ku bibala by’omuti oguleeta obutafa.19:19: Mu bighandiiko ebindi obunhiriri obwo 18-19 bulimu, aye mu bindi buziramu.]
Okusobola okumanha amagezi geenegeene
20Amagezi goonagoona gali mu kutya Musengwa, era mu magezi goonagoona n’omuli okugema Amateeka ge. 21[Omugheereza bw’aloba okukola musengwa we ky’ayenda aye oluvainhuma n’akikola, musengwa we era asigala nga musungughavu.19:21: Mu bighandiiko ebindi akanhiriri ako kalimu, aye mu bindi kaziramu.] 22Omuntu okumanha einho ebigema ku kukola ebibi tikimufuula mugezi, era kiziramu makulu okujiira ku bidhuubo by’aboonooni. 23Ghaligho omuntu eyeeyambisa amagezi okukola ebyenhinhalwa, aye ghaabaagho ole akola eby’ekisiru lwa kuba azira buzire magezi naire. 24Omuntu atya Katonda ni bw’abula amagezi, awula ole ali n’amagezi amangi aye ng’amenha amateeka. 25Ghaligho omugezi einho aye nga takola mazima, ghaabaagho n’ole eyeefuula omulungi olw’okwenda okufuna by’ayenda.
26Ghaligho abeewombeeka ni baba ng’oti bali mu nnaku, aye nga mule bali kwekoza bwekoze, baidhwire buguya. 27Beerinza ere baaba ng’oti tibali kuwulira, aye baamala baakuleemesa baakuvuunhia bweghaba nga ghazira ali kubabona. 28Bweghabaagho ekintu kyonakyona ekibalobera okukola ebibi, olufuna akaghagaanhia bati nga bakola ebibi ebyo. 29Omuntu osobola okumumanhira ku mboneka ye. Omukuzi ogusooka okumubona osobola okumanha oba mutegeevu oba bbe. 30Envaala y’omuntu, engeri y’asekamu ni y’atambulamu, byoleka kiki ky’ali.